އދ.ގެ އާންމު މަޖިލިސް (ޔޫއެންޖީއޭ)ގެ ބޮޑު އަޣުލަބިއްޔަތަކާއެކު، އެއް އަހަރު ދުވަހުގެ ތެރޭގައި ޣައިރު ޤާނޫނީ ގޮތުން އިޒްރޭލުން ހިފާފައިވާ ފަލަސްތީނުގެ ބިންތަކުން ފޭބުމަށް ޤަރާރެއް ފާސްކޮށްފިއެވެ.

ބުދަ ދުވަހު ކުރިއަށް ދިޔަ އާންމު މަޖިލީހުގައި ގަރާރަށް ނެގި ވޯޓުގައި، 124 ޤައުމަކުން މި ޤަރާރަށް ތާއީދުކޮށްފައި ވާއިރު، ވަކި ކޮޅަކަށް ވޯޓު ނުދޭ 43 ޤައުމު ހިމެނެއެވެ. އަދި 12 ޤައުމަކުން މި ޤަރާރާ ދެކޮޅަށް ވޯޓުދީފައިވެއެވެ.

ފަލަސްތީނުން ބުނެފައިވަނީ މިއީ "ތާރީޚީ ނިންމުމެއް" ކަމުގައެވެ.

"އިޒްރޭލުން ހިފާފައިވާ ފަލަސްތީނުގެ ބިންތަކުގައި ޣައިރު ޤާނޫނީ ގޮތުން ތިބުން ލަސްނުކޮށް ނިމުމަކަށް ގެންނަން ޖެހޭނެ ކަމަށާއި އަދި މިކަމުގެ ސަބަބުން ބައިނަލްއަޤްވާމީ ގޮތުން އިޒްރޭލުން އުފުލަންޖެހޭ ޒިންމާތަކާ އެއްގޮތްވާ ގޮތުގެ މަތިން ގިނަވެގެން 12 މަސް ދުވަހުގެ ތެރޭގައި މިކަން ކޮށް ނިންމަން" ގަރާރުގައި ގޮވާލާފައިވެއެވެ.

މީގެ އިތުރުން، އިޒްރޭލުން ބިންތަައް ހިސޯރުކޮށްގެން ތިބިތިބުމުގެ ސަބަބުން ފަލަސްޠީނުގެ ރައްޔިތުންނަށް ލިބިފައިވާ ގެއްލުންތަކަށް ބަދަލު ދިނުމަށް ވެސް ގަރާރުގައި އިޒްރޭލަށް ގޮވާލާފައިވެއެވެ.

އާންމު މަޖިލީހުން މި ޤަރާރު ފާސްކޮށްފައި މިވަނީ އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިޒްރޭލުން ހިފާފައިވާ ފަލަސްތީނުގެ ބިންތަކުގައި ތިބޭ ތިބުމަކީ ޣައިރު ގާނޫނީ ކަމެއް ކަމަށާއި އެކަން ނިމުމަކަށް އަންނަން ޖެހޭ ކަމަށް ދެކޭ ކަމަށް ބުނެ ރައުޔެއް ނެރެފައިވަނިކޮށްނެވެ.

ދެ ދައުލަތުގެ ހައްލެއް ހޯދުމަށް މަސައްކަތް ކުރާކަމަށް ބުނާ އެމެރިކާ، ބުދަ ދުވަހު ޔޫއެންޖީއޭގެ ޤަރާރާ ދެކޮޅަށް އިޒްރޭލާއެކު ވޯޓުދިންކަން ފާހަގަ ކުރެވެއެވެ. އޭގެ އިތުރުން ގަރާރާ ދެކޮޅަށް ވޯޓު ދީފައިވަނީ، ޗެކިއާ، ހަންގޭރީ، އާޖެންޓީނާ އަދި ބައެއް ކުދި ޕެސިފިކް ޖަޒީރާ ޤައުމުތަކުންނެވެ.

މި ޤަރާރު ހުށަހެޅީ އދ ގައި ދާއިމީ އޮބްޒާވަރ ދައުލަތެއްގެ ގޮތުގައި އޮތް ފަލަސްތީނުންނެވެ.

ފަލަސްތީނު އޮތޯރިޓީގެ ރައީސް މަޙްމޫދު އައްބާސް މި ޤަރާރަށް މަރުޙަބާ ވިދާޅުވެ، ދުނިޔޭގެ ޤައުމުތަކަށް ގޮވާލެއްވީ މި ޤަރާރަށް ތަބާވުމަށް އިޒްރޭލަށް ބާރުއެޅުމަށް ފިޔަވަޅުތައް އެޅުމަށެވެ.