‎މަގުމަތީގެ ސަލާމަތަށް ފުލުހުން އިތުރު ފިޔަވަޅުތަކެއް އަޅައިފި

މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ދިވެހި ފުލުހުންގެ ޚިދުމަތުން އިތުރު މަސައްކަތްތަކެއް ފަށައިފިއެވެ.

މިގޮތުން މާލެ އާއި ހުޅުމާލޭގެ އެކި ސަރަހައްދުތަކުގައި ވެހިކަލް ޗެކްޕޮއިންޓްތައް ގާއިމުކޮށް، އުޅަނދުފަހަރު ބަލައި ފާސްކުރުމުގެ މަސައްކަތް ފުލުހުން ވަނީ ފަށާފައެވެ.

ފާއިތުވި ދުވަސްތަކުގައި މަގުމަތީގައި ހިނގާ އެކްސިޑެންޓްތައް އިތުރުވެ، އެތައް ބައެއްގެ ފުރާނަ ގެއްލިފައިވާއިރު، މިކަމަށް ޙައްލެއް ހޯދުމަށް ގިނަ ފިޔަވަޅުތަކެއް މިދިއަ ހުކުރު ދުވަހު ސަރުކާރުން ވަނީ އަޅާފައެވެ.

"މިހާރު ގެންދަނީ މަގުމަތީގެ ރައްކާތެރިކަމަށް ޚާއްޞަ ސަމާލުކަމެއް ދިނުމަށް ރައްޔިތުންނަށް ނަސޭހަތްތެރިވެ، ހޭލުންތެރިކަން އިތުރުކުރުމުގެ މަސައްކަތް ކުރަމުން," މީޑިއާ ގްރޫޕްގައި ފުލުހުން ހިއްސާކުރި މައުލޫމާތުގައި ބުނެފައިވެ އެވެ.

އަދި އުޅަނދު ބޭނުންކުރުމުގެ ކުރިން ރައްކާތެރިކަމުގެ ގޮތުން ފުރިހަމަ ކުރަންޖެހޭ އެންމެހާ ކަންކަން ފުރިހަމަކުރުމަށް ފުލުހުން ވަނީ އާންމުންނަށް އިލްތިމާސްކޮށްފައެވެ.

މި މަސައްކަތްތަކުގެ ސަބަބުން މަގުމަތީގެ ސަލާމަތާއި ރައްކާތެރިކަން އިތުރުވެ، އެކްސިޑެންޓްތަކާއި މަރުގެ ހާދިސާތައް މަދުވާނެ ކަމަށް ބެލެވެއެވެ.