ކުރީގެ ރައީސް އަބްދުﷲ ޔާމީން ދަތުރުފުޅު ކުރެއްވި ފިނިފެންމާ ލޯންޗް ގޮއްވާލުން އެއީ އެމަނިކުފާނު އަމިއްލަފުޅަށް ކުޅުއްވި ޑްރާމާއެއް ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

ސަންގުޓީވީއަށް ދެއްވި ބަސްދީގަތުމެއްގައި ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޗެއަރޕާސަން އަބްދުއްރަހީމް ވިދާޅުވީ ރައީސް ޔާމީން ބައެއްފަހަރު ދައްކަވާ ވާހަކަފުޅުތަކުން ބައެއް ކަންކަމަށް ދައުވާކުރާ ކަމަށް ވިދާޅުވެވިދާނެ ކަމަށެވެ. އަބްދުއްރަހީމް ވިދާޅުވީ ރައްޔިތުންނަށް އޮޅުވާލަން ބޮޑެތި ދޮގުތަކެއް ހައްދަވަމުން ގެންދަވާއިރު، އެމަނިކުފާނު އަރިހުގައި މިއަދު ތިއްބެވި ބޭފުޅުންނަކީ ކޮންބައެއްކަން ރައްޔިތުންނަށް އެނގޭ ކަމަށެވެ.

އަބްދުއްރަހީމް ވިދާޅުވީ ފިނިފެންމާ ލޯންޗް ގޮވުން އެއީ ރައީސް ޔާމީން ކުޅުއްވި ޑްރާމާއެއް ނޫންތޯ ސުވާލުކުރައްވަން ކެރިވަޑައިގަންނަވާ ކަމަށެވެ. އެހިސާބަށް ރައީސް ޔާމީންގެ ވާހަކަފުޅުތައް ގޮސްފައިވާ ކަމަށެވެ. އަބްދުއްރަހީމް ވިދާޅުވީ ލޯންޗް ގޮއްވާލުމުން ރައީސް ޔާމީން ވިދާޅުވެފައިވަނީ، ލޯންޗުކޮޅުން ބޭރަށް ނުކުމެވަޑައިގެންނެވި އިރު ބޮޑު ފާލަމާއި ދިމާލުން ނޫކުލައިގެ ޓީޝާޓެއް ލައިގެން ހުރި މީހަކު ފެނިވަޑައިގެންނެވި ކަމަށާއި، އަދި އެކަން ކުރީ އެމީހާކަން ކަށަވަރުކުރެވުނު ކަމަށެވެ.

އަދުރޭ ވިދާޅުވީ ރައީސް ޔާމީން އިޝާރާތްކުރެއްވީ ސިފައިންގެ މާލޭ އޭރިއާގެ ކުރީގެ ކޮމާންޑަރު ކެޕްޓަން އަހްމަދު ފަޔާޒް އަލީ ރިޒާ (ޕާޕާ) އަށް ކަމަށެވެ.

އަދުރޭ ވިދާޅުވީ އެއިރު ސުވާލެއް ނުއުފެދުނީ އެއިރު ރައީސުލްޖުމްހޫރިއްޔާކަމުގައި ހުންނަވައިގެން ރައީސް ޔާމީން ވަރަށް ގިނަ ވާހަކަފުޅުތައް ދައްކަވަމުން ގެންދެވުމުން ކަމަށާއި، އެއިރު އޭނާ ހުންނެވީ ސަރުކާރުގައި ނޫން ކަމަށެވެ. އަދި މަޖިލީހުގައި އެދުވަސްވަރު ހުންނެވި އިރު ރައީސް ދައްކަވަމުން ގެންދެވި ވާހަކައަށް އެއިރު އިތުބާރު ކުރައްވަމުން ގެންދެވި ކަމަށެވެ.

އެހެންކަމުން މިއަދު އެމަނިކުފާނު [ރައީސް ޔާމީން] ކަންކުރައްވާ ގޮތާއި ދައްކަވާ ވާހަކާއި، އަދި އެއުރު ދެއްކެވި ވާހަކަ ގުޅުވާލުމުން މިއަދު ސުވާލު [ފިނިފެންމާ ލޯންޗް ގޮއްވާލި ހާދިސާ] އުފައްދަންޖެހޭ ކަމަށެވެ.