ރާއްޖޭގައި މިހާރު ކުރިއަށްދާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) އަންހެން ވޮލީ ބޯޅަ ޗެލެންޖު ކަޕްގައި ރާއްޖެ އިން ކުޅުނު ތިން ވަނަ މެޗުގައި ކިރްގިސްތާން އަތުން ބަލިވެއްޖެ އެވެ.

ޒުވާނުންގެ މަޒުކަޒުގެ އެތެރޭ ކޯޓުގަައި އާދިއްތަ ދުވަހުގެ ރޭ ކިރްގިސްތާނާ ދެކޮޅަށް ނިކުތްއިރު، ރާއްޖެ ވަނީ މުބާރާތުގެ ލީގު ބުރުގައި ކުޅުނު ފުރަތަމަ ދެ މެޗު ވެސް ކާމިޔާބު ކޮށްފަ އެވެ. ކިރްގިސްތާން ވެސް ވަނީ ލީގު ބުރުގައި ކުޅުނު ފުރަތަމަ ދެ މެޗު ކާމިޔާބު ކޮށްފަ އެވެ. އެހެންކަމުން ލީގު ބުރުގެ އެއް ވަނައިގައި ސެމީ ފައިނަލްގެ ފުރުސަތު ލިބެން އޮތީ، އެ މެޗުން މޮޅުވާ ޓީމަކަށެވެ. ރާއްޖޭގެ މައްޗަށް ކިރްގިސްތާނުން ކުރި ހޯދީ ސީދާ ތިން ސެޓުންނެވެ.

މެޗުގެ ފުރަތަމަ ސެޓު ކިރްގިސްތާނުން ކާމިޔާބު ކުރީ 31-29 އިންނެވެ. ވާދަވެރި ކުޅުމެއް ފެނުނު ފުރަތަމަ ސެޓު ނިންމަން ރާއްޖެ އަށް ފުރުސަތު ވެސް ލިބުނެވެ. އެހެން ނަމަވެސް، ރާއްޖެ އަށް ސެޓު ނިންމަން ލިބުނު ފުރުސަތުގެ ބޭނުމެއް ނުކުރެވުނެވެ. ދެ ވަނަ ސެޓު ކިރްގިސްތާނުން ކާމިޔާބު ކުރީ 25-16 އިންނެވެ. ނަމަވެސް، ތިން ވަނަ ސެޓުގައި އަނެއްކާ ވެސް ރާއްޖެ އިން ކުޅުން ރަނގަޅުކޮށް، މި ސެޓުގައި ރަނގަޅު ވާދައެއް ކުރި އެވެ. ނަމަވެސް ފަހު ވަގުތު ލިބުނު ފުރުސަތުގެ ބޭނުން ހިފައި، ކިރްގިސްތާނުން ތިން ވަނަ ސެޓު ކާމިޔާބު ކުރީ 25-23 އިންނެވެ.

ލީގު ބުރުގެ ކުޅުން ނިމި، ދެން އޮންނާނީ ސެމީ ފައިނަލްގެ މެޗުތަކެވެ. ލީގު ބުރުގެ އެއް ވަނަ ހޯދި ކިރްގިސްތާން، ސެމީ ފައިނަލްގައި ނިކުންނާނީ ލީގު ބުރުގެ ފުލަށް ދިޔަ އަފްޣާނިސްތާނާ ދެކޮޅަށެވެ. ލީގު ބުރުގެ ދެ ވަނައިގައި ރާއްޖެ އިން ސެމީ ފައިނަލްގައި ނިކުންނާނީ، ތިން ވަނަ އަށް ދިޔަ ތަޖަކިސްތާނާ ދެކޮޅަށެވެ.