ހެލްތު މިނިސްޓަރު ޑރ. އަބްދުﷲ ހަލީލް ހުޅުމާލެއިން 3.1 މިލިއަން ރުފިޔާގެ ފްލެޓެއް ބައްލަވައިގެންފިއެވެ.

ހަލީލް ބައްލަވައިގަތީ ހުޅުމާލޭގެ އެފްޑަބްލިއު ރެސިޑެންސްގެ ފްލެޓެކެވެ.

މިކަމާއި ގުޅިގެން ބައެއް މައުލޫމާތުތައް ސާފުކުރުމަށް ރާއްޖެއެމްވީން ގުޅާލުމުން މިނިސްޓަރ ވަނީ އެ ކަމުގެ މައުލޫމާތު އެކްސްގައި ހިއްސާކުރައްވާފައިވާނެ ކަަމަށް ވިދާޅުވެފައެވެ.

ހަލީލް އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ އެފް ޑަބްލިއު ކޮންސްޓްރަކްޝަން އިން ބިނާ ކުރި ފްލެޓަށް ފައިސާ ދައްކަވަން ފެއްޓެވީ 2018އިގައި ކަމަށެވެ. އަދި އެ އެއްބަސްވުމުގައި ސޮއިކުރައްވާފައި ވަނީ 18 އޮގަސްޓް 2018އިގައި ކަމަށް ޚަލީލް ވިދާޅުވިއެވެ. އަދި ފްލެޓް ބައްލަވައިގަތުމަށް ބޭނުންވާ އިތުރު ޚަރަދުކޮށްފައި ވަނީ ބީއެމްއެލް އިސްލާމިކް ބޭންކްގެ ލުއި ލޯނަކުން ކަމަށް ވެސް ހަލީލް ވަނީ ފާހަގަކުރައްވާފައެވެ. އެ ލޯނުގެ ފައިސާގެ ތެރެއިން މިއަދާއި ހަމައަށް ނުދައްކާ ވަނީ 1401892.90 ރުފިޔާ ކަމަށް ޚަލީލް ވިދާޅުވިއެވެ.

އެ ފްލެޓް ހަލީލްގެ ނަމަށް ބަދަލުކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަނީ ސިވިލްކޯޓަށް ހުށަހަޅާފައެވެ. އަދި މި ހިނގާ ޖުލައި މަހުގެ ހަތް ވަނަ ދުވަހު ސިވިލް ކޯޓުން ވަނީ 1،235 އަކަފޫޓްގެ އެ ފްލެޓްގެ އަގު ހަލީލް ދައްކަވާފައިވާ ކަމަށާއި، އެހެންކަމުން އެ ފްލެޓް ހަލީލަށް މިލްކުވާ ކަމަށް ކަނޑައަޅާފައެވެ. މި މައްސަލަ ސިވިލް ކޯޓަށް ހުށަހަޅާފައި ވަނީ 2023 ވަނަ އަހަރުގެ ޑިސެމްބަރު މަހު އެވެ.

ހަލީލަކީ ވަނީ ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރުން އަދާކުރައްވާފައެވެ. މީގެ އިތުރުން އޭނާ އަކީ ވިޔަފާރިވެރިއެކެވެ.