މި ސަރުކާރުގެ ހަކަތައެއް ނެތް، ނަތީޖާއެއް ގޮތުން ބޭރުގެ ހޮސްޕިޓަލްތަކުން އާސަންދައިގެ ޚިދުމަތްތައް ވެސް ދަނީ ކަނޑާލަމުން: ޔާމީން

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގައި ހަކަތައެއް ނެތް ކަމަށާއި، ނަތީޖާއެއް ގޮތުން ބޭރުގެ ގައުމުތަކުގެ ހޮސްޕިޓަލްތަކުން އާސަންދައިގެ ޚިދުމަތް ކަނޑާލަމުންދާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގެ އޯޑިއަންސްގައި އިންނަވައި ޔާމީން ވިދާޅުވީ ދިވެހިން އާއްމުކޮށް ބޭސްފަރުވާ ޚިދުމަތް ހޯދަމުންދާ އިންޑިއާގެ ހޮސްޕިޓަލްތަކުން އާސަންދައިގެ ޚިދުމަތް ކަނޑާލަމުންދާ ކަމަށެވެ. އެ ހޮސްޕިޓަލްތަކުގެ މެނޭޖްމަންޓުން މި ނިންމުން ނިންމާނީ ބިލްތައް ނުދައްކާ ހުރުމުގެ ސަބަބުން ކަމަށް ޔާމީން ވިދާޅުވިއެވެ.

މިފާއިތުވެދިޔަ ހަފްތާ ތެރޭގައި ފިޗުން އައި މޫޑިސްއިން ރާއްޖެ ޑައުންގްރޭޑް ކުރިކަން ފާހަގަކުރައްވައި ޔާމީން ވިދާޅުވީ އިގްތިސާދީ ހާލަތު އޮތް ގޮތުން މިސަރުކާރުން އެ ބިލްތަކަށް ފައިސާ ދޭނެ ކަމަށް އުންމީދުނުކުރާ ކަމަށާއި، އެ އިތުބާރު ގެއްލިފައިވާ ކަމަށެވެ.

ޔާމީން ވިދާޅުވީ މިސަރުކާރުގެ ހަކަތައެއް އަދި އިގްތިސާދުގައި ހަކަތައެއް ނެތް ކަމަށެވެ. އަދި ވިދާޅުވީ އިންވެސްޓްމަންޓްތަކުން ފައިސާ ހޯދުމުގެ ގާބިލްކަން މިސަރުކާރުގެ ނެތް ކަމަށެވެ.

ޔާމީން ވިދާޅުވީ މި ސަރުކާރަށް އިތުބާރު ނެތް ކަމަށެވެ.

ނަތީޖާއެއް ގޮތުން މިއަދު ބޮންޑް އިޝޫ ކުރަމުން ގޮސް، ދިވެހި ބޭންކްތަކުން ބޮންޑު ނަގަން ބޭނުން ނުވާ ކަމަށާއި، ބޮންޑްތަކަށް ފައިސާ ނުދައްކާ ކަމަށް ޔާމީން ވިދާޅުވިއެވެ. އަދި ވިދާޅުވީ ސްކޫކު ގަތް މީހުން މިހާރު ބޭނުންވަނީ އެ ނުއަގުގައި އެ ދޫކޮށްލުމަށް ކަމަށެވެ.