ރާއްޖޭގެ އިގްތިސާދީ ހާލަތު ރަނގަޅު ކުރަން އަވަސް ފިޔަވަޅުތަކެއް އަޅަން ކުރީގެ މާލީ ވަޒީރު އަމީރު ސަރުކާރަށް ގޮވާލައްވައިފިއެވެ.

ބުދަ ދުވަހުގެ ރޭ ކުރީގެ މާލީ ވަޒީރު އިބްރާހީމް އަމީރު އެކްސް ގައި ކުރެއްވި ޕޯސްޓެއްގައި ވަނީ ރާއްޖޭގެ މާލީ ހާލަތުގެ ކަން ހިންގަމުން އައިސްފައިވާ ގޮތައް ކުރުގޮތަކަށް އަލިއަޅުއްވާލައްވާފައެވެ.

ދިވެހިރާއްޖޭގެ ކްރެޑިޓް ރޭޓިންގ ދަތުރު ފެށުނީ 2016 ވަނަ އަހަރުގެ ސެޕްޓެމްބަރު މަހު މޫޑީސްގެ "ބީ-ޓޫ" ރޭޓިންގއާއެކުއެކުގައި ކަމަށް އަމީރު ވިދާޅުވިއެވެ.

އޭގެ ފަހުން، ރާއްޖޭގެ، ފިޗް އަދި މޫޑީސްގެ ރޭޓިންގތަކުން ދުނިޔެއަށް ކުރިމަތިވި އެކި އެކި ހާލަތުގެ އަސަރު ފެނިފައިވާ ކަމަށާއި، އެހެން ނަމަވެސް، ވިސްނުންތެރިކަމާއެކު މާލީ ކަންކަން މެނޭޖްކުރުމުގެ ސަބަބުން ރާއްޖޭގެ ރޭޓިންގ އެއް މިންގަނޑެއްގައި ހިފެހެއްޓި، އަދި މައްޗަށްވެސް ޖެހުނު ކަން އަމީރު ވަނީ ފާހަގަ ކުރައްވާފައެވެ.

އެހެން ނަމަވެސް، އަމީރު ވިދާޅުވީ "އައު ސަރުކާރުގެ ސިޔާސަތު ތަކުގެ ސަބަބުން މި ލިބުނު ކުރިއެރުމަށް ނުރައްކާވެފައިވާ،" ކަމަށެވެ.

އަމީރު ފާހަގަ ކުރެއްވި ގޮތުގައި 2024 ވަނަ އަހަރުގެ ޖޫން މަހު ފިޗްއިން ދިވެހިރާއްޖޭގެ ރޭޓިންގ ވަނީ ދަށްކޮށްފައިވެއެވެ. އޭގެ އިތުރުން، އިތުރަށް ރާއްޖޭގެ ރޭޓިންގ ދަށްވެދާނެ ކަމަށް ފެންނަ ކަންކަން ވެސް ފިޗް އިން ފާހަގަ ކޮށްފައިވާ ކަމަށް އަމީރު ވިދާޅުވިއެވެ. އޭގެ ތެރޭގައި: ބޭރުން ފައިސާ ހޯދުމުގައި ދަތިވުމާއި، ބޭރު ފައިސާގެ ރިޒާވް ދަށްވަމުން ދިއުމާއި، އަދި މާލީ އިސްލާހުތައް ލަސްވުން ހިމެނޭ ކަމަށް އޭނާ ވިދާޅުވިއެވެ.

އަމީރު ވިދާޅުވީ، މި ކަންކަން ފަހަކަށް އައިސް ވަނީ އިތުރަށް ގޯސްވެފައި ކަމުގައެވެ.

ސަރުކާރުން ކަންކަން ކުރަމުން ދިޔަ ގޮތުންނާއި، އިންޑިއާ-ރާއްޖޭގެ ގުޅުމަށް އައި ނުތަނަވަސް ކަމުގެ ސަބަބުން ފަތުރުވެރިކަމަށް އަސަރު ކުރި ކަމަށް އަމީރު ވިދާޅުވިއެވެ.

ފަތުރުވެރިކަމުން ޑޮލަރުން ލިބޭ އާމްދަނީ 15 އިން ސައްތަ އިތުރުވި ކަމަށް ހިސާބުތަކުން ފެނުނު ނަމަވެސް، ބޭރު ފައިސާގެ ރިޒާވް ދަށަށް ދާކަން އަމީރު ވަނީ ފާހަގަ ކުރައްވާފައެވެ.

ސަރުކާރުން ކޮންމެހެން މުހިންމު ނޫން ކަންކަމަށް ބޮޑެތި ޚަރަދުތައް ކުރުމުގެ ސަބަބުން ރާއްޖޭގެ ކްރެޑިޓްވާދިނަސް ނުރައްކަލުގެ ތެރެއަށް ވައްޓާލާފައިވާ ކަން އަމީރު ފާހަގަ ކުރެއްވިއެވެ. ބޭކާރު ގޮތުގައި ކޮށްފައިވާ ޚަރަދުތަކުގެ މިސާލު ދައްކަވަމުން އަމީރު ފާހަގަ ކުރެއްވީ 37 މިލިއަން ޑޮލަރު ހޭދަކޮށްގެން މިލިޓަރީ ޑްރޯންތައް ގަތުމާއި، ޕްލޭންނުކޮށް 50 މިލިއަން ޑޮލަރުގެ ޓީ-ބިލް އަނބުރާ ދެއްކުމެވެ.

ކޮވިޑްގެ އެންމެ ދަތި ހާލުގައި، ގައުމުގެ އިގްތިސާދު އެކީ ހުއްޓުނު ދަނޑިވަޅުގައި ރާއްޖޭގެ މާލީ ކަންކަން މެނޭޖް ކުރައްވަމުން ގެންދެވި މާލީ ވަޒީރު ވިދާޅުވީ، މާލީ ދާއިރާގެ އިސްލާހުތައް ލަސްވުމާއި އަޅަން ޖެހޭ ފިޔަވަޅު ނޭޅުމުގެ ނަތީޖާ އަކީ ބޮޑު ނުރައްކަލަކާ ކުރިމަތިލާން ޖެހުން ކަމުގައެވެ.