ޗެމްޕިއަން ޕީއެސްޖީން ލީގު ފެށީ މޮޅަކުން

އައު ސީޒަންގެ ފްރާންސް ލީގުގައި ކުޅުނު ފުރަތަމަ މެޗުން ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.

ހުކުރު ދުވަހުގެ ރޭ ލީގުގެ ފުރަތަމަ މެޗުގައި ޕީއެސްޖީ ނިކުތީ ލެ ހާވްއާ ދެކޮޅަށެވެ. ލެ ހާވްގެ އަމިއްލަ ދަނޑުގައި ކުޅުނު މެޗު ޕީއެސްޖީން ކާމިޔާބު ކޮށްފައި ވަނީ 4-1 އިންނެވެ. މެޗުގެ ފުރަތަމަ ހާފުގައި ޕީއެސްޖީން އެއް ލަނޑު ޖެހިއިރު، އަނެއް ލަނޑުތައް ޖެހީ ފަހު ހާފުގަ އެވެ.

މެޗު ފަށައިގެން ތިން ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ލީ ކަން އިން އެވެ. އޭނާ އެ ލަނޑު ޖެހީ ގޮންޒާލޯ ރާމޯސް ތަނަވަސްކޮށްދިން ފުރުސަތެއްގަ އެވެ. މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ލެ ހާވް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ޑިފެންޑަރު ގޯޓިއާ ލޮރިސް އެވެ.

މެޗުގައި ދެ ވަނަ ފަހަރަށް ޕީއެސްޖީ އަށް ލީޑު ނަގައިދިނީ 85 ވަނަ މިނެޓުގައި އޮސްމާން ޑެމްބެލޭ އެވެ. އޭގެ މިނެޓެއް ފަހުން ބާޑްލޭ ބާކޮލާ ވަނީ ޕީއެސްޖީގެ ތިން ވަނަ ލަނޑު ޖަހައި، އިތުރަށް ލީޑު ފުޅާ ކޮށްދީފަ އެވެ. މެޗުގައި ޕީއެސްޖީގެ ހަތަރު ވަނަ ލަނޑަކީ އެ ޓީމަށް ލިބުނު ޕެނަލްޓީއެއް ކާމިޔާބުކޮށްގެން 90 ވަނަ މިނެޓުގައި ރަންޑަލް ކޯލޯ މުއާނީ ޖެހި ލަނޑެކެވެ.

ލީގުގައި ޕީއެސްޖީގެ ދެ ވަނަ މެޗުގައި އެ ޓީމު ނިކުންނާނީ މޮންޓްޕެލިއާއާ ދެކޮޅަށެވެ.