ބާސެލޯނާ އަށް ކުޅެމުން އަންނަ ޖަރުމަނުގެ އިލްކާއީ ގުންޑޮގާން ގެނައުމަށް، އޭނާގެ ކުރީގެ ކުލަބު މެންޗެސްޓަރ ސިޓީ އަށް ބަދަލުވުމުގެ ފުރުސަތު ބޮޑު ކަމަށް މީޑިއާ ރިޕޯޓުތައް ބުނެފި އެވެ.

ސިޓީ އާއެކު ސޮއި ކޮށްފައިވާ އެއްބަސްވުން ހަމަވުމުން، އުމުރުން 33 އަހަރުގެ ކުޅުންތެރިޔާާ ބާސެލޯނާ އަށް ބަދަލުވީ މިދިޔަ އަހަރު އެވެ. ބާސެލޯނާ އާއެކު ގުންޑޮގާން ސޮއި ކޮށްފައި ވަނީ ދެ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގައި ބާކީ އެއް އަހަރު އޮއްވައި، ބާސެލޯނާ އިން ބޭނުން ވަނީ ގުންޑޮގާން ދޫކޮށްލަން ކަމަށާއި، އޭނާ ވެސް ހުރީ އެހެން ކުލަބަކަށް ބަދަލުވާން ކަމަށް ރިޕޯޓުތައް ބުނެ އެވެ.

ގުންޑޮގާން ބާސެލޯނާ ދޫކޮށްލާނީ ހިލޭ ޓްރާންސްފާއެއްގަ އެވެ. މިވަގުތު މެންޗެސްޓަރ ސިޓީން އޭނާ ހޯދުމުގެ މަސައްކަތް ކުރަމުން އަންނަ ކަމަށާއި، އެކަމާ ގުޅުން ހުރި ވާހަކަތައް ދަނީ ކާމިޔާބު ކަމާއެކު ދެކެވެމުން ކަމަށް ވެސް ރިޕޯޓުތައް ބުނެ އެވެ. އެގޮތުން ސިޓީގެ ކޯޗު ޕެޕް ގާޑިއޯލާ ވެސް ހުރީ އަލުން ގުންޑޮގާން ގެންނަން ބޭނުންވެފައި ކަމަށް ރިޕޯޓުތައް ބުނެ އެވެ. އެހެންކަމުން ގުންޑޮގާން އަލުން ސިޓީ އަށް ބަދަލުވުމުގެ ފުރުސަތު ބޮޑު ކަމަށް ވެސް ވަނީ ބުނެފަ އެވެ.

މީގެ ކުރިން ސިޓީ ގައި ގުންޑޮގާން ހަތް ސީޒަން ހޭދަކޮށްފައިވާއިރު، އޭނާ ވަނީ އެ ކުލަބަށް ކުޅެދިން 304 މެޗުގައި 60 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ 14 ތައްޓެއް ކާމިޔާބު ކޮށްފަ އެވެ. ސިޓީގެ ކެޕްޓަންކަން ވެސް ކޮށްފައިވާ ގުންޑޮގާން ވަނީ ބާސެލޯނާ އަށް ބަދަލުވެ އެ ކުލަބަށް ކުޅެދިން 51 މެޗުގައި ފަސް ލަނޑު ޖަހައިފަ އެވެ.