އަމާޒަކީ ދިރާސާކުރުމަށް ކުރާ ހޭދަ އިތުރުކޮށް ޕޮލިސީތައް އެކުލަވާލުމުގައި ދިރާސާތަކަށް ބަރޯސާވުން - ރައީސް މުއިއްޒު
ރަނގަޅު ދިރާސާ ނިޒާމެއް އޮތުމަކީ ޤައުމުގެ ކުރިއެރުމަށް މުހިންމުކަމެއް ކަމަށް އެމަނިކުފާނު ވިދާޅުވި
ރައީސް ޑރ.މުހައްމަދު މުއިއްޒު "ތެވެލި ބައިނަލްއަޤްވާމީ މަހާސިންތާ 2024" ފެށުމުގެ ރަސްމިއްޔާތުގައި ވާހަކަދައްކަވަނީ
ދިރާސާކުރުމަށް ކުރާ ހޭދަ އިތުރުކޮށް ޕޮލިސީތައް އެކުލަވާލުމުގައި ދިރާސާތަކަށް ބަރޯސާވުމަށް މަސައްކަތްކުރައްވާނެ ކަަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެ މަނިކުފާނު ވިދާޅުވީ "ތެވެލި ބައިނަލްއަޤްވާމީ މަހާސިންތާ 2024" ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
ދިރާސާތަކުގެ އަލީގައި ކުރިމަގު ބައްޓަންކުރުމަށް އިސްކަންދެއްވާނެ ކަމަށް ރައީސް ވަނީ ވިދާޅުވެފައެވެ. ދިރާސާ ކުރާ ފަަރާތްތަކާއި ޕޮލިސީ އެކުލަވާލާ ފަރާތްތަކާއި ދެމެދުގައި އޮތް ގުޅުން ހަރުދަނާކުރުމަށް ވެސް މަސައްކަތް ކުރަމުންދާ ކަމަށް އެ މަނިކުފާނު ވިދާޅުވިއެވެ. އެކި ދާއިރާތަކުން ޕޮލިސީތައް އެކުލަވާލުމަކީ ހަމައެކަނި ސަރުކާރަށް އޮތް މަސައްކަތެއް ނޫންކަމަށާއި އެކަން ކުރުމަށް ސްޓޭކް ހޯލްޑަރުންނާއި އެކު މަޝްވަރާކުރަން ޖެހޭ ކަމަށް ޤަބޫލުކުރައްވާ ކަމަށް ޑރ.މުއިއްޒު ވިދާޅުވިއެވެ. ތަރައްޤީގެ ބިންގަލެއްގެ ގޮތުގައި، ދިރާސާކުރުމަށް ލޯބިކުރާ މުޖުތަމަޢެއް ބިނާކުރުމަށް މަސައްކަތް ކުރައްވާނެ ކަމަށް ވެސް ރައީސް ވަނީ ވިދާޅުވެފައެވެ. ދެމެހެއްޓެނެވި ތަރައްޤީ އާއި ތިމާވެއްޓާއި ގުޅުން ހުރި ދާއިރާތަކުން ދިރާސާކުރުމަށް ބޭނުންވާ ފައިސާ ހޯދުމަށް އިސްކަން ދެއްވާނެ ކަމަށާއި އިންވެސްޓްމެންޓްތައް ހޯދާދިނުމަށް މަސައްކަތްކުރައްވާނެ ކަމަށް ވެސް ރައީސް ވަނީ ވިދާޅުވެފައެވެ. ރަނގަޅު ދިރާސާ ނިޒާމެއް އޮތުމަކީ ޤައުމުގެ ކުރިއެރުމަށް މުހިންމުކަމެއް ކަމަށް އެމަނިކުފާނު ވިދާޅުވިއެވެ. ބައިނަލްއަޤުވާމީ ފެންވަރުގައި ތަޖުރިބާކާރުންގެ އެހީތެރިކަމާއި އެކު ދިރާސާކުރުން އިންތިހާ މުހިންމުކަމަށް އެ މަނިކުފާނު ވަނީ ފާހަގަކުރައްވާފައެވެ.
ސަރުކާރުން ނިންމާ ނިންމުންތަކަކީ ޒިންމާދާރު ނިންމުންތަކަކަށް ހެދުމަށް މަސައްކަތް ކުރައްވާ ކަމަށް ފާހަގަކުރައްވާ ރައީސް ވިދާޅުވީ މި ސަރުކާރުން ދަނީ ދިރާސާ ކުރުމުގެ ނިޒާމް ހަރުދަނާކުރުމަށް މަސައްކަތްކުރަމުން ކަމަށެވެ. އެގޮތުން ޤައުމީ ރިސާޗް ކައުންސިލެއް އުފެއްދުމަށް މި ސަރުކާރުން މަސައްކަތް ކުރަމުންދާ ކަމަށް ރައީސް ވަނީ ވިދާޅުވެފައެވެ. ރައީސް ވަނީ ދިރާސާކުރުން ކުރިއެރުވުމާއި އެކަމަށް އެއްބާރުލުންދިނުމާއި އަދި ސުވާލުކުރުމަށާއި ޢިލްމު ހޯދުމަށާއި ޤައުމު ކުރިއެރުވުމުގައި ހުރިހާ ފަރާތްތަކެއްގެ ބައިވެރިވުމާއި އެއްބާރުލުން ދިނުމުގެ މުހިންމުކަމަށް އަލިއަޅުވާލައްވާފައެވެ. އަދި އެކުގައި މަސައްކަތްކޮށް، ބަދަލުވަމުންދާ ދުނިޔޭގައި ރާއްޖެއަށް އީޖާދީގޮތެއްގައި ފާގަތިކަމާއެކު ކުރިއަރައި ދެވޭނެކަމަށް ދެކެވަޑައިގަންނަވާކަމުގައި ވެސް އެމަނިކުފާނު ވިދާޅިވިއެވެ.
މިއީ ޤައުމީ ޔުނިވަރސިޓީން އިންތިޒާމުކޮށްގެން ތެވެލި ބައިނަލްއަޤްވާމީ މަހާސިންތާ ބާއްވާ 7 ވަނަ ފަހަރެވެ. މި އަހަރުގެ މި މަހާސިންތާ ކުރިޔަށްދަނީ މި އޮގަސްޓްމަގުގެ 19އިން 20 އަށެވެ. މި އަހަރުގެ މަހާސިންތާގެ ތީމަކީ "ބްރިޖިންގ ބައުންޑަރީސް: އެކްސްޕްލޯރިންގ ސިނާޖީސް އެކްރޮސް ރިސާޗް ޑިސިޕްލިންސް" އެވެ.
