ބާ ތުހުމަތުތަކެއްގެ މައްޗަށް ސުވާލެއްވެސް ކޮށްލުމެއް ނެތި މަޤާމުން ވަކި ކުރަން އުޅެނީ ކުށްވެރިންނަށް ދެމިގަނެވޭނެ ލޯވަޅުތައް ބަންދުކުރީތީ: ޕީޖީ
އޭނާ މަޤާމުން ވަކިކުރަނީ ޤާނޫނާ ޚިލާފު ކަމެއް ކޮށްގެން، ނުވަތަ ޒިންމާ އަދާ ނުކޮށްގެނެއް ނޫންކަމަށް ވިދާޅުވި
ޕްރޮސެކިއުޓަރ ޖެނެރަލް ހުސައިން ޝަމީމް
ބައު ތުހުމަތުތަކެއްގެ މައްޗަށް ސުވާލެއްވެސް ކޮށްލުމެއް ނެތި މަޤާމުން ވަކި ކުރަން އުޅެނީ ކުށްވެރިންނަށް ދެމިގަނެވޭނެ ތަފާތު ލޯވަޅުތައް ބަންދުކުރީތީކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވީ އިތުބާރު ނެތްކަމުގެ މައްސަލައާ ގުޅޭގޮތުން ރާއްޖެއެމްވީއަށް ދެއްވި ބަސްދީގަތުމެއްގައެވެ.
ޝަމީމް ވިދާޅުވީ، އޭނާ މަޤާމުން ވަކިކުރަނީ ޤާނޫނާ ޚިލާފު ކަމެއް ކޮށްގެން، ނުވަތަ ޒިންމާ އަދާ ނުކޮށްގެނެއް ނޫން ކަމަށެވެ.
ހަގީގަތުގައި މަޤާމުން ވަކި ކުރަން މަސައްކަތް ކުރަމުންދަނީ ޒިންމާ އަދާ ކުރުމުގެ ތެރެއިން ކުރެވިފައިވާ މަސައްކަތްތަކާ ގުޅިގެންކަމަށް ޝަމީމް ވިދާޅުވިއެވެ. އެގޮތުން ކޮރަޕްޝަނާއި ނުފޫޒުން ކަންކަން ކުރަން އުނދަގޫ ނިޒާމެއް ޤާއިމު ކުރުމާއި، ކުށްވެރިންނަށް ނިޒާމުގެ ތެރެެއިން ދެމިގަނެވޭނެ ލޯވަޅުތައް ބަންދު ކުރުން ފަދަ ކަންކަމަކީ އޭނާ މަޤާމުން ވަކި ކުރުމަށް މަސައްކަތް ކުރާ ސަަބަބުތައްކަން ޝަމީމް ފާހަގަ ކުރެއްވިއެވެ.
ޝަމީމް އިތުރަށް ވިދާޅުވީ، އޭނާގެ އިތުބާރު ނެތްކަމަށް ބުނެ ކޮމިޓީން ބަލަމުންދާ މައްސަލައަކީ އަސާސެއް ނެތް ބައު ތުހުމަތުތަކެއްގެ މައްޗަށް ބަލަމުންދާ މައްސަލައެއް ކަމަށެވެ. އެގޮތުން އެ މައްސަލަތަކާ ގުޅިގެން ސަރުކާރުންވެސް އަދި މަޖިލީހުންވެސް އެއްވެސް ސުވާލެއްވެސް ކޮށްލާފައިނުވާކަން ޝަމީމް ފާހަގަ ކުރެއްވިއެވެ.
ޝަމީމް ވަނީ އޭނާ މަޤާމުން ވަކިކުރައްވަން ބޭނުންފުޅުނަމަ ވަކިކުރެއްވިދާނެ ކަމަށާއި، ނަމަވެސް އޭނާ ލައްވާ ޤާނޫނާ ޚިލާފު ކަމެއް ނުކުރުވޭނެކަމަށްވެސް ވިދާޅުވެފައެވެ.
މައްސަލަތަކުގެ ތަފްސީލުތައް ހިއްސާ ކުރައްވަމުން ޝަމީމް ވަނީ އޭނަގެ މައްޗަށް ހުށަހެޅިފައިވާ ތުހުމަތުތަކުގައި ފާހަގަކޮށްފައިވާ ކަންކަމަށް ޕީޖީ އޮފީހުގެ ވެބްސައިޓާއި، އަހަރީ ރިޕޯޓުތަކާއި މަޖިލީހުގެ ޖަލްސާތަކުގެ ޔައުމިއްޔާއިންވެސް ޖަވާބު ފެންނަން ހުންނާނެކަމަށް ވިދާޅުވެފައެވެ.
އެހެންނަމަވެސް އެ ކަންކަމުގެ އެއްވެސް ދިރާސާއެއްވެސް ކުރައްވާފައި ނެތްކަން މި މައްސަލައިން ފެންނަން އޮތްކަމަށް ޝަމީމް ވިދާޅުވިއެވެ.
