ރައީސް ޔާމީން އަމިއްލަ އަށް ދަންޖެހި މަރުވީ ކަމަށް ދައްކައިދިނުމުން ޑރ. މުއިއްޒު އަށާއި އަބްދުއްރަހީމަށް މިލިއަނުން ފައިސާ ހުށަހެޅި
2 ސެޕްޓެމްބަރު 2024 | ހޯމަ 18:37މޯލްޑިވްސް ޕޮލިސް ސަރވިސް އިން 2018 ވަނަ އަހަރު ސޮއިކޮށް ނެރެފައިވާ ރިޕޯޓްގައި މިވާހަކަ އޮތް ކަމަށް ހުސެއިން ވިދާޅުވި
ރައީސް އަބްދުﷲ ޔާމީން ކޯޓު އަޑު އެހުމެއްގައި
ރައީސް ޔާމީން އަމިއްލަ އަށް ދަންޖެހި މަރުވީ ކަމަށް ދޭހަވާގޮތަށް ދައްކައިދިނުމުން މުއިއްޒު އަށާއި އަބްދުއްރަހީމަށް މިލިއަނުން ފައިސާ ހުށަހެޅި ކަމަށް ކުރީގެ ކޮމިޝަނަރ އޮފް ޕޮލިސް ހުސެއިން ވަހީދު ހާމަ ކުރައްވައިފިއެވެ.
ޕީއެންއެފް ޖަލްސާގައި ހޯމަ ދުވަހުގެ ރޭ ވާހަކަ ދައްކަވަމުން ހުސެއިން ވަހީދު ވިދާޅުވީ، މިއަދު ފެނިގެން މިދަނީ ބަދަލު ހިފުމުގެ ރޫހެއް ކަމަށާއި ބަދަލު ހިފުމުގެ ރޫހެއް ނެތް ނަމަ 2016 ވަނަ އަހަރު ހިނގައިދިޔަ ކަންތައްތަކުގެ ތެެރޭގައި ޑރ މުއިއްޒާއި އަބްދުއްރަޙީމާއި މި ދެބޭފުޅުން ހިމެނޭ ވާހަކަ ފުލުހުންގެ ތަހުގީގު ރިޕޯޓުން ނުފެނުނީސް ކަމަށް އޭނާ ވިދާޅުވިއެވެ.
"މީގެން މި ބުނަނީ ކީކޭތޯ؟ މީގައި މި ބުނަނީ ޤާނޫނާ ޚިލާފް، ޤަވައިދާ ޚިލާފް ކޯޓު އަމުރެއް ނެރެ، އެ ކޯޓު އަމުރުގެ އެހީގައި ރައީސް ޔާމީން ހިފާ ހައްޔަރުކޮށްގެން ދޫނިދޫގެ ގޮޅިއަކަށް ގެންގޮސް އެބޭފުޅާ ކޮންމެވެސް ގޮތަކަށް މަރާލާފަ ބަޔަކު މީހުން ވެގެން ކަރަށް މަޅިއެއް ފައްތާ ތަނެއްގަ މިހެން އައްސާފަ ބަހައްޓާފަ ދަންޖެހިފަ ހުރި ކަމެއް ނުވަތަ ދަންޖައްސާފަ ހުރި މީހެއްގެ ސިފަ ދައްކާފަ އެހާހިސާބުން އަމިއްލަ އަށް ދަންޖެހި މަރުވީ ކަމަށް ދޭހަވާގޮތަށް ކަންކަން ބަދަލުކުރާނީއޭ،" ހުސެއިން ވަހީދު ވިދާޅުވިއެވެ.
ހުސެއިން ވަހީދު ވިދާޅުވީ އޭނާ އިޝާރާތް ކުރެއްވި ރިޕޯޓަކީ މޯލްޑިވްސް ޕޮލިސް ސަރވިސް އިން 2018 ވަނަ އަހަރު ސޮއިކޮށް އެތާނގެ އެކްޓިންގ ކޮމިޝަނަރ ނަވާޒް ސޮއި ކުރައްވާ ރިލީޒްކޮށްފައިވާ ތަހުޤީޤް ރިޕޯޓެއްގަ ލިޔެފަ ހުރި ވާހަކަތައް ކަމުގައެވެ.
ހުސެއިން ވިދާޅުވީ، މި ރިޕޯޓުގައި މިކަން ކޮށް ނިމުނީމާ އަބްދުއްރަހީމަށާއި ޑރ. މުއިއްޒަށް އެތައް މިލިއަން ރުފިޔާއެއް ލިބޭނެ ކަމަށް ބުނެފައިވާ ކަމަށެވެ.
ފައިސާ ހުށަހެޅި ފަރާތާއި ފައިސާ ލިބޭ ގޮތުގެ ތަފްސީލެއް ހުސެއިން ވަހީދު ހާމައެއް ނުކުރައްވައެވެ.
"އެހެންވީމަ ސުވާލަކީ 2014 ވަނައަހަރުން ފެށިގެން 2016 ވަނަ އަހަރުން ފެށިގެން ހިތުތެރޭގަ ނަފްރަތުތަކެއް އެބަހުއްޓޭ ވަކި ބޭފުޅަކާ ދޭތެރޭގަ،" ހުސެއިން ވަހީދު ވިދާޅުވިއެވެ.
މާމިގިލީ ކޯޓުން އަމުރެއް ނެރެ ޔާމީން ހައްޔަރުކުރަން އުޅުނު ކަމަށް ބުނެ މެޖިސްޓްރޭޓް ނިހާނާއި ކުރީގެ ޕްރޮސެކިއުޓާ ޖެނެރަލް މުހުތާޒް މުހުސިންގެ މައްޗަށް ޓެރަރިޒަމްގެ ދައުވާ، ޔާމީންގެ ވެރިކަމުގައި އުފުލި އެވެ. އަދި އެ ދެ މީހުން 17 އަހަރަށް ޖަލަށް ލުމަށް 2016 ވަނަ އަހަރު ހުކުމް ވެސް ކުރި އެވެ. ނަމަވެސް މުހުތާޒު އާއި ނިހާނުގެ މައްޗަށް އިއްވި ހުކުމް، ފަހުން ހައި ކޯޓުން ބާތިލު ކުރުމުން އެ ދެ މީހުން މިނިވަންވި އެވެ.
