ރާއްޖޭގެ ސުކޫކުގެ އަގު ދަށްވީ މި ސަރުކާރުގެ ނާގާބިލްކަމާއި ދޯހަޅި ސިޔާސަތުގެ ސަބަބުން ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ވިދާޅުވެއްޖެއެވެ.
އެމްޑީޕީގެ ހަވަރުބެރު ޕެނަލް ޑިސްކަޝަންގައި ވާހަކަ ދައްކަވަމުން ނާޒިލް ވިދާޅުވީ ސުކޫކަކީ ދަރަނި ނެގުމުގެ އެންމެ ރައްކާތެރި ބަވަތުގެ ދަރަނިކަމަށް މުޅި ދުނިޔޭގެ ހުރިހާ ހިސާބަކުންވެސް ގަބޫލުކުރާ ކަމަށެވެ. އަދި މިހާތަނަށް ސުކޫކެއް ނަގާފައި ދުނިޔޭގެ އެއްވެސްތަނެއްގައި އެ ޑީފޯލްޓްވެފައި ވެސް ނެތް ކަމަށެވެ. ނާޒިލް ވިދާޅުވީ މިއީ ރައްކާތެރި ގޮތުގައި ނެގޭ ދަރަންޏެއް ކަމަށެވެ. ނަމަވެސް ރާއްޖޭގައި ނެގިފައި އޮތް ސުކޫކުގެ އަގުގެ މިންގަނޑު ކަނޑައަޅަނީ އިގްތިސާދުގެ ދުޅަހެޔޮކަމާއި ގެންގުޅޭ ގޮތަކާއެކީގައި ކަމަށެވެ.
ނަމަވެސް މިފަހަކަށް އައިސް ރާއްޖޭގެ ސްކޫކުގެ އަގު ދަށަށް ގޮސްފައިވަނީ ސަރުކާރުން ގެންގުޅޭ ސިޔާސަތުގެ ތެރެއިން ހާއްސަކޮށް ޑޮލަރުގެ ރިޒާވް ދަށްވުމުގެ ސަބަބުން ކަމަށެވެ. ނާޒިމް ވިދާޅުވީ މިއީ މި ސަރުކާރުގެ ނާގާބިލްކަމާއި ދޯހަޅި ސިޔާސަތުގެ ސަބަބުން ވެގެން އުޅޭ ކަމެއް ކަމަށެވެ.
އިކޮނަމީއަށް އަންނަ ބަދަލާއެކީގައި ދުނިޔޭގެ އެހެން ހުރިހާ އިދާރާތަކުން ގެންގުޅޭ ރާއްޖޭގެ އިގްތިސާދުގެ އަގު ދަށަށް ގޮސްފި. މިއާ ގުޅިގެން ސްކޫކުގެ އަގުވެސް ދަށަށް ގޮސްފައިވަނީ.ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް
ޕެނަލް ޑިސްކަޝަންގައި ވާހަކަ ދައްކަވަމުން ސްޓެލްކޯގެ ކުރީގެ މެނޭޖިންގ ޑިރެކްޓަރ، އަހުމަދު ޝަރީފް ސުކޫކަކީ އެންމެ އިތުބާރު ހިފޭ ގޮތުން ނަގާ ދަރަނިކަމަށެވެ. އަދި ރާއްޖޭގެ ސުކޫކު ލިސްޓް ކުރެވިފައިވަނީ އަބޫދާބީގެ ސްޓޮކް މާކެޓުގައި ކަމަށާއި، އެ ސްޓޮކް މާކެޓުންވެސް އާންމު ފަރާތްތަކަށް ސްކޫކު ވިއްކާނެ ކަމަށެވެ.
ޝަރީފް ވިދާޅުވީ ރާއްޖޭގެ އިގްތިސާދީ ހާލަތު ދަށްވެ، ރާއްޖޭގެ ކްރެޑިޓް ރޭޓިންގ ދަށްވުމާއި ގުޅިގެން ސުކޫކު ގަނެފައި ތިބި މީހުން ނުއަގުގައި ސްކޫކު ވިއްކަން ފެށި ކަމަށެވެ.
ސުކޫކުގެ އަގު ދަށްވެގެން އުޅެނީ ކީއްވެގެންތޯ؟ މައިގަނޑު ގޮތެއްގައި ދަށްވާ ސަބަބަކީ އަޅުގަނޑުމެންގެ ކްރެޑިޓް ރޭޓީން، ދަރަނި ދައްކާނެ ގާބިލުކަން ނެތްކަން ބައިނަލްއަގުވާމީ ފައިނޭންޝިއަލް އިންސްޓިޓިއުޝަންތަކުން ހާމަކުރަމުންދިއުން. ރާއްޖޭގެ އިގްތިސާދު ނުވަތަ ދަރަނި ދެއްކުމުގެ ގާބިލްކަން ދަށްވެގެން އުޅެނީ ކީއްވެތޯ ބަލަންޖެހޭ. އެންމެ ބޮޑު ލޮޅުމެއް އައީ ކޮވިޑްގައި. ކޮވިޑާއެކީގައި އެމްޑީޕީގެ ސަރުކާރުގައި އައީ ރަޝިއާ ޔޫކްރޭން ހަނގުރާމަ. ފަތުރުވެރިން މަދުވެގެން ދިޔަ. މިއީ އިގްތިސާދީ ހަޔާތުގައި އައި އެންމެ ބޮޑު ލޮޅުން. މިއާއެކުވެސް އިގްތިސާދު އަޑިއަށް ދިޔަ ދިއުން ވެރިކަން ނިމުނު އިރު ކުރިން ހުރިވަރަށް ގެނެސްފައިވާނެ.ސްޓެލްކޯގެ ކުރީގެ މެނޭޖިންގ ޑިރެކްޓަރ، އަހުމަދު ޝަރީފް
ރާއްޖެ ދަރަނިވެރި ވެދާނެ ކަމުގެ ބިރަށް ދިވެހި ރާއްޖޭގެ ސްކޫކް ބޮންޑަށް އިންވެސްޓް ކުރި ފަރާތްތަކުން ހާސްވެ، ވީ ގޮތަކުން އަވަހަށް ބޮންޑް ވިއްކާލަން އުޅޭ ފަރާތްތައް ފާއިތުވި ދެތިން ހަފްތާގައި ވަރަށް ބޮޑަށް އިތުރުވެއްޖެ ކަމަށް މަޝްހޫރު ބްލޫމްބާގް ނޫހުން ބުނެފައިވަނީ މި މަހުގެ 4 ވަނަ ދުވަހުއެވެ.
އެމެރިކާ ޑޮލަރުން މައިގަނޑު ގޮތެއްގައި މުއާމަލާތްތައް ހިނގާ ރާއްޖޭގެ ސްކޫކް ނުވަތަ އިސްލާމިކް ބޮންޑްގެ އަގު ވަނީ މިދިޔަ ހަފްތާގައި ޑޮލަރަކަށް 70 ސެންޓަށްވުރެ ދަށަށް ގޮސްފައެވެ. މިއީ މިހާތަނަށް ރެކޯޑު މިންވަރަކަށް ދަށް އަގެއް ކަމަށް ބްލޫމްބާގް އިން ބުނެއެވެ.
ބޮންޑުގެ އަގު މި މަހުގެ ތެރޭގައި ވެއްޓިފައިވާ މިންވަރަށް ބަލާއިރު، ބްލޫމްބާގް އިން ބުނެފައިވަނީ ރާއްޖޭގެ ސްކޫކް ވެފައިވަނީ "ބްލޫމްބާގް އީ.އެމް ސޮވްރިން ޓޯޓަލް ރިޓާން އިންޑެކްސްގައި" އެންމެ ދަށްކޮށް ޕާފޯމް ކުރާ ބޮންޑް ކަމުގައެވެ.
