ޔުއެފާ ޗެމްޕިއަންސް ލީގުގައި މެންޗެސްޓަރ ސިޓީ އާއި އިންޓަ މިލާން ކުޅުނު މެޗު އެއްވަރުވެގެން ނިމިއްޖެ އެވެ.
ސިޓީގެ އިއްތިހާދު ސްޓޭޑިއަމްގައި ބުދަ ދުވަހުގެ ރޭ ކުޅުނު މެޗު ނިމުނީ، އެއްވެސް ޓީމަކަށް ލަނޑެއް ނުޖެހި އެވެ.
މެޗުގައި ސިޓީން ވަނީ ލަނޑު ޖެހުމަށް، އިންޓަގެ ގޯލަށް އަމާޒުކޮށް ގިނަ ހަމަލާތަކެއް ފޮނުވާލައިފަ އެވެ. ނަމަވެސް، ސިޓީ އަށް މެޗުގައި ލަނޑެއް ޖެހޭ ގޮތެއް ނުވި އެވެ. ސިޓީ ގައި މޮޅު ކުޅުމެއް ދައްކަމުން އަންނަ ނޯވޭގެ ފޯވާޑް، އާލިން ހާލަންޑަށް ވަނީ މެޗުގައި ލަނޑު ޖަހާނެ ފުރުސަތު ލިބިފަ އެވެ. އޭގެ އިތުރުން ޖަރުމަނުގެ އިލްކާއީ ގުންޑޮގާން އަދި އިންގްލެންޑުގެ ފިލް ފޮޑެން އަށް ވެސް ވަނީ ލަނޑު ޖަހަން ފުރުސަތު ލިބިފަ އެވެ.
ސިޓީއާ ދެކޮޅަށް ލަނޑު ޖަހަން އިންޓަ އިން ވެސް ވަނީ ފުރުސަތުތަކެއް ތަނަވަސްކޮށްފަ އެވެ. ބަދަލު ކުޅުންތެރިޔެއްގެ ގޮތުގައި ނިކުމެ ލައުޓާރޯ މާޓިނޭޒް ވަނީ ލަނޑު ޖެހުމަށް މަސައްކަތް ކޮށްފަ އެވެ. އަނެއްކޮޅުން އިންޓަގެ ހެންރިކް މިކިތަރްޔަން ވެސް ވަނީ ލަނޑު ޖެހުމަށް މަސައްކަތް ކޮށްފަ އެވެ.
ސިޓީން ވަނީ މީގެ ކުރިން 2023 ވަނަ އަހަރު ޗެމްޕިއަންސް ލީގު ކާމިޔާބު ވެސް ކޮށްފަ އެވެ. މިއީ މިދިޔަ ދެ އަހަރުގެ ތެރޭގައި، ސިޓީގެ އަމިއްލަ ދަނޑުގައި ކުޅުނު މެޗެއްގައި ލަނޑެއް ނުޖެހި އެއްވަރުވީ ފުރަތަމަ މެޗެވެ.
