ވިސާ ފުރިހަމަ ނޫން 200ށް ވުރެ ގިނަ ބިދޭސީންނަށް ނޯޓިސްދީފި
ކުރިއަށް އޮތްތަނުގައި މިފަދަ މާސް އިންސްޕެކްޝަންތައް ކުރިއަށް ގެންދާނެ
ބިދޭސީންނާ އިމިގްރޭޝަން އޮފިސަރުން ސުވާލުކުރަނީ
ގަވާއިދާ ޚިލާފަށް މާލެ ސަރަހައްދުގައި ދިރިއުޅޭ ބިދޭސީން ދެނެގަތުމަށް ހިންގާ ޚާއްސަ އޮޕަރޭޝަންގައި ވިސާ ފުރިހަމަ ނޫން 200ށް ވުރެ ގިނަ ބިދޭސީންނަށް ނޯޓިސް ދީފައިވާ ކަމަށް އިމިގްރޭޝަނުން ބުނެފިއެވެ.
ގަވާއިދާ ހިލާފަށް އުޅޭ ބިދޭސީން ހޯދުމަށް ޚާއްސަ ޓާކްސްފޯސްއެއް އެކުލަވާލާ ޚާއްސަ އޮޕަރޭޝަންތަކެއް އިމިގްރޭޝަނުން ކުރިއަށް ގެންދެއެވެ.
އިމިގްރޭޝަނުން ބުނީ 28 އޯގަސްޓް 2024ގެ ހަވީރު 4:00ން 6:00ށް މާލޭގައި ހިންގުނު ޚާއްސަ ހަރަކާތުގައި ވިސާ ފުރިހަމަ ނޫން 273 ބިދޭސީންނަށް ނޯޓިސްދީފައިވާ ކަމަށެވެ. އަދި ގަވާއިދާ ހިލާފަށް އެމީހުން ލައްވާ މަސައްކަތްކުރުވާ 120 ދިވެހިންނަށް ވަނީ ލިޔުމުން ނަސޭހަތް ދީފައިވާ ކަމަށެވެ.
މި އިންސްޕެކްޝަންގައި، ބިދޭސީންގެ ތެރެއިން ފިލައިގެން އުޅޭކަމަށް ރިޕޯޓުކޮށްފައިވާ 10 މީހަކު ހޯދާ އިމިގްރޭޝަން ބެލުމުގެ ދަށަށް ވަނީ ގެނެވިފައިވާ ކަމަށް އެއިދާރާއިން ބުނެފައިވެއެވެ.
މިދިޔަ ބުދަ ދުވަހު ކުރިއަށް ގެންދެވުނު ހަރަކާތަކީ އިމިގްރޭޝަންގެ 74 އަހަރުވީ ދިގު ތާރީހުގައި، މިހާތަނަށް އެންމެ ގިނަ އަދަދެއްގެ އޮފިސަރުން ބައިވެރިވެ ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް ހިންގުނު އެންމެ ބޮޑު ހަރަކާތްކަން ފާހަގަކޮށް އިމިގްރޭޝަނުން ބުނީ މި ޚާއްސަ ހަރަކާތުގައި މާލޭގެ އެކި ސަރަހައްދުތަކުން ޖުމްލަ 582 ތަނެއް ބަލައި ފާސްކޮށް، 1,025 ބިދޭސީންނާ ސުވާލުކޮށްފައިވާ ކަމަށެވެ.
މި ހަރަކާތާއި ގުޅޭގޮތުން ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވީ ކުރިއަށް އޮތްތަނުގައި މިފަދަ މާސް އިންސްޕެކްޝަންތައް ކުރިއަށް ގެންދާނެ ކަމަށެވެ. އަދި ރައްޔިތުންގެ ފަރާތުން ލިބޭ ތަރުހީބުން ވަރަށް ބޮޑު ހިތްވަރެއް ލިބޭކަމަށާއި މި މައްސަލައަށް ފުރިހަމަ ހައްލެއް ނުލިބޭހާ ހިދަކު މި މަސައްކަތުގައި ދެމިހުންނާނެ ކަމުގެ ޔަގީންކަން ވަނީ ދެއްވާފައެވެ.
މި އިންސްޕެކްޝަންގައި އިމިގްރޭޝަންގައި ހިމެނޭ ޖުމްލަ 398 މުވައްޒަފުންގެ ތެރެއިން 211 އޮފިސަރުން ބައިވެރިވެފައިވެއެވެ.
