މި ސަރުކާރުން މަސްތުވާތަކެތީގެ ފަރުވާގެ ނިޒާމް ޕެރަލައިޒްކޮށްލައިފި - މައުރޫފް
20 އޯގަސްޓު 2024 | އަންގާރަ 05:52މައުރޫފް ވިދާޅުވީ އަތުލައިގަންނަ މަސްތުވާތަކެތީގެ އަދަދުތައް ވަރަށް ހާމަކަން ބޮޑުގޮތެއްގައި ފެންނަން ޖެހޭނެ ކަމަށާއި އެކަން މި ސަރުކާރަށް ނުކުރެވޭ ކަމަށް
އެމްޑީޕީގެ ހަަވަރުބެރު ޕެނަލް ޑިސްކަޝަންގެ ތެރެއިން
މި ސަރުކާރުން މަސްތުވާތަކެތީގެ ފަރުވާގެ ނިޒާމް ޕެރަލައިޒްކޮށްލާފައިވާ ކަމަށް އެމްޑީޕީގެ ޤާނޫނީ ޓީމްގައި ހިމެނިވަޑައިގަންނަވާ އަލްއުސްތާޛް އަޙްމަދު މައުރޫފް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީގެ ހަވަރުބެރު ޕެނަލް ޑިސްކަޝަންގައި ވާހަކަދައްކަވަމުންނެވެ.
އޭނާ ވަނީ މިހާރު މަސްތުވާތަކެތި އަތުލައިގަނެވޭ މިންވަރު މަދުކަމަށާއި މަސްތުވާތަކެތި ޓްރެފިކްކުރުން ހުއްޓުވުމަށް އެކަށީގެންވާ މަސައްކަތްތަކެއް ނުކުރެވޭ ކަމަށް ވިދާޅުވެފައެވެ. މައުރޫފް ވިދާޅުވީ އަތުލައިގަންނަ މަސްތުވާތަކެތީގެ އަދަދުތައް ވަރަށް ހާމަކަން ބޮޑުގޮތެއްގައި ފެންނަން ޖެހޭނެ ކަމަށާއި އެކަން މި ސަރުކާރަށް ނުކުރެވޭ ކަމަށެވެ. މައުރޫފް ވިދާޅުވީ މަސްތުވާތަކެތި އަތުލައިގަންނަ މިންވަރަކީ މަސްތުވާތަކެތި އެތެރެކުރާ މިންވަރު ދެނެގަނެވޭ ކަމެއް ނޫން ކަަމަށެވެ. މަސްތުވާކެތި އެތެރެކުރަނީ ސްމަގްލްކޮށްގެން ނުވަތަ ފޮރުވައިގެން ކަމަށް ވާއިރު މަސްތުވާތަކެތި އަތުލައިގަންނަ އަދަދަށް ވުރެ މާ ބޮޑު އަދަދެއް އެތެރެވުން އެކަށީގެންވާ ކަމަށް އޭނާ ވިދާޅުވިއެވެ. ނަމަވެސް މަސްތުވާތަކެތި އަތުލައިގަނެވޭ މިންވަރަށް ބަލާފައި ފުލުހުންގެ މަސައްކަތް ދެނެގަނެވޭ ކަމަށް މައުރޫފް ވަނީ ވިދާޅުވެފައެވެ. މަސްތުވާތަކެތި އެތެރެކުރުން ހުއްޓުމަށާއި ފަރުވާގެ ނިޒާމް ހަރުދަނާ ކުރުމަށް މިސާރު އެކަށީގެންވާ ވަރަށް މަސައްކަތް ނުކުރާ ކަމަށާއި ކުރާ ނަމަ އެކަން ފެންނާނެ ކަމަށް މައުރޫފް ވިދާޅުވިއެވެ.
މީގެ އިތުރުން މަސްތުވާތަކެއްޗާއި ބެހޭ ޤާނޫނަށް ގެންނަ އިސްލާހުތަކަކީ އެކަށީގެންވާ ސިޔާސަތެއް އޮވެގެން ކުރާ ކަމެއް ނޫން ކަމަށް އޭނާ ވިދާޅުވިއެވެ. އެކަމުގެ ސަބަބުން ނިޒާމީ ބަދަލެއް އަންނަ މަންޒަރު ފެނިގެން ނުދާ ކަަމަށާއި އެ ބަދަލުތަކާއި އެކު ހޯމް މިނިސްޓަރ ބަދަލުވުން އެކަށީގެންވާ ކަމަށް މައުރޫފް ވިދާޅުވިއެވެ. މަސްތުވާތަކެތީގެ މައްސަލަތަކުގައި ދޭ އަދަބުތައް ހަރުކަށިކުރަން އެކަނި ވިސްނައިގެން އެ މައްސަލަ ހައްލު ނުކުރެވޭނެ ކަަމަށް އޭނާ ވިދާޅުވިއެވެ. އެއީ މަސްތުވާތަކެތި ޓްރެފިކްކުރުމާއި ބޭނުންކުރުން ހުއްޓުވުމުގައި ބައިނަލްއަޤުވާމީ މުޖުތަމައުއިން އަމަލުކުރާ ގޮތާއި ޚިލާފުކަންތައްތައް ކަމަށް މައުރޫފް ވިދާޅުވިއެވެ.
