މޯބައިލް ފޯނުން މޫނަށް އެޅޭ އަލިން ވެސް ހަންގަނޑަށް ގެއްލުންވޭ!

އިންސާނުންގެ ދިރިއުޅުމުގައި ހުންނަ އާދަތަކުގެ ސަބަބުން ސިއްޙަތަށް ކުރާ ނޭދެވޭ އަސަރުތަކުގެ ވާހަކަ ވަރަށް ގިނައިން ދެކެވެއެވެ. ޚާއްޞަކޮށް ސޯޝަލް މީޑިއާ ޕްލެޓްފޯމުތަކުގައި މިފަދަ މަޢުލޫމާތުތައް ވަރަށް ފުޅާ ދާއިރާއެއްގައި ފެތުރެއެވެ.  މިގޮތުން، އަހަރެމެންގެ ދިރިއުޅުމުގައި އެންމެ ގާތުން އެންމެ ގިނައިން ބޭނުންކުރާ ވަސީލަތް ކަމުގައިވާ މޯބައިލް ފޯނުގެ ސަބަބުން ސިއްޙަތަށް ގެއްލުން ލިބޭ ކަމީ ގިނަ ދިރާސާތަކުން ހާމަވެފައިވާ ކަމެކެވެ. ހާއްސަކޮށް މޯބައިލް ފޯނުން މޫނަށް އެޅޭ 'ބްލޫ ލައިޓް' ގެ ސަބަބުން މޫނުގެ ހަންގަނޑަށް ގެއްލުން ލިބޭ ކަމަށް ސިއްޙީ މާހިރުން ބުނެއެވެ.

ބްލޫ ލައިޓަކީ އަލީގެ ސްޕެކްޓްރަމްގައި ހިމެނޭ ވަކި ބާވަތެއްގެ އަލިކަމެވެ. މި އަލީގެ ޤުދުރަތީ އަދި އެންމެ ވަރުގަދަ މަޞްދަރަކީ އިރެވެ. އެހެންނަމަވެސް، ޒަމާނީ އިލެކްޓްރޯނިކް ވަސީލަތްތަކުން ވެސް މި އަލި އުފެދެއެވެ. މީގެ ތެރޭގައި ސްމާޓްފޯނު، ލެޕްޓޮޕް އަދި ޓީވީ ފަދަ އާލާތްތައް ހިމެނެއެވެ. ނަމަވެސް، މި ވަސީލަތްތަކުން އުފެދޭ ބްލޫ ލައިޓްގެ މިންވަރަކީ އިރުގެ އަލިކަމާ އަޅާބަލާއިރު އެތައް ގުނައެއް ދަށް މިންވަރެކެވެ.

ދިރާސާތަކުން ދައްކާގޮތުގައި ފޯނުގެ އަލި މޫނަށް އެޅުމުގެ ސަބަބުން ހަމުގައި މެލަނިން އުފެދޭލެއް އިތުރުވެއެވެ. މެލަނިން އަކީ ޤުދުރަތީ ގޮތުން ހަމުގެ ކުލަ ގެނެސްދޭ މާއްދާއެވެ. އެހެންކަމުން، ގިނަ ވަގުތު ފޯނު ބޭނުންކުރުމުގެ ސަބަބުން މޫނަށް އެޅޭ އަލިން ހައިޕަރޕިގްމެންޓޭޝަން އިތުރުވުމުގެ ފުރުޞަތު އޮވެއެވެ. ހައިޕަރޕިގްމެންޓޭޝަނަކީ މެލަނިން އާދަޔާ ޚިލާފަށް ގިނައިން އުފެދުމުގެ ސަބަބުން ހަމުގައި ކަޅު ލައްތައް އުފެދުމެވެ. މި މައްސަލަ ޚާއްޞަކޮށް ހަމުގެ ކުލަ ކަޅު މީހުންގެ ކިބައިގައި ފާހަގަކުރެވޭ މިންވަރު އިތުރުވެއެވެ.

މީގެއިތުރުން، ބައެއް ދިރާސާތަކުން ދައްކާގޮތުގައި ބްލޫ ލައިޓްގެ ސަބަބުން ހަންގަނޑުގައި ހުންނަ ކޮލާޖެންއަށް ގެއްލުން ލިބެއެވެ. ކޮލާޖެން އަކީ ހަމަށް ކޮންމެހެން ވެސް ބޭނުންވާ ޕްރޮޓީނެކެވެ. ހަންގަނޑު އޮމާންކަމާއި، ތާޒާކަމާއި ޒުވާންކަން މަތީ ހުރުމަށް މިއީ ކޮންމެހެންވެސް މުހިއްމު މާއްދާއެކެވެ. ނަމަވެސް، ފޯނުން މޫނަށް އެޅޭ އަލީގެ ސަބަބުން މޫނުގެ ހަންގަނޑު ކުރަކިވެ، ހަމުގައި ރޫ ޖެހި، މުސްކުޅިކަން ދައްކުވައިދޭ ކަމަށް ފަހުގެ ދިރާސާތަކުން ހާމަވެއެވެ. ހަމައެއާއެކު، ސިއްހީ މާހިރުން ބުނާގޮތުގައި އިލެކްޓްރޯނިކް ވަސީލަތެއް ހަމާ އެންމެ ސެންޓިމީޓަރެއްގެ ގާތުގައި ވިޔަސް ބަހައްޓައިގެން ގަޑީއިރެއް ހާއިރު ބޭނުންކުރިނަމަވެސް މޫނުގެ ހަމަށް ބޮޑެތި ގެއްލުން ލިބިދާނެއެވެ.

ބްލޫ ލައިޓްގެ ސަބަބުން ގިނަ މީހުންގެ ލޯކައިރި ކަޅުވެ، ފުއްޕާ ގޮތް ދިމާވާ ކަމަށްވެސް ދިރާސާތަކުން ހާމަވެއެވެ. އެއީ، މި އައްޔަކީ ޚާއްސަކޮށް މެލަޓޮނިން މާއްދާ އުފެއްދުން މަދުކުރާ އެއްޗެކެވެ. މެލަޓޮނިނަކީ ޤުދުރަތީ ގޮތުން އުފެދޭ ހޯމޯނެއް ކަމަށްވެފައި، އާންމު ގޮތެއްގައި މި ހޯމޯނުގެ ޒަރީއާއިން އަޅުގަނޑުމެންގެ ހަށިގަނޑަށް ނިދުމުގެ ވަގުތު އަންގައިދީ، ނިދުމާއި ނިދައިގެން ހޭލުމުގެ ދައުރު ކުޅެދެއެވެ.

މެލަޓޮނިން އުފެއްދުން މަދުވެ، އެއަށްފަހު ނިދުމުގެ ކުރިން މޫނަށް ބްލޫ ލައިޓް އެޅުމުން ކުރިން ބުނެވުނު ޤުދުރަތީ ޕްރޮސެސްއަށް ހުރަސްއެޅެއެވެ. މީގެ ސަބަބުން ނިދަން އުނދަގޫވެ، ނިދުމުގެ ފެންވަރު ދަށްވުމުގެ ފުރުޞަތު އޮވެއެވެ.

ދިގު މުއްދަތަކަށް ނިދުމުގެ މައްސަލަތައް ދިމާވުމުގެ ސަބަބުން ހަމުގައި ކުރިން ހުރި ބައެއް ބަލިތައް އިތުރަށް ގޯސްވެދާނެ ކަމަށްވެސް ހަމުގެ ޑޮކްޓަރުން ބުނެއެވެ. މީގެ ތެރޭގައި ބިހި ޖެހުމާއި، އެގްޒީމާ އަދި ރޮސޭޝިއާ ފަދަ ބަލިތައް ހިމެނެއެވެ. ހަށިގަނޑަށް ބޭނުންވާ ވަރަށް ނިދި ނުލިބޭ ކަމަށް ވާނަމަ ކޯޓިސޯލް މިންވަރު އިތުރުވުމުގެ ފުރުސަތު އޮވެއެވެ. ކޯޓިސޯލަކީ ކަންކަމުގައި މީހާ މާބޮޑަށް ކަންބޮޑުވުމުގެ ސަބަބުން އުފެދޭ ހޯމޯނެއް ކަމަށްވެފައި، މި ހޯމޯނުގެ ސަބަބުން ހަމުގައި އުފެދޭ ކޮލާޖެން ނައްތާލައެވެ. މީގެ އިތުރުން، ރަނގަޅަށް ނިދި ނުލިބުމުން ހަމުގެ ޤުދުރަތީ ދިފާޢީ ބާރު ބަލިކަށިވެގެންދެއެވެ.

ފުރަތަމަ ކަމަކަށް، ސްކްރީން ޓައިމް މަދުކުރުމަކީ އެންމެ މުހިންމު އެއް ފިޔަވަޅެވެ. ކޮންމެހެން ބޭނުން ނޫން ވަގުތުތަކުގައި ފޯނާއި ކޮމްޕިއުޓަރު ބޭނުންކުރުން މަދުކޮށް، އެ ވަގުތުތައް އާއިލާއާއެކު ހޭދަކުރުމަށް ނުވަތަ ފޮތް ކިޔުމަށް ޚާއްޞަކުރުމަކީ ބުއްދިވެރި ކަމެކެވެ. ޚާއްޞަކޮށް ނިދަން އޮށޯންނަން ގަސްތުކުރާ ވަގުތުގެ ދެ ގަޑިއިރު ކުރިން ސްކްރީން ބޭނުންކުރުން ހުއްޓާލުމަކީ ނިދުމުގެ ކުރިން މޫނަށް އެޅޭ ބްލޫ ލައިޓްގެ މިންވަރު މަދުކުރުމަށް ކުރެވިދާނެ މުހިއްމު ކަމެކެވެ.

މީގެ އިތުރުން، ބްލޫ ލައިޓް ފިލްޓަރ ބޭނުންކުރުމަކީ ވެސް ރަނގަޅު ކަމެކެވެ. ގިނަ ސްމާޓްފޯނުތަކާއި ކޮމްޕިއުޓަރުތަކުގައި މިހާރު ބްލޫ ލައިޓް ފިލްޓަރ ކުރުމުގެ ޚާއްޞަ ފީޗަރތައް ހުރެއެވެ. މިސާލަށް އިލެކްޓްރޯނިކް ޑިވައިސް ތަކުގައި ހުންނަ 'ނައިޓް މޯޑް' އެކްޓިވޭޓްކޮށްގެން ބޭނުންކުރުމަކީ މޫނުގެ ހަމަށް ލިބޭ ގެއްލުން ކުޑަކުރުމަށް އެޅޭނެ ރަނގަޅު ފިޔަވަޅެކެވެ. ބްލޫ ލައިޓް ފިލްޓަރ ކުރާ ޚާއްޞަ ބައެއް ސޮފްޓްވެއަރތައް ވެސް މިހާރު ހުރެއެވެ.

ހަމައެއާއެކު، ސްކްރީންގެ އަލިކަން މަޑުކުރުމަކީ ވެސް މުހިންމު ކަމެކެވެ. ޚާއްޞަކޮށް ރޭގަނޑުގެ ވަގުތުތަކުގައި ސްކްރީންގެ އަލިކަން ވީހާވެސް މަޑުކޮށްގެން ބޭނުންކުރުމަކީ ހަމުގެ އިތުރުން ލޮލަށް ކުރާ ނޭދެވޭ އަސަރުވެސް ކުޑަކުރުމަށް އެހީތެރިވާނެ ކަމެކެވެ. އަދި ސްކްރީން ބޭނުންކުރާއިރު ކޮޓަރީގެ އަލިކަން އިތުރުކޮށް، ސްކްރީނާއި ލޯ ދޭތެރޭގައި އެކަށީގެންވާ ދުރުމިނެއް ބެހެއްޓުމަކީ ވެސް މުހިންމު ކަމެކެވެ.