މެންޗެސްޓަރ ސިޓީގެ ކުރީގެ ކެޕްޓަން އިލްކާއީ ގުންޑޮގާން، އަލުން އެ ކުލަބަށް ސޮއި ކޮށްފި އެވެ.

ސިޓީ އާއެކު ސޮއި ކޮށްފައިވާ އެއްބަސްވުން ހަމަވުމުން، އުމުރުން 33 އަހަރުގެ ކުޅުންތެރިޔާާ ބާސެލޯނާ އަށް ބަދަލުވީ މިދިޔަ އަހަރު އެވެ. ބާސެލޯނާ އާއެކު ގުންޑޮގާން ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގައި ބާކީ އެއް އަހަރު އޮއްވައި، ބާސެލޯނާ އިން ބޭނުން ވަނީ ގުންޑޮގާން ދޫކޮށްލަން ކަމަށާއި، އޭނާ ވެސް ހުރީ އެހެން ކުލަބަކަށް ބަދަލުވާން ބޭނުންވެފަ އެވެ.

ބާސެލޯނާ ދޫކޮށް ގުންޑޮގާން އަލުން ސިޓީ އަށް ބަދަލުވާން ބޭނުންވީއިރު، ސިޓީން ވެސް އޮތީ އެކަމަށް އެއްބަސްވެގެންނެވެ. ގުންޑޮގާން އަލުން ސިޓީ އަށް ބަދަލުވެފައިވާއިރު، އެ ކުލަބާ އެކު އޭނާ ސޮއި ކުރީ އެއް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، އިތުރު އެއް އަހަރަށް އެއްބަސްވުން އައު ކުރުމުގެ ފުރުސަތު ވެސް އޮންނާނެ އެވެ.

ދެ ވަނަ ފަހަރަށް ސިޓީ އަށް ބަދަލުވުމަށްފަހު ވާހަކަ ދައްކަމުން ގުންޑޮގާން ބުނީ، އަލުން އެނބުރި އޭނާގެ ގެއަށް އާދެވުމުން އުފާވާ ކަމަށެވެ. މީގެ ކުރިން ވެސް ސިޓީ އާއެކު ކާމިޔާބީތަކެއް ހޯދާފައިވާ ގުންޑޮގާން ބުނީ، ސިޓީ އަކީ ދުނިޔޭގައި އޮތް އެންމެ މޮޅު ކުލަބު ކަމަށެވެ.

މީގެ ކުރިން ސިޓީ ގައި ގުންޑޮގާން ހަތް ސީޒަން ހޭދަކޮށްފައިވާއިރު، އޭނާ ވަނީ އެ ކުލަބަށް ކުޅެދިން 304 މެޗުގައި 60 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ 14 ތައްޓެއް ކާމިޔާބު ކޮށްފަ އެވެ. ސިޓީގެ ކެޕްޓަންކަން ވެސް ކޮށްފައިވާ ގުންޑޮގާން ވަނީ ބާސެލޯނާ އަށް ބަދަލުވެ އެ ކުލަބަށް ކުޅެދިން 51 މެޗުގައި ފަސް ލަނޑު ޖަހައިފަ އެވެ.