ރައްޔިތުންގެ އިތުބާރު ލިބިފައިވާ ނިޒާމަކަށް ޖިނާއީ އަދުލުގެ ނިޒާމު ހަދާނަން: އައްބާސް
16 ސެޕްޓެމްބަރު 2024 | ހޯމަ 12:56ޖިނާއީ އަދުލުގެ ނިޒާމަކީ ޕްރޮސެކިއުޓަރ ޖެނަރަލް އޮފީހުގައި އެކަނި ހިމެނޭ ނިޒާމެއް ނޫން
ހޯމަ ދުވަހު ޖުޑިޝަރީ ކޮމެޓީގައި އައްބާސް ޝަރީފް ވާހަކަދައްކަވަނީ
ރައްޔިތުންގެ އިތުބާރު ލިބިފައިވާ ނިޒާމަކަށް ޖިނާއީ އަދުލުގެ ނިޒާމު ހަދާނެ ކަމަށް ރައީސް އޮފީހުގެ ސެކްރެޓެރީ ޓު ދަ ޕްރެޒިޑެންޓް އޮން ލީގަލް އެފެއާޒް އައްބާސް ޝަރީފް ވިދާޅުވެއްޖެއެވެ.
ޕްރޮސެކިއުޓާ ޖެނެރަލް (ޕީޖީ)ކަމުގެ މަގާމަށް އައްޔަންކުރަން ރައީސް ޑރ.މުހައްމަދު މުއިއްޒު ހުށަހަޅުއްވާފައިވަނީ އައްބާސްގެ ނަންފުޅު އެކަންޏެވެ. ހޯމަ ދުވަހު ޖުޑިޝަރީ ކޮމެޓީގައި ވަނީ އޭނާއާއި އިންޓަވިއު ކޮށްފައެވެ.
މި އިންޓަވިއުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން އައްބާސް ވިދާޅުވީ ޖިނާއީ އަދުލުގެ ނިޒާމަކީ ޕްރޮސެކިއުޓަރ ޖެނަރަލް އޮފީހުގައި އެކަނި ހިމެނޭ ނިޒާމެއް ނޫން ކަމަށެވެ. މިއީ ޕްރޮސެކިއުޓަރ ޖަނަރަލް އޮފީހުންގެ އިތުރުން ތަހުގީގީ އިދާރާތަކުން އަދި ކޯޓުތަކުގައި ހިމެނޭ ނިޒާމެއް ކަމަށެވެ.
އައްބާސް ވިދާޅުވީ ޕީޖީގެ މަގާމަށް އައްޔަން ކުރެވޭ ހިސާބުން ޕީޖީ އޮފީހުގެ ކަންތައްތައް ހުރި ގޮތް ރަނގަޅަށް ބަލައި ދިރާސާ ކުރުމަށްފަހު، ލިބިފައިވާ މައުލޫމާތުގެ އަލީގެ ހުރިހާ ސްކޭޓްހޯލްޑަރުންނާ މަޝްވަރާ ކުރެވޭނެ ކަމަށެވެ. ޕްރޮސެކިއުޓަރ ޖެނަރަލް އޮފީހަކީ އަދި ޚާއްސަކޮށް މި ނިޒާމަށް ގެއްލެމުންދާ އިތުބާރު ހޯދުމަށް މަސައްކަތް ކުރާނެ ކަމަށް އައްބާސް ވިދާޅުވިއެވެ. އަދި ވިދާޅުވީ ޕީޖީ އޮފީހަކީ އިންސާފުވެރިކަމާއެކު މަސައްކަތް ކުރާ، އަވަސް ޚިދުމަތެއް ލިބޭ ތަނަކަށް ހަދާނެ ކަމަށެވެ.
މީގެ އިތުރުން އައްބާސް ވަނީ އިޖުރާއަތުގެ ގާނޫނަށް ހުށަހަޅާފައިވާ އިސްލާހާއި ގުޅޭގޮތުން ވެސް ވާހަކަދައްކަވާފައެވެ. އޭނާ ވިދާޅުވީ އެ އިސްލާހުގެ ތެރެއިން ބެއިލް ސިސްޓަމަށް ކޮންމެވެސް ވަރެއްގެ ހައްލެއް ލިބޭނެ ކަމަށެވެ. ނަމަވެސް ބެއިލް ސިސްޓަމަށް އިތުރަށް ހަރުދަނާވެ ވަރުގަދަވެގެންދާނީ ވަކި ގާނޫނެއްގެ ތެރެއިން އެމަސައްކަތް ކޮށްގެން ކަމަށް އައްބާސް ވިދާޅުވިއެވެ. އެގޮތުން އެމަސައްކަތް ވެސް ކުރިއަށް އޮތްތަނުގައި ކުރާނެ ކަމަށް އޭނާ ވިދާޅުވިއެވެ.
ޕީޖީއެއްގެ ޒިންމާއަށް އަލިއަޅުއްވާލައްވާ އައްބާސް ވިދާޅުވީ މަގާމަކީ މަސްއޫލިއްޔަތު ބޮޑު މަގާމެއް ކަމަށާއި، މަގާމަށް އައްޔަން ވެއްޖެނަމަ ޒިންމާ އަދާކުރެއްވުމުގައި މީހެއްގެ މޫނަކަށް ނުބައްލަވާނެ ކަމަށާއި، މަސައްކަތް ކުރާނީ އިހުލާސްތެރިކަމާއެކު ކަމަށެވެ.
