ރައްޔިތުންނަށް އޮތް އެންމެ ބޮޑު އެއް ބިރަކީ ރައީސް މުއިއްޒު ވައުދެއް ވެދާނެ ކަމުގެ ބިރު: މެންބަރު ޒިޔާދު

ރާއްޖޭގެ ރައްޔިތުންނަށް މިއަދު އޮތް އެންމެ ބޮޑު ބިރަކީ އެކި ކަންކަމުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވައުދުވެވަޑައިގަތުން ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

އާދިއްތަ ދުވަހުގެ ރޭ ކުރިއަށް ގެންދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާގައި މެންބަރު ޒިޔާދު ވިދާޅުވީ ރައްޔިތުންގެ ލަބާޔާ މަންފާއަށް އަދި ގައުމުގެ ކުރިމަގަށް ރައީސް މުއިއްޒު ވައުދުފުޅެއް ވެވަޑައިގެންފިނަމަ އެއީ ރައްޔިތުންނަށް އޮތް ވަރަށް ބޮޑު ބިރެއް ކަމަށެވެ. އެއީ އެމަނިކުފާނު ވައުދުފުޅެއް ވެވަޑައިގެންފިނަމަ އެކަމެއްދާނީ ދިމާ އިދިކޮޅަށް ކަމަށާއި، އެމަންޒަރު ގައުމުން މިއަދު ފެންނަމުންދާ ކަމަށް މެންބަރު ޒިޔާދު ވިދާޅުވިއެވެ.

މެންބަރު ޒިޔާދު ވިދާޅުވީ މަސްވެރިންނާ، ކައުންސިލަރުންނަށް މިކަންކަން ވަރަށް ރަނގަޅަށް ސާފުވާނެ ކަމަށެވެ.

ރައީސް މުއިއްޒުގެ ސަރުކާރުން ވެރިކަމަށް އައީ ކައުންސިލަރުން ބާރުވެރިކޮށް، މަސްވެރިންނަށް ވަގުތުން ފައިސާ ދީ، ހަމަ އަގު ހޯދައިދިނުމަށެވެ. ނަމަވެސް މިސަރުކާރާއެކު ކައުންސިލްތަކުގެ ބާރު ކެނޑޭގޮތަށް ގާނޫނު އިސްލާހު ކުރުމަށް މަސައްކަތް ކުރަމުންދާއިރު، މަސްވެރިންގެ އަތުން ގަންނަ މަހުގެ އަގު ވަނީ ކުޑަކޮށްފައެވެ. އަދި މަސްވެރިންނަށް ފައިސާ ނުދޭ މައްސަލަ ބޮޑުވެ، މިސަރުކާރާ ދެކޮޅަށް މަސްވެރިން ސިލްސިލާ މުޒާހަރާތަކެއް ވެސް ކުރިއަށް ގެންގޮސްފައިވެއެވެ.

މެންބަރު ޒިޔާދު ވިދާޅުވީ ބާރަށް އަޑުއުފުލުމުން ރައީސް މުއިއްޒަށް އަޑު އިވޭ ކަމަށާއި، ބީއެމްއެލްގެ ކާޑު ލިމިޓަށް އާދިއްތަ ދުވަހުގެ ހެނދުނު ގެނައި ބަދަލުތައް އާދިއްތަ ދުވަހުގެ ހަވީރު އުވާލުމުން އެކަން ހާމަވާ ކަމަށެވެ. އެހެންކަމުން ރަށްރަށުގެ އަޑު ގަދަކޮށް، ކައުންސިލަރުން ވެސް މަގުމައްޗަށް ނުކުންނަންޖެހޭ ކަމަށާއި، އެމަސައްކަތް ކޮށްފިނަމަ ކައުންސިލަރުންގެ ބާރު ކަނޑުވާލުމަށް ގާނޫނަށް ގެންނަ އިސްލާހުތައް އުނބަށް ޖެހުމަކީ އެކަށީގެންވާ ކަމެއް ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ މިއަދު ގެއްލޭ އެއްޗެއް އިޔާދަވާން ވަރަށް ވަގުތު ނަގާ ކަމަށާއި، ރައްޔިތުންނަށް މީގެ ކުރިން ގާނޫނުންް ހޯދާފައިވާ ބާރުތައް ނެގުމުގެ ފުރުސަތު ދީގެން ނުވާނެ ކަމަށެވެ.