ޣައްޒާ ގައި އިތުރު 26 މީހުން ޝަހީދު ކޮށް، ބައިތު ލަހިޔާ އިން މީހުން ފައިބަން އަމުރުކޮށްފި
އިޒްރޭލުން ޣައްޒާގައި ކުރަމުންދާ ހަނގުރާމައިގައި މަދުވެގެން 41،182 މީހުން މިހާތަނަށް ވަނީ ޝަހީދުވެފަ
ހޮނިހިރު ދުވަހު ޣައްޒާ ސިޓީގެ ޒައިތޫން މާޓިޔާސް ސްކޫލަށް އިސްރާއީލުން ދިން ވައިގެ ހަމަލާއަކަށްފަހު، ޒަޚަމްވި ފަލަސްތީނުގެ މީހުން އަސްގާޑިޔާގައި ހޮސްޕިޓަލަށް ގެންދަނީ
އިސްރާއީލީ ބާރުތަކުން ހޮނިހިރު ދުވަހު ޣައްޒާ ސްޓްރިޕްގެ އެކި ސަރަޙައްދުތަކަށް ދިން ހަމަލާތަކުގައި މަދުވެގެން 26 ފަލަސްޠީނު މީހުން ޝަހީދުވެއްޖެ ކަމަށް މީހުން ސަލާމަތްކުރުމުގެ މަސައްކަތުގައި ހަރަކާތްތެރިވާ ފަރާތްތަކުން ބުނެފިއެވެ.
ހޮނިހިރު ދުވަހުގެރޭ ޣައްޒާ ސްޓްރިޕްގެ މެދުތެރޭގައި ހުންނަ ނުސައިރާތު ރެފިއުޖީ ކޭމްޕްގެ ގެއަކަށް އިޒްރޭލުން ދިން ހަމަލާއެއްގައި މަދުވެގެން ތިން މީހުން ޝަހީދުވެ، އިތުރު މީހުންނަށް އަނިޔާވެފައިވާކަމަށް އަލްޖަޒީރާ އިން ބުނެއެވެ.
އިޒްރޭލު ސިފައިން ވަނީ އުތުރު ޣައްޒާގެ ބައިތު ލަހިޔާގެ ބައެއް ސަރަޙައްދުތަކުން އެތަންތާނގައި ދިރިއުޅޭ ފަލަސްޠީނު މީހުން ވަޒަން ދޫކޮށް ދިއުމަށް އަމުރުކޮށްފައެވެ.
މިއީ ޣައްޒާ އިޒްރޭލުގެ ބިމަށް އިތުރު ކޮށް އެ ބިމުގައި ޔަހޫދީން ވަޒަންވެރި ކުރުވުމަށް ހިންގާ ޖަރީމާއެއް ކަމަށް ފަލަސްތީނުގެ ޚާރިޖީ ވުޒާރާއިން ބުނެ ވަނީ އިންޒާރު ކޮށްފައެވެ.
އަނެއްކޮޅުން ލައްކައަކަށް ވުރެ ގިނަ މީހުން ތެލްއަވީވްގެ މަގުތަކަށް ނުކުމެ، މުޒާހަރާ ކޮށް ނަތަންޔާހޫގެ ސަރުކާރަށް ގޮވާލީ ހަމާސްއާއެކު އެއްބަސްވުމަކަށް އައިސް ޣައްޒާގައި ބަންދުކޮށްފައިވާ ބާކީ ތިބި އިޒްރޭލު މީހުން މިނިވަންކުރުމަށެވެ.
ފާއިތުވި ދެ ހަފްތާގައި ކޮންމެ ރެއަކު ކުރިއަށްދާ މުޒާހަރާތަކުގައި ހޮނިހިރު ދުވަހުގެ ރޭ މުޒާހަރާގެ ބައިވެރިންގެ ތެރެއިން 15 މީހުން އިޒްރޭލް ފުލުހުން ހައްޔަރުކުރި ކަމަށް އިޒްރޭލުގެ މީޑިއާ އިން ބުނެފައިވެއެވެ.
އިޒްރޭލުން ޣައްޒާގައި ކުރަމުންދާ ހަނގުރާމައިގައި މަދުވެގެން 41،182 މީހުން މިހާތަނަށް ވަނީ ޝަހީދުވެފައެވެ. 95،280 މީހުން ޒަޚަމްވެފައިވެއެވެ.
