ބިދޭސީންގެ މައްސަލަ ހައްލުކުރުމަށް ކުރާ މަސައްކަތުގެ ފަރަގު މިހާރު ނުފެނުނު ނަމަވެސް ކުރިއަށް އޮތްތަނުގައި ފެންނާނެ: ކޮންޓްރޯލަރ ޖެނެރަލް އޮފް އިމިގްރޭޝަން ފަސީހު

ދިވެހިރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދައި، ގަވާއިދުގެ ތެރެއަށް ވެއްދުމަށް ކުރަމުންދާ މަސައްކަތުގެ ފަރަގު މިހާރު ނުފެނުނު ނަމަވެސް ކުރިއަށް އޮތްތަނުގައި ބޮޑު ފަރަގެއް ފެންނާނެ ކަމަށް ކޮންޓްރޯލަރ ޖެނެރަލް އޮފް އިމިގްރޭޝަންގެ (ރިޓަޔަރޑް) އަހުމަދު ފަސީހު ވިދާޅުވެއްޖެއެވެ.

އިމިގްރޭޝަން އިންސައިޓްސް އެޕިސޯޑް-1ގައި ކޮންޓްރޯލަރ ޖެނެރަލް އޮފް އިމިގްރޭޝަން ފަސީހު ވިދާޅުވީ ރާއްޖޭގައި ގަވާއިދާ ހިލާފަށް ގިނަ އަދަދެއްގެ ބިދޭސީން އުޅޭ ކަމަށާއި، މިއީ ގައުމުގެ ސަލާމަތަށް އޮތް ނުރައްކަލެއް ކަމަށެވެ. މިމައްސަލަ ހައްލު ކުރުމުގެ މަސައްކަތް ކުރަމުންދާ ކަމަށް ފަސީލް ވިދާޅުވިއެވެ.

މިފަހުން އައްޑޫ ސިޓީގައި ކުރިއަށް ގެންދިޔަ އޮޕަރޭޝަނަށް އިޝާރާތް ކުރައްވައި ފަސީހު ވިދާޅުވީ 976 މީހުން ޗެކް ކޮށްބެލިއިރު ގަވާއިދާ ހިލާފަށް އުޅޭ ކަމަށް ފާހަގަކުރެވުނީ 107 މީހުން ކަމަށެވެ. މި ނަތީޖާއިން އެކަނި ވެސް ގަވާއިދުގެ ތެރެއަށް ބިދޭސީ މަސައްކަތް ތެރެއިން ވަންނަން ބޭނުންވާކަން ހާމަވެފައިވާ ކަމަށް ފަސީހު ވިދާޅުވިއެވެ.

މީގެ އިތުރުން ފަސީހު ވިދާޅުވީ ބިދޭސީ މަސައްކަތްތެރިންގެ މައްސަލަ ހައްލު ކުރުމަށް ކުރަމުންދާ މަސައްކަތުގެ މާބޮޑު ފަރަގެއް މިހާރު ނުފެނުނު ނަމަވެސް ކުރިއަށް އޮތްތަނުގައި ބޮޑު ފަރަގެއް މުޅި ރާއްޖެއިން ފެންނާނެ ކަމަށެވެ.

އެންފޯސް ކުރަން ފެށީމަ ރަނގަޅުކުރާނެ. އާއްމު ރައްޔިތުން ކުށްވެރި ކުރުމެއް ނޫން މިއީ. ގައުމުގައި މަސައްކަތް ކުރަން އަންނަ މީހުން އަންނަނީ ވަރަށް ބޮޑަށް މަސައްކަތްކޮށް، ގިނަ އަދަދެއްގެ ފައިސާ ހަރަދު ކޮށްގެން. އައިސްފައި ކޮންމެވެސް ހިސާބަކުން މިމީހާ މަގުމަތިވެ އަމިއްލައަށް ފައިސާ ހޯދަން މިއުޅެނީ. މަދުބައެއް ކުރާ ކަމެއްގެ ސަބަބުން މިކަހަލަ ނޭދެވޭ ކަންތައްތަކެއް މިދިމާވަނީ ހަގީގަތުގައި.

ކޮންޓްރޯލަރ ޖެނެރަލް އޮފް އިމިގްރޭޝަންގެ (ރިޓަޔަރޑް) އަހުމަދު ފަސީހު

ފަސީހު ވިދާޅުވީ އަތޮޅުތެރޭގެ ރަށްރަށުގައި ވެސް ގިނަ އަދަދެއްގެ ބިދޭސީން ހަރަކާތްތެރިވާ ކަމަށާއި، ވިސާ ނެތި ފީ ނުދައްކާ ބިދޭސީން އުޅޭ މައްސަލަ ހައްލު ކުރުމަށް ރަށްރަށުގެ ކައުންސިލްތަކުގެ ފަރާތުން ވެސް ވަރަށް ބޮޑު އެއްބާރުލުމެއް ލިބޭ ކަމަށެވެ. އަދި ގަވާއިދުގެ ދަށުން ބޭރުގެ މަސައްކަތްތެރިން ގެންގުޅުމުގައި މައްސަލައެއް ނެތް ކަމަށް ފަސީހު ވިދާޅުވިއެވެ.

ގަވާއިދާ ހިލާފަށް އުޅޭ ބިދޭސީން ހޯދައި، ގަވާއިދުގެ ތެރެއަށް ވެއްދުމަށް ކުރަމުންދާ މަސައްކަތުގެ ފަރަގު މިހާރު ނުފެނުނު ނަމަވެސް ކުރިއަށް އޮތްތަނުގައި ބޮޑު ފަރަގެއް ފެންނާނެ ފަސީހު ވިދާޅުވެފައިވާއިރު، ގަވާއިދާ ޚިލާފަށް އުޅޭ ބިދޭސީން ނިޒާމުގެ ތެރެއަށް ގެނައުމަށް "އޮޕަރޭޝަން ކުރަނގި" 2 މެއި 2024 ގައި ފަށައި، މުޅި ރާއްޖެއަށް މި އޮޕަރޭޝަން 19 ޖުލައި 2024 ވަނީ ފުޅާކޮށްފައެވެ. އަދި ސެޕްޓެންބަރު މަހު މުޅި ރާއްޖޭގައި ބިދޭސީންގެ މައްސަލަ ހައްލު ކުރުމަށް ބޮޑު އޮޕަރޭޝަނެއް ކުރިއަށް ގެންދާކަން ރައީސް ޑރ.މުހައްމަދު މުއިއްޒު މިއަހަރުގެ ސެޕްޓެންބަރު މަހުގެ ތެރޭގައި ވަނީ އިއުލާން ކުރައްވާފައެވެ.

އެކިއެކި ނަންނަމުގައި އޮޕަރޭޝަންތައް ހިންގި ނަމަވެސް އެކަށީގެންވާ ނަތީޖާއެއް ނުފެންނަ ކަމަށް ބައެއް އާއްމު ރައްޔިތުން ދަނީ ބުނަމުންނެވެ. ގަވާއިދާ ހިލާފަށް ވިޔަފާރި ކުރާ ބިދޭސީން އަދިވެސް ވަރަށް ގިނަކަން ފާހަގަކުރެއެވެ. އެގޮތުން ކަންމަތީ ފިހާރަތަކުގައި ބިދޭސީ ސޭޓުން ތިބުމަކީ މަނާކަމެއް ނަމަވެސް ޚާއްސަކޮށް މާލެސިޓީގައި ކުދި ވިޔަފާރިތައް ބިދޭސީން ހިންގައެވެ. އަދި މާރުކޭޓުގެ ގިނަ ގޮޅިތަކާއި، ޑޮލަރުގެ ކަޅު ބާޒާރުގައި ޑޮލަރު ވިއްކުމުގެ އިތުރުން ޓެކްސީ ޚިދުމަތް ދިނުމަށް ވެސް ބިދޭސީން ހަރަކާތްތެރިވެއެވެ.