އެއްވެސް ކުޅިވަރަކަށް ސިޔާސީ ނުފޫޒެއް ނުފޯރުވާނެ ކަމުގެ ޔަޤީންކަން، ކުޅިވަރާއި ހަށި ހެޔޮކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ) އާއި ކޮމިޝަނަރ އޮފް ސްޕޯޓްސް މުޙައްމަދު ޠަލާލް ދެއްވައިފި އެވެ.
ވަޒީރާއި ކޮމިޝަނަރު މިހެން ވިދާޅުވީ، ކުޅިވަރު ވުޒާރާ އިން ކުރަމުން އަންނަ މަސައްކަތުގެ ތަފުސީލު ހާމަކުރުމަށް އަންގާރަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގަ އެވެ. އެގޮތުން ކުޅިވަރު ސިޔާސީ ނުކުރާނެ ކަމުގެ ވައުދު ކޮންމެ ސަރުކާރަކުން ވެސް ވަމުން އަންނަ ކަމަށާއި، އެކަމަށް މަސައްކަތްކަތެއް ކުރާ ކަމަށް ނޫސްވެރިޔަކު ވަނީ ފާހަގަ ކޮށްފަ އެވެ. ޚާއްސަކޮށް ހިނގަމުންމިދާ އަހަރާއި، އަންނަ އަހަރަކީ ގިނަ ކުޅިވަރު އެސޯސިއޭޝަންތަކުގެ އިންތިޚާބު އޮންނަ އަހަރު ކަމަށްވާއިރު، ސަރުކާރުން ކުޅިވަރު ސިޔާސީ ނުކުރާނެ ކަމުގެ ކިހާ ޔަޤީންކަމެއް ދެއްވާނެތޯ ނޫސްވެރިޔާ ސުވާލު ކުރި އެވެ.
އެ ސުވާލަށް ޖަވާބު ދެއްވަމުން ވަޒީރު ރާފިޢު ވިދާޅުވީ، އެއްވެސް ކުޅިވަރު އެސޯސިއޭޝަނެއްގެ އެއްވެސް އިންތިޚާބަކަށް، ސަރުކާރުން އެއްވެސް ވަރަކަށް ނުފޫޒު ނުފޯރުވާނެ ކަމަށެވެ. އެކަން ފާހަގަ ކުރައްވައި ވަޒީރު ރާފިޢު ވިދާޅުވީ، އެސޯސިއޭޝަންތަކަކީ އަމިއްލަ ޒާތުގައި މަސައްކަތް ކުރަން ޖެހޭ ތަންތަން ކަމަށެވެ. އެހެން ނަމަވެސް، އެއްވެސް އެސޯސިއޭޝަނަކުން ޤާނޫނާއި ޤަވާއިދާ ޚިލާފަށް ކަމެއް ކުރާ ނަމަ، އެސޯސިއޭޝަންތަކުގެ ބެލެނިވެރި ފަރާތް ކަމަށްވާ، ކޮމިޝަނަރ އޮފް ސްޕޯޓްސް އިން އެކަމެއް ބަލާނެ ކަަމަށް ވެސް ވަޒީރު ވަނީ ވިދާޅުވެފަ އެވެ.
އަޅުގަނޑު ދަންނަވާލަން އޮތީ، އެއްވެސް ކަހަލަ ސިޔާސީ ނުފޫޒެއް، އެއްވެސް އެސޯސިއޭޝަނެއްގެ އިންތިޚާބަކަށް އަޅުގަނޑުމެން ނުފޯރުވާނަމޭ. އިނގޭތޯ! އެއީ އެސޯސިއޭޝަން އަކީ އޭގެ ހިންގުން ވެސް، އޭގެ ޒާތުގައި އަމިއްލަ މުއައްސަސާއެއްގެ ގޮތުގައި ކުރަން ޖެހޭ ކަމެއް.ޢަބްދުﷲ ރާފިޢު (ރާއްޕެ) / ކުޅިވަރާއި ހަށި ހެޔޮކަމާ ބެހޭ ވަޒީރު
މީގެ އިތުރުން ވަޒީރު ވިދާޅުވީ ރާއްޖޭގައި ހެދިފައިވާ އެސޯސިއޭޝަންތަކުން އަމަލު ކުރަން ޖެހޭނީ، ރާއްޖޭގައި ހެދިފައިވާ ޤާނޫނާއި، ޤަވާއިދުތަކާ އެއް ގޮތްވާ ގޮތުގެ މަތީން ކަމަށެވެ.
ވަޒީރުގެ އިތުރުން ސްޕޯޓްސް ކޮމިޝަނަރު ޠަލާލް ވެސް ވިދާޅުވީ މި ސަރުކާރުން ކުޅިވަރު ސިޔާސީ ނުކުރާނެ ކަމަށެވެ. ސަރުކާރު އުފެދިގެން މިހާތަނަށް އައިއިރު، ސިޔާސީ ގޮތުން އެއްވެސް މަންފާއެއް ހޯދުމުގެ ގޮތުން، ނުވަތަ ސިޔާސީ ގޮތުން އެއްވެސް ކަމެއް ކުރުމުގެ ގޮތުން އެސޯސިއޭޝަނެއް މެދުވެރިކޮަށް އަދި އެސޯސިއޭޝަނެއް ލައްވައި އެއްވެސް ކަމެއް ކުރުވާފައި ނުވާނެ ކަމަށް ވެސް ޠަލާލް ވިދާޅުވި އެވެ. އެކަމުގެ ޔަޤީންކަން ކުޅިވަރުގެ ދާއިރާގައި މަސައްކަތް ކުރާ އެންމެ ފަރާތްތަކަށް ވެސް އޮންނާނެ ކަމަށް ޠަލާލް ވިދާޅުވެފައިވެ އެވެ.
މީގެ އިތުރުން ޠަލާލް ވިދާޅުވީ ބައެއް އެސޯސިއޭޝަންތަކުގައި ޒަމާނުއްސުރެ ހުރި މައްސަލަތަކެއް ހައްލު ނުވެގެން މިއަދާ ހަމައަށް އައިސްފައިވާއިރު، މިއަދު ބަލަމުން އަންނަ ކަމަށާއި، އެކަންކަމާ ދެކޮޅަށް ފިޔަވަޅުތަކެއް އަޅަން ޖެހުނީމަ ނުވަތަ ޤަޥާއިދާ އެއް ގޮތަށް އަމަލު ކުރަން މަސައްކަތް ކުރަން ޖެހޭތީ އެ މަންޒަރު ފެންނަމުންދާ ކަމަށެވެ. އަދި މިއަދު ފެންމަތިވެގެން އުޅެނީ ޒަމާނުއްސުރެ ޙައްލު ނުވެ އޮތް އޮތުން ކަމަށް ވެސް ޠަލާލް ވަނީ ވިދާޅުވެފަ އެވެ.
ރާއްޖޭގެ ބައެއް ކުޅިވަރު އެސޯސިއޭޝަންތަކުގައި ވައްކަމާއި، ކޮރަޕްޝަންގެ މައްސަލަތައް ހުރި އިރު، އެކަންކަން ޙައްލު ކުރުމަށް ފިޔަވަޅުތަކެއް އެޅިފައެއް ނެތެވެ. ނަމަވެސް، މި ފަހުން ވަނީ ބައެއް އެސޯސިއޭޝަންތަކުގައި ހުރި މައްސަލަތައް ބަަލައި، އެކަންކަން ޙައްލު ކުރުމުގެ މަސައްކަތް ސްޕޯޓްސް ކޮމިޝަނުން ފަށައިފަ އެވެ.
