ޣައްޒާ ގައި ތައުލީމީ އައު އަހަރުގެ ކިޔެވުން ފަށާ ތަރީޚުގެ ގޮތުގައި ސެޕްޓެމްބަރު 9 ވާ ހޯމަ ދުވަސް ކަނޑައަޅާފައި ވީނަމަވެސް 630،000 ށް ވުރެ ގިނަ ދަރިވަރުންނަށް ސްކޫލަށް އެނބުރި ދެވެނޭ ގޮތެއް ނެތް ކަމަށް އޮފިޝަލުން ހާމަ ކޮށްފިއެވެ.

އިޒްރޭލުން ޣައްޒާ އަށް އަރާ ހިންގަމުންދާ ހަނގުރާމައިގައި ޣައްޒާގެ ތައުލީމީ ވަސީލަތްތަކާއި މުޅި ނިޒާމު ފުނޑުފުނޑުވެ ދަރިވަރުން ކިޔަވަން ނުގޮސް ތިބެން މަޖުބޫރުވެފައިވާތާ މިއީ ދެވަނަ އަހަރެވެ.

ހޯމަ ދުވަހު ޣައްޒާ ސްޓްރިޕްގެ ބުރެއިޖް ރެފިއުޖީ ކޭމްޕްގެ ގެޔަކަށް ހަމަލާދީ ހަތަރު މީހުން ޝަހީދު ކޮށްލައިފި ކަމަށް އަލް ޖަޒީރާ އިން ބުނެފިއެވެ.

އާދިއްތަ ދުވަހު ފަލަސްތީނުގެ ސިވިލް ޑިފެންސްއިން ބުނެފައިވަނީ، ޣައްޒާގެ މެދުތެރޭގައި ހުންނަ ނުސައިރަތު ރެފިއުޖީ ކޭމްޕުގައި ހުރި ގެއަކަށް އިސްރާއީލުން ދިން ވައިގެ ހަމަލާއަކާ ގުޅިގެން ޝަހީދުވި 3 މީހެއްގެ ހަށިގަނޑު ފެނިފައިވާ ކަމުގައެވެ. ސިއްހީ އޮފިޝަލުންނަށް ހަވާލާދީ ވަފާ ނިއުސް އޭޖެންސީން ބުނެފައިވަނީ މަދުވެގެން 7 މީހަކަށް މި ހަމަލާގައި އަނިޔާވެފައިވާ ކަމަށެވެ. އާދީއްތަ ދުވަހުގެ ހަވީރު، ޣައްޒާ ސިޓީގެ ތުއްފާހު ސަރަހައްދަށް ދިން ހަމަލާއެއްގައި ފަލަސްތީނުގެ ކުޑަކުއްޖަކު ޝަހީދުވެފައިވެއެވެ.

ހުއްޓުމެއްނެތި ބޮން އަޅަމުން ދިޔުމުގެ ސަބަބުން ޣައްޒާގެ މެދުތެރޭ އަދި ދެކުނުގެ ސަރަހައްދުތަކުން އިންޓަނެޓްގެ ޚިދުމަތް ކެނޑިފައިވާ ކަމަށް ޚިދުމަތް ފޯރުކޮށްދޭ ޕެލްޓެލް އާ ހަވާލާދީ ވަފާ ނިއުސް އޭޖެންސީން ބުނެފައިވެއެވެ.

އަނެއަކޮޅުން، އުރުދުން އާއި ހުޅަނގު އައްސޭރި އާ ގުޅުވާލަދޭ ކިންގް ހުސެއިން ބްރިޖް ބަންދުކޮށްފައި އޮތުމަށްފަހު ހޯމަ ދުވަހު ހެދުނު އަލުން ހުޅުވޭނެ ކަމަށް އަލްޖަޒީރާ އިން ބުނެފިއެވެ. މި ބްރިޖް ބަންދުކުރީ ޖޯޑްންގެ ރައްޔިތަކު ބަޑިން ހަމަލާދީ އެ ސަރަހައްދު ބަލަހައްޓަން ތިބި އިޒްރޭލުގެ 3 ގާޑުން މަރާލުމާ ގުޅިގެންނެވެ.

  އިޒްރޭލުން ޣައްޒާއަށް ދޭ ހަމަލާތަކުގައި މިހާތަނަށް ޝަހީދުވި މީހުންގެ އަދަދު 40،972 ށް ވަނީ އަރާފައެވެ. އަދި ހަމަލާތަކުގައި 94،761 މީހުން ވަނީ ޒަޚަމްވެފައިވެއެވެ.