ލިބިފައިވާ ބޯހިޔާވަހި ކަމެއް އަތުނުލައްވާނެ ކަމަށް ރައީސް އަނެއްކާވެސް ވިދާޅުވެއްޖެ
2 ސެޕްޓެމްބަރު 2024 | ހޯމަ 12:59ރައީސް މުޢިއްޒު ވިދާޅުވެފައިވަނީ، އިންތިޚާބުގައި ވެވަޑައިގެންނެވި ވަޢުދާ އެއްގޮތަށް ފްލެޓްގެ ޙައްޤުވެރިންނަށް ފްލެޓް ދެއްވާނެ ކަމަށް
ނިމިދިޔަ ސަރުކާރުން ދިން ފްލެޓާއި ގޯތި ނުދީ މި ސަރުކާރުން ލަސްކުރާތީ އާއްމުން ކުރަމުންދާ މުޒާހަރާ
ލިބިފައިވާ ބޯހިޔާވަހި ކަމެއް އަތުނުލައްވާނެ ކަމަށް ރައީސް ޑރ. މުހައްމަދު މުއިއްޒު އަނެއްކާވެސް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ފަހި ޔޫނިއަންގެ އިސް އޮފިޝަލުންނާއެކު ހޯމަ ދުވަހު ރައީސް އޮފީހުގައި އޮތް ބައްދަލުވުމެއްގައެވެ.
އެ ބައްދަލުވުމަށްފަހު ފަހި ޔޫނިއަންގެ ފައުންޑަރ ނާއިފް އަބޫބަކުރު މި ނޫހާ ވާހަކަ ދައްކަވަމުން ވިދާޅުވީ ރައީސް ޑރ. މުޙައްމަދު މުޢިއްޒު މި ބައްދަލުވުމުގައި، އިންތިޚާބުގައި ވެވަޑައިގެންނެވި ވަޢުދާ އެއްގޮތަށް ފްލެޓްގެ ޙައްޤުވެރިންނަށް ފްލެޓް ދެއްވާނެ ކަމަށް ވިދާޅުވި ކަމަށެވެ.
މިކަމާ ގުޅޭގޮތުން، ރައީސް ވަނީ ފަހި ޔޫނިއަންގެ ފައުންޑަރ ނާއިފް އަބޫބަކުރާއި އެ ޖަމްޢިއްޔާގެ ރައީސް އިބްރާހިމް ނޫރައްދީނާ ހޯމަ ދުވަހު ރައީސް އޮފީހުގައި ބައްދަލުކުރައްވާފައެވެ.
ފަހި ޔޫނިއަނުން ވަނީ، ކުރީ ސަރުކާރުން ފްލެޓް ލިބޭނެ ކަމަށް ކަނޑައަޅައި އެގްރީމެންޓް ހަދާފައިވާ ފަރާތްތަކުގެ ކަންބޮޑުވުންތައް ރައީސް އާ ހިއްސާކޮށްފައެވެ.
ރައީސް ވިދާޅުވެފައިވަނީ ރައްޔިތަކަށް ދީފައިވާ ބޯހިޔާވަހިކަމެއް އަތުނުލައްވާނެ ކަމަށެވެ. އަދި ފްލެޓް ލިސްޓަށް ފްލެޓް ދޫކުރުން ހުއްޓާލާފައިވަނީ އެންޓި-ކޮރަޕްޝަން ކޮމިޝަނުން އެންގުމާ ގުޅިގެން ކަމަށާއި، ކުރިއަށް އޮތް މަހުގެ ނިޔަލަށް ފްލެޓް ޙަވާލުކުރެވޭނެ ކަމަށެވެ.
ރައީސް އިތުރަށް ވިދާޅުވެފައިވަނީ، އޭ.ސީ.ސީގެ ތަޙްޤީޤު ކުރިއަށްދާ ނަމަވެސް، އޭގައި މާބޮޑެތި މައްސަލަތަކެއް ހުރި ކަމަކަށް ނުދެކެވަޑައިގަންނަވާ ކަމަށެވެ.
އެކި އެކި ގޮތްގޮތައް ފްލެޓް ލިސްޓް ބަހާލާން އުޅޭ ވާހަކަ ދެކެވޭ ކަމަށް ރައީސް އަށް ދެންނެވުމުން އެކަން އެހެން ނުހިނގާނެ ކަމަށް ރައީސް ވިދާޅުވި ކަމަށް ފަހި ޔޫނިއަންގެ ފައުންޑަރ ވިދާޅުވިއެވެ.
މިދިޔަ ސަރުކާރުން ހިންގި "ގެދޮރުވެރިޔާ" ސްކީމުގެ ދަށުން 4,000 ފްލެޓް ލިބޭ ފަރާތްތައް ގެޒެޓްކޮށް، އޭގެ ތެރެއިން 3,778 ފަރާތާއެކު އެގްރީމެންޓް ވެސް ވަނީ ހަދާފައެވެ.
