ރާއްޖޭގެ އިގްތިސާދު ހަމަ މަގަށް އެޅުވުމަށް ކުރަމުންދާ މަސައްކަތުގައި ކުރީގެ ރައީސް އިބްރާހިމް މުހައްމަދު ސާލިހު ސަރުކާރުގެ ފިނޭންސް މިނިސްޓަރުގެ ލަފާ ހޯއްދަވާފިނަމަ ވާނީ ނުލަފާ ކަމަށް ރައްޔިތުން މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
ބުދަ ދުވަހު ޕީއެންސީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން އަބްދުއްރަހީމް ވިދާޅުވީ ސުވާލަކީ ވަރަށް ހެއްވާ ސުވާލެއް ކަމަށާއި، ގައުމު ބަގުރޫޓު ކޮށްލާފައި ދިޔަ ބައެއް ގާތުން ގައުމު ބިނާ ކުރަން މަސައްކަތް ކުރާ މީހުން ލަފާ ހޯދަން ނުޖެހޭ ކަމަށެވެ. އަދި ކުރީގެ ފިނޭންސް މިނިސްޓަރުގެ ލަފާ ހޯދާފިނަމަ ވާނީ ނުލަފާ ކަމަށް އަބްދުއްރަހީމް ވިދާޅުވިއެވެ.
މީގެ އިތުރުން އަބްދުއްރަހީމް ވިދާޅުވީ ރައީސް ޑރ.މުހައްމަދު މުއިއްޒުގެ ޓީމަކީ ގައުމު އާރާސްތު ކުރެވޭވަރުގެ ގާބިލް ޓީމެއް ކަމަށާއި، ކުރީ ސަރުކާރުގެ ބޭފުޅުންގެ ލަފާ ބޭނުންނުވާ ކަމަށެވެ.
ތިޔައީ ވަރަށް ހެއްވާ ސުވާލެއް އެނގޭތޯ. ގައުމެއް ބަގުރޫޓު ކޮށްލާފައި ދިޔަ ބަޔަކު ދެން އަޅުގަނޑުމެން ގައުމެއް ބިނާ ކުރަން އުޅޭ ބަޔަކު ކީއްކުރަންތޯ އެމީހުންގެ ލަފާ ހޯދަނީ. އެ މީހުންގެ ލަފާ ހޯދާފިއްޔާ ނުލާފާ ނޫންތޯ ވާނީ. ރައީސް ޑރ.މުހައްމަދު މުއިއްޒުގެ ޓީމަކީ އެބޭފުޅުން ބަގުރޫޓު ކޮށްލި ގައުމު އަލުން ބިނާކޮށް އާރާސްތު ކުރެވޭވަރުގެ ގާބިލް ޓީމެއް. އެޓީމަކަށް ބޭނުމެއް ނުވޭ އެނގޭތޯ އެބޭފުޅުންގެ ލަފައެއް.ރައްޔިތުން މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ
ކުރީ ސަރުކާރުގައި ފިނޭންސް މިނިސްޓަރަކަށް ހުންނެވީ އިބްރާހީމް އަމީރެވެ.
ރާއްޖޭގެ އިގްތިސާދީ ހާލާތާ ގުޅޭގޮތުން ސަރުކާރުން ދައްކަމުންދާ ވާހަކަތައް ހަމަނުޖެހޭ ކަމަށް ބުނެ ބައެއް ރައްޔިތުން ވަނީ އަމީރުގެ ލަފައާއި އިރުޝާދު ހޯއްދެވުމަށް ސަރުކާރަށް ގޮވާލާފައެވެ. މީގެ ކުރިން މަސްވެރިންނަށް ދޫކުރަން ޖެހޭ ފައިސާ ދޫނުކޮށް މިސަރުކާރުން ހިފަހައްޓައި، ފައިސާ ނެތް ކަމަށް ދައްކަމުން ދިޔަ ވާހަކަތަކުގެ ހަގީގަތް އަމީރު ވަނީ ރައްޔިތުންނަށް ހާމަކޮށްދީފައެވެ.
ސަރުކާރު ބަދަލުވެގެންދިޔައިރު ފައިސާ ދެވޭނެ ގޮތަށް ހުރިހާ އިންތިޒާމެއް ހަމަޖައްސާފައިހުރި ނަމަވެސް މިސަރުކާރުން މަސްވެރިންނަށް ފައިސާ ދޫކޮށްފައިވަނީ މަސްވެރިން މުޒާހަރާ ކުރުމުންނެވެ.
މީގެ އިތުރުން މާލީ ހާމަކަން ދަށްވެ ރާއްޖެ ބޮޑު ސިއްރު ދައުލަތަކަށް ބަދަލުވަމުން ދިއުމަކިީ ވަރަށް ބޮޑު ކަންބޮޑުވުމެއް ކަމަށް އަމީރު ވަނީ ވިދާޅުވެފައެވެ. މިމަހުގެ 25 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ ސަރުކާރުގެ ނާގާބިލްކަމުގެ ސަބަބުން ރާއްޖޭގެ މާލީ ހާލަތު ފެއިލްވަމުންދާ މަންޒަރު ފެނިގެންދާ ކަމަށެވެ. ރާއްޖޭގެ ރަސްމީ ރިޒަރވްގެ ހާލަތާއި ދަރަނީގެ ހާލަތު ދަށް ނުވާ މިންވަރަށް ދަށްވެފައިވާ ކަމަށް ފާހަގަކުރައްވާ އަމީރު ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. އަމީރު ވިދާޅުވީ ސަރުކާރުން މާލީ ދާއިރާ ހިންގުން ކަސިޔާރުވުމުން މާލީ ސިޔާސަތު އަތުން ބީވެގެންދާ މަންޒަރު ފެނިގެންދާ ކަަމަށެވެ.
