އިޒްރޭލުން ޚާން ޔޫނިސް އާއި ދާރުލް ބަލާހް ގައި 12 ފަލަސްތީން މީހުން ޝަހީދު ކޮށްލައިފި
ދާރުލް ބަލާހްގެ އިރުމަތީ ސަރަޙައްދުތަކުގައި ހަމާސްގެ ހަނގުރާމަވެރިން ގެންދަނީ އިޒްރޭލުގެ ބާރުތަކާ ކުރިމަތިލާ ރައްދު ހަމަލާ ދެމުން ކަމަށް ޚަބަރުތައް ބުނެއެވެ.
ޣައްޒާގެ ދާރުލް ބަލާހް އިން ފަލަސްތީން މީހުން އެތަން ހުސްކޮށް ދަނީ
އިޒްރޭލުން ހުކުރު ދުވަހު ހެދުނު ހަމަލާދީ ޚާން ޔޫނިސް އާއި ދާރުލް ބަލާހް ގައި 12 ފަލަސްތީން މީހުން ޝަހީދު ކޮށްލައިފިއެވެ.
ހުކުރު ދުވަހު ފަލަސްތީނުގެ އެތައް ބަޔަކު ޝަހީދު ކޮށްލިއިރު ޚާން ޔޫނިސްއާއި ދާރުލް-ބަލާހުގައި އިޒްރޭލުން ހިންގާ އަނިޔާވެރި އަމަލުތައް ގެންދަނީ ފުޅާ ކުރަމުންނެވެ.
އިޒްރޭލު ސިފައިން ދާރުލް ބަލާހް ސިޓީއަށް ވަނީ ވަދެގަނެފައެވެ. އިޒްރޭލު ސިފައިންގެ ހަރަކާތްތް އިރުމަތީ ސަރަޙައްދުގައި ވަރުގަދަ ކޮށްފައިވާ އިރު އެ ސިޓީގައި ދިރިއުޅޭ ފަލަސްތީނުގެ އާއިލާތައް ވަނީ ހުޅަނގު ފަރާތުގައި ބަންދުވެ ތާށިވެފައި ކަމަށް އަލް ޖަޒީރާ އިން ރިޕޯޓް ކޮށްފައި ވެއެވެ.
އެ ސަހަރަހައްދުގެ މީހުންނާ ހަވާލާދީ އަލް ޖަޒީރާ އިން ބުނެފައިވަނީ ހުކުރު ވިލޭރެއާ ހުކުރު ދުވަހުގެ ހެނދުނު އެތައް ފަހަރެއްގެ މަތިން އެ ސިޓީ އަށް އިޒްރޭލް ސިފައިން ބޮން އަޅާފައިވާ ކަމަށެވެ. ހުއްޓުމެއް ނެތި ބާރު ގޮވުންތަކުގެ އަޑު އިވެމުންދާ ކަމަށް އެމީހުން ބުނެފައިވެއެވެ. ކޮންމެ ގަޑިއިރަކު އިޒްރޭލުގެ ޑްރޯންތަކުގެ އަޑު އިވެމުންދާ ކަމަށްވެސް ބުނެއެވެ. އެ ސިޓީގެ އިރުމަތީ ސަރަޙައްދުތަކުގައި ހަމާސްގެ ހަނގުރާމަވެރިން ގެންދަނީ އިޒްރޭލުގެ ބާރުތަކާ ކުރިމަތިލާ ރައްދު ހަމަލާ ދެމުން ކަމަށް ޚަބަރުތައް ބުނެއެވެ.
މަންޒަރު ދުށް މީހުން ބުނާ ގޮތުގައި އިޒްރޭލް ސިފައިން ވަނީ ޚާން ޔޫނިސް އަށް އަރާ އެ ސިޓީގައިވެސް ހަރަކާތްތެރިވާން ފަށާފައެވެ. އިޒްރޭލު ސިފައިން އެތަނުގެ 19 ބްލޮކް ހުސްކުރުމަށް އަމުރުކޮށްފައިވާ ކަމަށް ރިޕޯޓްތައް ބުނެއެވެ. އެ އަމުރާ އެކު އެތަންތަނުގެ ރައްޔިތުން މިހާރު ދަނީ ޚާން ޔޫނިސްގެ ހުޅަނގުން އޮންނަ މަވާސީއާ ކައިރިއަށް ހިޖުރަ ކުރަމުންނެވެ. އެމީހުން ބުނެފައިވަނީ ބިރުވެރި ކަމާ، ހާސްކަމާ ވަރުބަލި ކަމާ ނުތަނަވަސްކަން މުޅި ސަރަހައްދުގެ އެންމެންނަށް އިހްސާސް ކުރެވިފައިވާ ކަމަށެވެ.
އަނެއްކޮޅުން ޕޯލިއޯ ބަލި ޣައްޒާ އިން ފެނިފައިވުމާއެކު ބަލިފެތުރުން ކޮންޓްރޯލް ކުރެވޭތޯ ދުނިޔޭގެ ސިއްހަތު ޖަމްއިއްޔާ އާއި އދ ގެ ކަމާ ބެހޭ އިދާރާތަކުން މަސައްކަތް ކުރަމުންދާ ކަމަށް ވަނީ ބުނެފައެވެ. ފަލަސްތީނު ރެފިއުޖީންނާބެހޭ އދ. ގެ އޭޖެންސީ (އަންރުވާ) އިން ބުނެފައިވަނީ މި މަހުގެ ފަހުކޮޅު ޣައްޒާގެ ކުޑަކުދިންނަށް ޕޯލިއޯ ވެކްސިން ދޭން ފަށާނެ ކަމަށެވެ.
އދ. އަށް ކަނޑައަޅާފައި ހުންނަވާ އެމެރިކާގެ ސަފީރު ލިންޑާ ތޯމަސް-ގްރީންފީލްޑް ވަނީ އދ. ގެ ސަލާމަތީ މަޖިލީހުގައި ވާހަކަދައްކަވަމުން މެދުއިރުމަތީގައި ހަމަޖެހުން ގެނައުމަށް ގޮވާލައްވާފައެވެ. އަދި ހަނގުރާމަ ހުއްޓާލުމާއި ހައްޔަރުކޮށްފައިވާ މީހުން ދޫކޮށްލުމުގެ އެއްބަސްވުމެއް "މިހާރު ފެންނަ ހިސާބުގައި އޮތް ކަމަށް" އޭނާ ވިދާޅުވެފައިވެއެވެ.
އޮކްޓޯބަރު 7 ގެ ފަހުން އިޒްރޭލުން ޣައްޒާއަށް ދެމުންދާ ހަމަލާތަކުގައި މަދުވެގެން 40،265 މީހުން ޝަހީދުވެ، 93،144 މީހުން ވަނީ ޒަޚަމްވެފައިވެއެވެ.
