ނައިބު ރައީސް ހުސެއިން މުހައްމަދު ލަތީފް އެކްސްގައި ހޮނިހިރު ދުވަހު ކުރެއްވި ޕޯސްޓަކާ އެކު އެކި ފަރާތްތަކުން އެކި ގޮތަށް އެ ބަސްކޮޅު މާނަ ކުރަން ފަށައިފިއެވެ.
އެމަނިކުފާނުގެ ޕޯސްޓުގައި ވިދާޅުވެފައި ވަނީ، ކޮންމެ ކަމަކަށް ވެސް ވަގުތެއް ކަނޑައެޅިފައިވާ ކަމަށާއި އެއްވެސް ކަމަކީ ދާއިމަށް ތިމާގެ ހައްގެއް ކަމަށް ނުދެކުމަށެވެ.
”ކޮންމެ ކަމަކީވެސް ވަގުތު ކަނޑައެޅިގެންވާ ކަމެކެވެ. އެއީ ދުނިޔޭގެ އާދައެވެ. އެ ލިބުނު ވަގުތަށް އިޙްތިރާމުކޮށް ޝުކުރުވެރި ވުމުން ލިބޭ ޤަދަރާއި، އުފާވެރިކަން މާ ރަނގަޅެވެ. އެއްވެސް ކަމަކީ ދާއިމަށް ތިމާގެ ހައްޤެއް ކަމަށް ނުދެކޭށެވެ" ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރުކަން ވެސް ކުރެއްވި ހުސެން ލިޔުއްވާފައިވެއެވެ.
ނައިބު ރައީސް މި ބަސްކޮޅުގެ މާނަ ސާފު ނުވި ކަމުގައި ވިޔަސް ބައެއް ފަރާތްތަކުން ބުނެފައިވަނީ "ވަރަށް ރަނގަޅު ބަސްކޮޅެއް" ކަމުގައެވެ.
ކޮމެންޓް ކުރި ބައެއް މީހުން ވަނީ ސިޔާސީ މާނައެއްގައި މި ބަސްކޮޅާ މެދު ދެކިފައެވެ. އެގޮތުން "ވެރިކަމަށް ދަހިވެތިވެ މުއިއްޒު އަށް ގައްދާރު ނުވުމަށް" ވެސް މީހަކު ބުނެފައިވެއެވެ.
އެހެން މީހަކު ބުނި ގޮތުގައި ރައީސް "މުއިއްޒު އުޅުއްވަނީ ހުސެއިން މަގާމުން ވަކި ނުކުރެވިގެން ކަމަށާއި، މުއިއްޒުގެ އުނދަގޫ ވަރަށް ބޮޑުތޯ" އަހާފައިވެއެވެ.
މުއިއްޒުގެ ރަނިންމޭޓްގައި ގޮތުގައި ހުސެއިން އަށް ފުރުސަތު ލިބިވަޑައިގަތީ ކުރީގެ ރައީސް ޔާމީންގެ ރެކޮމެންޑޭޝަން އެއްގެ ގޮތުގައި ކަމަށް ޕީޕަލްސް ނޭޝަނަލް ފްރަންޓް (ޕީއެންއެފް) ގެ ފްރަންޓް އޮފީސް ޖަލްސާ ގައި ވާހަކަފުޅު ދައްކަވަމުން ޔާމީން ވިދާޅުވެފައިވެއެވެ.
ރައީސް ޔާމީންގެ ވަރަށް އަރިސް ބޭފުޅެއްގެ ގޮތުގައި ހުސެއިން ފާހަގަވެފައި އޮތް ނަމަވެސް، އިންތިޚާބު ކާމިޔާބުވުމާއެކު ރައީސް ޔާމީންވަނީ މުއިއްޒު ސަރުކާރާ ދުރަށް ވަޑައިގެންފައެވެ. އަދި މުއިއްޒުގެ ވެރިކަން ހިނގަމުންދާ ގޮތާ މެދު މިހާރު އެންމެ ބޮޑަށް ފާޑުވިދާޅުވާ ބޭފުޅަކީ ވެސް ރައީސް ޔާމީން ކަން ފާހަގަ ކުރެވެއެވެ.
ފަހުގެ ތާރީޚްގައި ރައީސުންނާއި ނައިބު ރައީސުންގެ މެދުގައި ކޯޅުންތައް އުފެދި ވެރިކަމަށް ލޮޅުން އަރާ ވަރަށް ރާއްޖޭގައި ކަންކަން ވަނީ ހިނގާފައެވެ.
