ފުރަތަމަ ޕްރައިވެޓް ސްޕޭސްވޯކް ބިލިއަނަރަކާއި އިންޖިނޭރެއް ފުރިހަމަ ކޮށްފި

ބިލިއަނައަރަކާއި އިންޖިނޭރަކު ފުރަތަމަ ޕްރައިވެޓް ސްޕޭސްވޯކް ފުރިހަމަ ކޮށްފިއެވެ.

ބިލިއަނަރ ޖެރެޑް އިސާކްމަން އަދި ސްޕޭސްއެކްސް ގެ އިންޖިނިއަރ ސާރާ ގިލިސް ވަނީ ޖައްވީ ހިނގުމަށް ޚާއްޞަކޮށް ފަރުމާކުރެވިފައިވާ ސޫޓްގައި ބުރާސްފަތި ދުވަހު ސްޕޭސްއެކްސް އުޅަނދުން ބޭރަށް ނުކުމެ ޖައްވުގައި ހިނގާފައެވެ. މި ދެމީހުން ވަނީ ޖައްވުގައި 1 ގަޑިއިރާ 46 މިނެޓް ހޭދަކޮށްފައެވެ.

'ސްޕޭސްއެކްސް ޕޯލާރިސް ޑޯން މިޝަން" ގެ މަންޒަރުތައް ވަގުތުން ދައްކަމުން ދިޔަ ބުރާސްފަތި ދުވަހުގެ މި ތާރީޚީ އިވެންޓްގައި ޑްރެގަން ސްޕޭސް ކްރާފްޓުން ބޭރަށް ފުރަތަމަ ނުކުތީ ބިލިއަނަރު ޖެރެޑް އިސާކްމަންއެވެ. އޭނާ އުޅަނދުން ނުކުތްތާ 15 މިނެޓް ފަހުން ސާރާ ގިލިސް އުޅަނދުން ނުކުތް މަންޒަރު ފެނުނެވެ.  

އިސާކްމަން އުޅަނދުން ބޭރަށް ނުކުމެ "މިތަނުން ބަލާއިރު ދުނިޔެ ފެންނަނީ ވަރަށް ފުރިހަމަ ތަނެއްގެ ގޮތުގައި،" ކަމަށް ބުންޏެވެ.

މި ބާވަތުގެ ޖައްވީ ދަތުރުތަކަކީ މިހާތަނަށް ސަރުކާރުތަކުން ޚަރަދުކޮށްގެން އެސްޓްރޯނަޓުންނަށް އެކަނި ކުރެވޭ ކަމެއްގެ ގޮތުގައި އޮތް އޮތުން މި ދަތުރާ އެކު ބަދަލުވެފައި ވާއިރު، މި ދަތުރަށް ޚަރަދުކޮށްފައިވަނީ ދަތުރުގެ އެއް ބައިވެރިޔާ އިސާކްމަން ކަމަށް ރިޕޯޓްތައް ބުނެއެވެ.

ލައިވްކޮށް ދެއްކި ވީޑިއޯ އިން ފެންނަނީ ހުދުކުލައިގެ ޑްރެގަން ކެޕްސިއުލް އިން ދެ ކްރޫ މެންބަރުން ބޭރަށް ނުކުމެ، ތިރިން ނޫކުލައިން ފެންނަ ދުނިޔޭގެ 435 މޭލު (700 ކިލޯމީޓަރު) މަތިން ޖައްވުގެ ތެރޭގައި ހަރަކާތްތެރިވާ މަންޒަރެވެ. މިހާ އުހުގައި އަދި މިހާތަނަށް ސްޕޭސްވޯކް އެއް ކުރިއަށް ގެންދެވިފައި ނުވާކަމަށް ރިޕޯޓްތައް ބުނެއެވެ.

ރެސިލިއަންސް އުޅަނދު ދުނިޔެއިން ނައްޓާލީ ފްލޮރިޑާގެ ކެނެޑީ ސްޕޭސް ސެންޓަރުން އަންގާރަ ދުވަހު ސްޕޭސްއެކްސް ރޮކެޓެއްގައެވެ. އުޅަނދުގައި ހަތަރު ކްރޫ މެމްބަރުން ވަނީ ދަތުރުކޮށްފައެވެ.

މި މިޝަނުން ބުނެފައިވަނީ އުޅަނދު 870 މޭލު (1،400 ކިލޯމީޓަރު) އުހަށް ދަތުރުކުރާނެ ކަމަށެވެ. މިއީ ނާސާގެ އެޕޮލޯ ޕްރޮގްރާމް 1970 ގެ އަހަރުތަކުގައި ނިމުމަކަށް އައިފަހުން މިހާ އުހަށް ޖައްވީ އުޅަނދެއްގައި އިންސާނުން ދަތުރުކުރާ ފުރަތަމަ ފަހަރެވެ.

ނޮން-ޕްރޮފެޝަނަލް އެސްޓްރޯނަޓުން ޖައްވީ ދަތުރުތަކުގައި ބައިވެރިކުރުން އިތުރުކުރުމަށް އިސާކްމަން އަދި އީލޮން މަސްކް ފަދަ މަހުޖަނުން ބޭނުންވަނީ މިފަދަ ޕްރައިވެޓް ދަތުރުތައް އިތުރަށް ފުޅާ ކުރުމަށެވެ. އެހެން ނަމަވެސް މިފަދަ ދަތުރުތަކުގެ އަގުބޮޑު ކަމާއެކު އެދުވަސް އޮތީ އަދި ވަރަށް ދުރުގައި ކަމަށް ބެލެވެއެވެ.