އީރާނުގެ ބަދަލުހިފުމުގެ ރަހަ ވަރަށް އަވަހަށް އިޒްރޭލަށް ފެންނާނެ: ކޮމާންޑަރ އިން ޗީފް

އީރާނުގެ ބަދަލު ހިފުމުގެ ރަހަ ވަރަށް އަވަހަށް އިޒްރޭލަށް ފެންނާނެ ކަމަށް އީރާނުގެ އިސްލާމިކް ރެވޮލިއުޝަން ގާޑްސް ކޯޕްސް (އައިއާރްޖީސީ)ގެ ކޮމާންޑަރ އިން ޗީފް ވިދާޅުވެއްޖެއެވެ.

"މިއަދު މި ފެންނަނީ ޣައްޒާގެ ރައްޔިތުންގެ ހިތްވަރުގަދަކަން؛ އެއީ ވޭންދެނެވި ކަމެއްގެ ގޮތުގައި ފެނުނު ނަމަވެސް، ޣައްޒާގެ ރައްޔިތުންނަށް ކާމިޔާބީގެ މީރު ރަހަ ވަރަށް އަވަހަށް ލިބޭނެ އަދި އެމީހުން [އިޒްރޭލް މީހުން] ދާދި އަވަހަށް އެމީހުންގެ ނުބައިކަމުގެ ރަހަ ދެކޭނެ،" މޭޖަރ ޖެނެރަލް ހުސެއިން ސަލާމީ ބުދަ ދުވަހު ބޭއްވުނު ކޮންފަރެންސެއްގައި ވާހަކަފުޅު ދައްކަވަމުން ވިދާޅުވި ކަމަށް އީރާނުގެ ރަސްމީ ޓީވީން ބުނެފައިވެއެވެ.

އޭނާ ވިދާޅުވީ މިއަދު އީރާނަކީ "ވަރުގަދަ، ރައްކާތެރި އަދި ފަޚުރުވެރި ޤައުމެއް" ކަމަށާއި، އަނިޔާވެރިންނާ ވާހަކަދައްކަނީ ބާރުގެ ބަހުރުވައިން ކަމަށާއި، ބަހުން ނޫން ކަމަށެވެ.

"އަޅުގަނޑުމެން ދުޝްމަނުންނާ ދިމާލަށް ދާނަން އަދި އަދަބު ދޭނަން އަދި ބަދަލު ހިފާނަން. ދުޝްމަނުންނާ ދިމާލަށް ގޮސް އަދަބު ދިނުމާއި ބަދަލު ހިފުމަކީ ވޭތުވެދިޔަ 45 އަހަރުގެ ތެރޭގައި އަޅުގަނޑުމެން އެތައް ފަހަރު ތަޖުރިބާކޮށްފައިވާ ޙަޤީޤަތެއް،" އޭނާ ވިދާޅުވިއެވެ.

"އިސްލާމްދީނުގެ އަލިގަދަވެ، ކުރިއަރާ ދިޔަ ކޮންމެ ފަހަރަކު، ކާފަރުންނާއި، މުޝްރިކުންނާއި، މުނާފިޤުން މުސްލިމުންނާ ދެކޮޅަށް ތެދުވި، އަދި އޭގެ ނަތީޖާ އެއްގެ ގޮތުން ޖިހާދުގެ މައިދާން އުފެދުނު. މިއަދު ވެސް ވަކި ތަފާތެއް ނެތް،" އޭނާ ވިދާޅުވިއެވެ.

ޖެނެރަލް ހުސެއިން ސަލާމީ ވިދާޅުވީ އިސްލާމީ އުއްމަތް ދެމި އޮންނާނެ ކަމަށާއި މުސްލިމް ބިންތަކުން ބަލިވެގެން ލަދުން އާޚިރުގައި ފައިބައިގެންދާން ޖެހޭނީ އިސްލާމް ދީނުގެ ދުޝްމަނުން ކަމުގައެވެ. އޭނާ ވިދާޅުވީ އީރާނުގައިވެސް، އަފްޣާނިސްތާނުގައިވެސް އިރާގު އަދި ޔަމަނުގައިވެސް އަދި އެހެން ތަންތާނގައިވެސް ކަން ހިނގާފައިވަނީ އެ ބީދައިން ކަމުގައެވެ.

އީރާނުގެ ޖެނެރަލް މި ވާހަކަތައް ދެއްކެވީ ޖުލައި މަހުގެ ފަހުކޮޅު ތެހުރާނުގައި ހަމާސްގެ ލީޑަރު އިސްމާޢީލް ހަނިއްޔާ އިޒްރޭލުން އަވަހާރަކޮށްލުމާ ގުޅިގެން އީރާނުން ބަދަލު ހިފާނެކަމުގެ އިންތިޒާރުގައި ދުނިޔެ އޮތް ދަނޑިވަޅެއްގައެވެ. އީރާނުން ވަނީ ހަނިއްޔާ އަވަހާރަކޮށްލުމުގެ ބަދަލު ހިފާނެ ކަމަށް ވައުދުވެފައެވެ. ނަމަވެސް އީރާނުން ބުނީ އެކަން ކުރާނީ އީރާނަށް ފެންނަ ވަގުތެއްގައި ފެންނަ ތަނެއްގައި ކަމުގައެވެ.