ފެނިގެންދަނީ ރައީސް ހައްދަވާ ދޮގު ފޮރުވަން ދެންތިބި މީހުން ހާސް ދޮގުހަދާތަން - ޒިޔާދު

މިހާރު ފެނިގެންދަނީ ރައީސް ހައްދަވާ ދޮގު ފޮރުވަން ސަރުކާރުގައި ދެންތިބި މީހުން ހާސް ދޮގުހަދާތަން ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ޒިޔާދު ވިދާޅުވީ އެންމެ ކަންބޮޑުވާ ކަންތަކަކީ، ރައީސް ޑރ. މުހައްމަދު މުއިއްޒު ހައްދަވާ ދޮގު، ތެދުކުރަން މުޅި ސަރުކާރު ތެދުނުވާ އެންމެ ފަހަރަކުވެސް ނެތް ކަމަށެވެ. ދޮގެއް ހަދައިދިފިއް އެ ދޮގު ފޮރުވަން ހާސް ދޮގު ހަދަންޖެހޭ ކަމަށެވެ. ސަރުކާރުން ފެންނަނީ އެ މަންޒަރު ކަމަށާއި، ކަންކަން ކުރައްވަމުން ދަނީވެސް އެމޭރުމުން ކަމަށެވެ.

މެންބަރު ޒިޔާދު ވިދާޅުވީ މި ސަރުކާރުގައި ހިމެނޭ މީހުންގެ މެދުގައި ކުރިއަށްދަނީ މުބާރާތެއް ކަމަށެވެ. ރައީސް ކަމެއް ކުރައްވައިފިއްޔާ އެންމެ ކުރިން އެވާހަކަ ދެއްކެނީ ކާކަށްތޯ މަސައްކަތް ކުރާ ކަމަށެވެ. އަދި ވަޒީރުން ބާއްވާ ނޫސްވެރިންގެ ބައްދަލުވުމުގައި އެއްވަޒީރަކަށްވުރެ އަނެއް ވަޒީރު އުޅުއްވީ ރައީސްގެ މޮޅު ވާހަކަދެއްކެވުމުގައި ކަމަށެވެ. ޒިޔާދު ވިދާޅުވީ މަޖްލިސް މެންބަރުންވެސް އުޅުއްވަނީ އެގޮތަށް ކަމަށާއި، އެންމެ ފުރަތަމަ ޓްވީޓްކޮށްފައި ސްކްރީންޝޮޓް ރައީސްއަށް ފޮނުއްވަނީ ކާކަށްތޯވެސް ބައްލަވާ ކަމަށެވެ.

ޑޮލަރުގެ މައްސަލައަކީ އިއްޔެއަކު މިއަދަކު ދައްކަމުން އަންނަ ވާހަކައެއް ނޫން ކަަމަށާއިމ ފެށުނީއްސުރެއް ބީއެމްއެލްއިން ދައްކަމުން އަންނަ ވާހަކައެއް ކަމަށް މެންބަރު ޒިޔާދު ވިދާޅުވިއެވެ. އެމްއެމްއޭއިންނާއި މަޖިލީހުގެ އިތުރުން ބީއެމްއެލްގެ ބޯޑު މެންބަރުންވެސް އެ ވާހަކަ ދައްކާފައިވާ ކަމަށެވެ. އަދި މި ހުރިހާކަމެއް މިގޮތަށް އައިސްފައިވާއިރު ޑޮލަރުގެ ކަންތަކުގައި ނިންމެވި ނިންމުމާއި ގުޅިގެން ބޮޑު އިމްޕެކްޓެއް އަންނާނެކަމަށް ރައީސްވެސް ގަބޫލުނުކުރައްވާ ކަމަށެވެ.

ބީއެމްއެލްއިން ބަގާވާތެއް ކުރަން އުޅުނުކަމަށް ބުނެ ރައީސް މުއިއްޒު ވަނީ ޕީއެންސީގެ ޖަގަހަ ޖަލްސާފައި އެވާހަކަ ދައްކަވާފައެވެ. އަދި އެއީ ސަރުކާރު ވައްޓާލަން ކުރިކަމެއް ކަމަށް އެމަނިކުފާނު ވިދާޅުވެފައިވާއިރު، ސޯޝަލް މީޑިއާގައި ސަރުކާރު ވައްޓާލަން ބޮޓް އެކައުންޓްތަކެއް ގޮވި މައްސަލަ ފުލުހުން އަންނަނީ ބަލަމުންނެވެ.