ޕީއެންސީ ހަރުގެ ޖަލްސާއިން ފެނިގެން ދިޔައީ ފާޑެއްގެ ޑްރާމާއެއް ކުޅުނުތަން، އާސަންދަ ކަނޑާފަވެސް އެ ޑްރާމާ ކުޅޭނެ - ދީދީ

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެވަޑައިގެންނެވި ޕީއެންސީގެ ހަރުގެ ޖަލްސާއިން ފެނިގެންދިޔައީ ފާޑެއްގެ ޑްރާމާއެއް ކުޅުއްވިތަން ކަމަށް އެމްޑީޕީގެ ކުރީގެ ރައީސް އިބްރާހިމް ދީދީ ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ދީދީ ވިދާޅުވީ ހަރުގެ ޖަލްސާ ބާއްވަން މުޅި ހިސާބުގަނޑަށް މީހުން އެއްކުރަން ވެގެން މުއައްސަސާތަކުގެ ވެރިންނާއި މުވައްޒަފުންނާއި މުވައްޒަފުންގެ އާއިލާ މީހުން ގެނައުމަށް މަޖުބޫރުކުރި ކަމަށާއި، ޖަލްސާއަށް ނާންނަ މުވައްޒަފުންނާ މެދު ފިޔަވަޅުއަޅާނެކަމަށް ބުނެ ބިރުދައްކާފައިވާ ކަމަށެވެ. ދީދީ ވިދާޅުވީ އެތަނުން ފެނިގެން ދިޔައީ ފާޑެއްގެ ޑްރާމާއެއް ކުޅުނު މަންޒަރު ކަމަށެވެ.

ރައީސުލްޖުމްހޫރިއްޔާގެ ހެޔޮފުޅުކަމުން ކާޑު ލިމިޓް ކުރިންވެސް އޮތްގޮތަށް ރުޖޫއަކުރިކަމަށް ދެއްކުމަށް މަސައްކަތް ކުރި ކަމަށާއި، އެއީ ސީދާ ރައްޔިތުންނަށް އޮޅުވާލަން ވެގެން ކުރިކަމެއް ކަމަށް ދީދީ ވިދާޅުވިއެވެ.

ދީދީ ވިދާޅުވީ މަޖިލިސް ތެރެއިން ދެކެވެމުން އަންނަ ވާހަކައަކީ އާސަންދައަކީ އެންމެނަށް ދޭންޖެހޭ އެއްޗެއް ނޫންކަމުގެ ވާހަކަ ކަމަށާއި، އާސަންދައާއި ކާޑުގެ ސަބްސިޑީވެސް ދޭންޖެހޭނީ ހައްގުވެރި ފަރާތަށް ކަމަށެވެ. އެހެންކަމުން އާސަންދަ ކަނޑާލުމުގެ ވިސްނުން ސަރުކާރުން ގެންގުޅޭއިރު، އެންސްޕާއިން އާސަންދަ އުވާލަން އިއުލާން ކުރުމުން ރައްޔިތުންނަށް އިންތިހާއަށް ކަންބޮޑުވެ އެވާހަކަ ދައްކާނެ ކަމަށެވެ.

އަދި މިއާއެކު އަނެއްކާވެސް ސަރުކާރުން ޑްރާމާއެއް ކުޅުއްވާނެ ކަމަށާއި، ކުއްލިއަކަށް އެއީ ރައީސްގެ ސިޔާސަތެއް ނޫންކަމަށް ބުނެ ސަރުކާރުން އެވާހަކަ ދައްކާނެ ކަމަށެވެ.

ދީދީ ވިދާޅުވީ މި ސަރުކާރުން ކުރާ ކަންކަން ސިފަވަނީ ތާކުންތާކު ނުޖެހޭ ބޮޑު ޖޯކެއްގެ ގޮތުގައި ކަމަށެވެ. ދެރައީ ރާއްޖޭގެ މާލީ ކަންކަން މެނޭޖްނުކުރެވުމުގެ ސަބަބުން ފައިނޭންޝިއަލް އިންސްޓިޓިއުޝަނުންނާއި ބޭންކްތަކުން ކަންބޮޑުވުން އޮއްވާ ގައުމީ ބޭންކުގެ އަގުވައްޓާލުމުގެ ސަބަބުން ރައްޔިތުންނާއި ބޭންކަަށް އޮތް މާލީ ލޮޅުންތައް އައުމަކީ ކަންބޮޑުވާކަމެއް ކަމަށެވެ.