ހުރިހާ ބާރެއް އޮވެގެންވެސް ކުށްކުރުމާއި އަމާންކަން ނަގާލުން މި ސަރުކާރަކަށް ނުހުއްޓުވޭނެ - އުމަރު
25 ސެޕްޓެމްބަރު 2024 | ބުދަ 06:44ސަރުކާރު އޮތީ ގޭންގުތަކާއި ކުށްކުރާ މީހުންގެ ދަށުވެފައި
ކުރީގެ ހޯމް މިނިސްޓަރު އުމަރު ނަސީރު
ހުރިހާ ބާރެއް އޮވެގެންވެސް ކުށްކުރުމާއި އަމަން ނަގާލުން މިހާރު އޮތް ސަރުކާރަކަށް ނުހުއްޓުވޭނެ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
ރާއްޖެޓީވީގެ ސުވަލަކީ ޕްރޮގްރާމުގައި ވާހަކަ ދައްކަވަމުން އުމަރު ނަސީރު ވިދާޅުވީ ކަމެއް ކުރުމުގެ ހުރިހާ ބާރެއް މި ސަރުކާރަށް އޮތްނަމަވެސް، ކުށްކުރުން މި ސަރުކާރަށް ނުހުއްޓުވޭނެކަމަށެވެ. ސަބަބަކީ މި ސަރުކާރު ވެެރިކަމަށް އައިސްފައިވަނީ ގޭންގުތަކުން ފަންޑުކޮށްގެން ކަމަށާއި، ގޭންގުތަކުން ކެމްޕޭންކޮށްގެން، ޖަލުގައި ތިބި ކުށްވެރިން ދޫކޮށްދީގެން ވޯޓު ހޯދައިގެން ކަމަށެވެ. ސަރުކާރު އޮތީ ގޭންގުތަކާއި ކުށްކުރާ މީހުންގެ ދަށުވެފައި ކަމަށާއި، ވެރިކަމަށް އައުމަށްފަހު ދެން ކުރެވޭނެ ކަންކަމެއް ނޯންނާނެ ކަމަށެވެ.
އަދި އެކަމާއި ދެކޮޅަށް ފަހުން މަސައްކަތްކުރަން އުޅުނު ނަމަވެސް އޮންނާނީ އަތާއި ފައި ބަނދެވިފައި ކަމަށާއި، ސުޕަރމެޖޯރިޓީއާއެކު ސަރުކާރު ވެރިކަމަށް އައި ނަމަވެސް، ސަރުކާރުތައް އޮތީ ގޭންގްތަކުގެ ބާރުގެ ދަށުގައި ކަމަށް އުމަރު ވިދާޅުވިއެވެ.
އުމަރު ވިދާޅުވީ ސިޔާސީ ލީޑަރުންގެ ހިތްވަރާއި އަޒުމެއް ނެތް ކަމަށާއި، ވެރިކަން ކުރާ މީހެއްގެ ގައިގައި ކޮންމެވެސް ކަހަލަ އުރަތްޕެއް ހުންނަންވާނެ ކަމަށެވެ. ގަބޫލުކުރާ ހަމައެއް ހުންނަންވާނެ ކަމަށާއި، ވަށައިގެން ތިބޭ މީހުން އެ ހަމަ ދޫކޮށްލަން ބުނިކަމުގައިވިޔަސް ވެރިމީހާ ހުންނަންޖެހޭނީ އޭނާ ގަބޫލުކުރާ ހަމައިގައި ކަމަށެވެ.
އުމަރު ވިދާޅުވީ ރާއްޖޭގެ ހާލަތު އޮތީ ވަރަށް ދަށު ދަރަޖައަކަށް ވެއްޓިފައި ކަމަށެވެ. ކިޑްނެޕްކުރުމާއި ހަމައަށް ލެވެލް ގޮސްފި ކަމަށާއި، ގޭގެއަށް މީހުން ވައްދާފައި، އޮރިޔާންކޮށް، ފޭރިފައި، އެކައުންޓުގައި ހުންނަ ފައިސާ ޓްރާންސްފާކޮށް، ވީޑިއޯ ކޮށް ބްލެކްމެއިލްކުރުން އާންމުކަމަކަށް ވެއްޖެ ކަމަށެވެ. އުމަރު ވިދާޅުވީ އަމަންއަމާންކަން ވަރަށް ބޮޑަށް ދަށަށް ގޮސްފިކަމަށާއި، ހޯމް މިނިސްޓަރުކަމުގައި ހުންނަވައިގެން އެދުވަހު އަޅަން ގަސްދުކުރި ފިޔަވަޅުތައް އެޅުނު ނަމަ އަދި މޮނިކޮން އަމުރު އެއިރު ތަންފީޒުކުރަން ފެށިގޮތަށް އަދި ފަހުން އައި ހޯމް މިނިސްޓަރުންވެސް އެކަންކުރި ނަމަ މިއަދު މިފެންނަ މަންޒަރުތަކެއް ނުފެންނާނެ ކަމަށެވެ.
އުމަރު ވިދާޅުވީ ކުށްކުރާ މީހުން ރުއްސައިގެން ވެރިކަން ކުރަން އުޅެގެން ވެރިކަމެއް ނުކުރެވޭނެ ކަމަށާއި، ވެރިކަމުގެ ދެވަނަ ދައުރެއް ނުލިބޭނެ ކަމަށެވެ. ނަމަވެސް އަންނަ ކޮންމެ ސަރުކާރަކުންވެސް ބޮޑެތި ގޭންގްތަކާއި ޑްރަގް ޑީލަރުން ރުއްސައިގެން، ޖަލުގައި ތިބޭ މީހުން ދޫކޮށްގެން ވޯޓު ހޯދައިގެން ކާމިޔާބުވާނެކަމަށް ހީކުރާ ކޮންމެ ދަތުރެއްވަނީ ނާކާމިޔާބު ކަމަށެވެ.
