ރައީސް މުއިއްޒު ދަރަނި ދައްކަވަން 13 ބިލިއަން ހޭދަކުރެއްވުމުން ދެން ހިނގި ޚަރަދުތައް ފޫބެއްދީ ކިހިނެއްތޯ ސުވާލު އުފެދިއްޖެ!
ބާކީ އޮތީ 13 ބިލިއަން، ހަމަ އެކަނި ދަރަނި ދައްކަން؟
ރައީސް މުއިއްޒު 13 ބިލިއަން ރުފިޔާ ދަރަންޏަށް ދެއްކެވި އިރު، މި އަހަރުގެ ބަޖެޓުން ޚަރަދުކޮށްފައިވަނީ 18 ބިލިއަން ރުފިޔާ ކަމަށް ހިސާބުތަކުން އެބަފެނޭ
ފާއިތުވި 7 މަސް ދުވަހުގެ ތެރޭގައި 13 ބިލިއަން ރުފިޔާ ކުރީ ސަރުކާރުގެ ދަރަނި އަދާ ކުރަން ދައްކަވައިފި ކަމަށް ރައީސް ޑރ. މުއިއްޒު ވިދާޅުވުމުން އެކަމާ މުހިންމު ސަވާލުތަކެއް ކުރީގެ މާލީ ވަޒީރު އިބްރާހިމް އަމީރު ކުރައްވައިފިއެވެ.
"ގާތްގަނޑަކަށް 13 ބިލިއަން ރުފިޔާ މި ހަތް މަސް ތެރޭގައި އަޅުގަނޑުމެން މި އޮތީ ދައްކާފައި." ރައީސް މުއިއްޒު ޕީއެންސީގެ މައި ޖަގަހަ "ޕީއެންސީ ހައުސް" ހުޅުވުމަށް އާދިއްތަ ދުވަހުގެ ރޭ ހ. ވެޔޮވިލާގައި ބޭއްވި ޖަލްސާގައި ވާހަކަފުޅު ދައްކަވަމުން ވިދާޅުވިއެވެ.
މުއިއްޒުގެ މި ވާހަކަފުޅާ ގުޅިގެން ކުރީގެ މާލީ ވަޒީރުގެ އިބްރާހިމް އަމީރު "އެކްސް" ގައި މުހިންމު ސުވާލުތަކެއް ވަނީ ކުރައްވާފައެވެ.
އަމީރު ފާހަގަ ކުރައްވާ ނުކުތާ އަކީ، ރައީސް މުއިއްޒު 13 ބިލިއަން ރުފިޔާ ދަރަންޏަށް ދެއްކެވި އިރު، މި އަހަރުގެ ބަޖެޓުން ޚަރަދުކޮށްފައިވަނީ 18 ބިލިއަން ރުފިޔާ ކަމަށް ހިސާބުތަކުން އެބަފެންނަ ކަމަށެވެ. އަމީރު ވިދާޅުވީ، ސަރުކާރުން އާއްމު ކޮށްފައިވާ ހިސާބުތަކުން މުސާރަ އަށް ޚަރަދު ކޮށްފައިވަނީ އެ މުއްދަތުގެ ތެރޭގައި 5 ބިލިއަން ރުފިޔާއެވެ. އެހެން ކަމުން ދެން ބަޖެޓުން 13 ބިލިއަން ރުފިޔާ އަކީ ހުސް ކުރީ ސަރުކާރުގެ ދަރަނި އަދާ ކުރަން ދެއްކި ފައިސާ އަށް ވެއްޖެ ނަމަ، ސަރުކާރުން ދެން އިތުރު އެއްވްސް ކަމެއް ކުރާނެ ފައިސާ އެއް ހުންނާނެ ގޮތެއް އޮވެގެން ނުވާނެއެވެ.
އެހެން ކަމުން އަމީރު ކުރައްވާ ސުވާލަކީ، "މި ސަރުކާރުން އޮފީސްވެސް ނުހުޅުވަނީތޯ؟ ޑްރޯންވެސް ނުގަންނަނީތޯ؟ ރައީސް އާއި ކެބިނެޓް ވަޒީރުން ދަތުރުވެސް ނުކުރައްވަނީތޯ؟" އެވެ.
މި ކަންކަމަކީ ޔާގީނުންވެސް ހިނގި ކަންކަން ކަމަށް ސާފުކޮށް ފެންނަ ހުރި އިރު، އެކަންކަމަށް ހިނގި ޚަރަދު ފޫބެއްދީ ކިހިނެއްތޯ ސުވާލު އުފެދެއެވެ. ދައުލަތުގެ ބަޖެޓުން މި ޚަރަދުތައް ކުރިނަމަ ރައީސް ޑރ. މުއިއްޒު އެވިދާޅުވާ ވަރަށް ދަރަނި ދެއްކޭނެ ގޮތެއް ނޯންނާއެވެ.
އަމިރު ވިދާޅުވީ، މިއަހަރުގެ މިހާތަނަށް އެޑްމިނިސްޓްރޭޓިވް އަދި އޮޕަރޭޝަނަލް ޚަރަދަށް އެކަނިވެސް 200 މިލިއަން އިތުރަށް ޚަރަދުކޮށްފި ކަމަށެވެ. އޭގެ އިތުރުން މުސާރަ އާއި ދައުލަތުގެ ހިންގުމުގެ ޚަރަދަށް އެކަނި 600 މިލިއަން ރުފިޔާ އިތުރުވެއްޖެ ކަމަށެވެ.
އަމީރު ވިދާޅުވެފައިވަނީ ކުރިން 700 ގައި ހުރި ސިޔާސީ މަޤާމްތައް މިހާރު 2000 އަށް ވުރެ މަތީގައި ހުރި ކަމަށެވެ.
މި ހުރިހާ ކަމަކީވެސް ޚަރަދުތައް ކުޑަ ވުމުގެ ބަދަލުގައި ޚަރަދުތައް ބޮޑުވާނެ ކަންކަމަށް ވާތީ، އެކަންކަމުގެ ޚަރަދުތަކަށް ހިނގިއެއްޗެއް ޑރ. މުއިއްޒުގެ ހިސާބުތަކުގައި ހިމެނުމުން، މި ވޭތުވެދިޔަ 7 މަސް ދުވަހުގެ ތެރޭގައި 13 ބިލިއަން ދަރަނި އަދާ ކުރުމަށް ހޭދަ ކުރުމުން ދެން ހިނގި ޚަރަދުތައް ފޫބެއްދި ގޮތާ މެދު ސުވާލު އުފެދެއެވެ.
