ޔުއެފާ ނޭޝަންސް ލީގު އޭގެ، ގްރޫޕް އެކެއްގައި ކްރޮއޭޝިއާ އިން ޕޮލެންޑާ ދެކޮޅަށް ކުޅުނު މެޗުން މޮޅުވެއްޖެ އެވެ.

އާދިއްތަ ދުވަހުގެ ރޭ ކުޅުނު މެޗު ކްރޮއޭޝިއާ އިން ކާމިޔާބު ކުރީ 1-0 އިންނެވެ. މެޗުގައި ކްރޮއޭޝިއާ އިން ލަނޑު ޖެހީ ވެސް ފަހު ހާފުގަ އެވެ.

ފުރަތަމަ ހާފުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތު ލިބިފަަ އެވެ. ޕޮލެންޑަށް ލަނޑު ޖަހަން އެންމެ ރަނގަޅު ފުރުސަތެއް ލިބުނީ ރޮބާޓް ލެވަންޑޯސްކީ އަށެވެ. މެޗުގައި ކްރޮއޭޝިއާ އިން ލަނޑު ޖެހީ، ފަހު ހާފު ފަށައިގެން ހަތް ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ކެޕްޓަން ލޫކާ މޮޑްރިޗް އެވެ. މޮޑްރިޗް އެ ލަނޑު ޖެހީ ޕޮލެންޑުގެ އޭރިޔާ ކައިރިން ލިބުނު ހިލޭ ޖެހުމެއްގައި ބޯޅަ ގޯލަށް ވައްދާލައިގެންނެވެ. އޭގެ ފަހުން ވެސް ޕޮލެންޑަށް ވަނީ މެޗުގެ ނަތީޖާ ހަމަހަމަ ކުރާނެ ފުރުސަތު ލިބި، ބޭކާރުވެފަ އެވެ.

މި ގްރޫޕުގައި މިހާތަނަށް ކުޅުނު ދެ މެޗުގެ ތެރެއިން، އެއް މެޗުން މޮޅުވެ ތިން ޕޮއިންޓާއެކު ކްރޮއޭޝިއާ އޮތީ ދެ ވަނައިގަ އެވެ. ހަމަ އެ އަދަދަށް މެޗު ކުޅެގެން، އެއް މެޗުން މޮޅުވެ ޕޮލެންޑަށް ވެސް ލިބެނީ ތިން ޕޮއިންޓެވެ. ހެޑް ޓު ހެޑް އިން ކުރި ހޯދަނީ ކްރޮއޭޝިއާ އެވެ. ކްރޮއޭޝިއާގެ ތިން ވަނަ މެޗުގައި އެ ޓީމު ނިކުންނާނީ ސްކޮޓްލެންޑާ ދެކޮޅަށެވެ. ޕޮލެންޑުގެ ތިން ވަނަ މެޗުގައި އެ ޓީމު ނިކުންނާނީ ޕޯޗުގަލްއާ ދެކޮޅަށެވެ.