ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ އެޑްވައިޒަރު އަދި މަޝްހޫރު ވިޔަފާވެރިވެރިޔާ މުޙައްމަދު އަލީ ޖަނާޙު އަށް ހުޅުމާލެ އިން ބޮޑު ބިމެއް ދީފި އެވެ.

ޖަނާހު އަކީ، މިދިޔަ އަހަރުގެ ނޮވެމްބަރު މަހު ވެރިކަމާ ހަވާލުވެވަޑައިގެންނެވި ރައީސް ޑރ މުޙައްމަދު މުޢިއްޒުގެ ޕްރިންސިޕަލް އެޑްވައިޒަރު ޓު ދަ ޕްރެޒިޑެންޓް އޮން ޓްރޭޑް އެންޑް އިންވެސްޓްމަންޓްގެ މަގާމުގައި ހުންނެވި ބޭފުޅާ އެވެ. މައުލޫމާތު ލިބިފައިވާ ގޮތުގައި ޖަނާހު އަށް ހުޅުމާލެ އިން ދީފައި ވަނީ ގާތްގަނޑަކަށް 100،000 (އެއް ލައްކަ) އަކަފޫޓުގެ ބިމެކެވެ. ހުޅުމާލޭގައި ހުންނަ އުރީދުގެ އިމާރާތާ ޖެހިގެން އޮންނަ އެ ބިމަކީ ގާތްގަނޑަކަށް 300،000 (ތިން ލައްކަ) އަކަފޫޓުގެ ބިމެކެވެ.

"ރާއްޖެ އެމްވީ" އަށް މައުލޫމާތު ލިބިފަައިވާ ގޮތުގައި ހުޅުމާލެ އިން ޖަނާހު އަށް ދީފައިވާ އެ ބިމުގައި އަޅަން ނިންމާފައި ވަނީ މޯލް އަކާއި، ކޮންވެންޝަން ސެންޓަރަކާއި، އަދި ރިއަލް ސްޓޭޓް ޑިވެލޮޕްމަންޓުގެ ތަންތަނެވެ. މި ނޫހަށް ކަށަވަރުވެފައިވާ ގޮތުގައި އެ މަސައްކަތް ކުރަނީ ޤަތަރުގެ އެފަދަ މަސައްކަތް ކުރާ ބޮޑު ކުންފުންޏަކުންނެވެ.

އެކަމާ ގުޅޭ ގޮތުން މައުލޫމާތު ސާފު ކޮށްލުމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) މެނޭޖިން ޑައިރެކްޓަރު އިބްރާހީމް ފަޒުލް ރަޝީދަށް ގުޅާލުމުން ފޯނަށް ޖަވާބު ނުދެއްވާތީ، މިކަމާ ގުޅޭ އިތުރު މައުލޫމާތެއް ސާފުވާ ގޮތް ވަނީ ނުވެފަ އެވެ.