ރައްޔިތުން މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ދެއްވާ އިރުޝާދުގެ ދަށުން ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރު ސައިޒް ކުރާނެ ކަމަށް އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި އެމްޑީޕީ ހަރުގެ ޖަލްސާގައި މޫކޭ ވިދާޅުވީ މި ސަރުކާރުގެ ބޭފުޅުން ދައްކަވަނީ ހުސް ވާހަކަ ކަމަށާއި، ލާ ހިފޭ، ފެން ހިފޭ އެއްވެސް ކަމެއް ނުކުރައްވާ ކަމަށެވެ.

މޫކޭ ވިދާޅުވީ މި ވެރިކަމުގައި ގައުމު ކުރިއަށްދަނީ އެކޮޅުކޮޅުން ކަމަށާއި، ރައްޔިތުންގެ ވިންދާ އިދިކޮޅަށް ކަމަށެވެ. ތަރައްގީގެ އެއްވެސް މަޝްރޫއު ކުރިއަށް ނުގެންދާ ކަމަށާއި، ރާއްޖެ ހުއްޓިފައިވާ ކަމަށް މޫކޭ ވިދާޅުވިއެވެ. އަދި ވިދާޅުވީ ގައުމު ރަނގަޅު މިސްރާބަށް ގެންދިއުމަށް މިސަރުކާރުގެ ރަނގަޅު ވިސްނުމެއް، ރޭވުންތެރިކަމެއް ނެތް ކަމަށެވެ.

ރައީސް މުއިއްޒު ވެރިކަމަށް ވަޑައިގެންނެވުމަށް ދެއްކެވި ވާހަކަފުޅުތަކާއެކު މިހާރު ހުންނެވީ ފިތިފައިކަން ފާހަގަކުރައްވައި މޫކޭ ވިދާޅުވީ މިވެރިކަމާ ގުޅޭގޮތުން ރައީސް މުއިއްޒުގެ އެންމެ އަރިސް އެއްބޭފުޅާ، އަބްދުއްރަހީމް ވަރަށް ގިނަ ލަފާއާއި އިރުޝާދު ދެއްވާ ކަމަށެވެ. އަދި އަބްދުއްރަހީމްގެ އިރުޝާދުގެ ދަށުން މިސަރުކާރު ސައިޒް ކުރާނެ ކަމަށާއި، އެމަސައްކަތްތައް ކުރަމުންދާ ކަމަށް މޫކޭ ވިދާޅުވިއެވެ.

މޫކޭ ވިދާޅުވީ އެމްޑީޕީން މަސައްކަތް ކުރަނީ ރައްޔިތުންނާ ގައުމުގެ ކުރިމަގަށް ބެލުމަށްފަހު ކަމަށެވެ.

މޫކޭ ވިދާޅުވީ އެމްޑީޕީގެ ސަރުކާރުގައި އިންޑިއާ ސިފައިންނާ ގުޅޭގޮތުން އަދި ރާއްޖޭގެ ކަނޑުގެ ސަރަހައްދުގެ ބައެއް ވިއްކާލި ކަމަށް ތުހުމަތުކޮށް، ރައްޔިތުން ބިރު ގަންނަ މިންވަރަށް ރައީސް މުއިއްޒު ސަރުކާރުގެ ބޭފުޅުން ދޮގު ހަދާފައިވާ ކަމަށެވެ. އަދި ވިދާޅުވީ މިއަދު އެބޭފުޅުންނަށް އެދޮގު ތަކުން ނުނެއްޓެވޭ ކަމަށާއި، އަދިވެސް މަސައްކަތް ކުރަނީ ރައްޔިތުންނަށް އޮޅުވާލުމަށް ކަމަށެވެ.