މިހާރު ކުރިއަށްދާ ފ.އަތޮޅު ވޮލީ ބޯޅަ މުބާރާތުގައި ކުޅުނު ދެ ވަނަ މެޗުގައި ވެސް، ފީއަލީގެ ފިރިހެން ޓީމާއި އަންހެން ޓީމު މޮޅުވެއްޖެ އެވެ.

ބުދަ ދުވަހުގެ ހަވީރު މަގޫދޫ އައުޓް ޑޯ ވޮލީ ކޯޓުގައި ފީއަލީގެ ފިރިހެން ޓީމު ނުކުތީ ދަރަނބޫދޫއާ ދެކޮޅަށެވެ. އެ މެޗު ފީއަލީން ކާމިޔާބު ކުރީ ތިން ސެޓު އެއް ސެޓުންނެވެ. އެއީ މެޗުގެ ފުރަތަމަ ސެޓު ދަރަނބޫދޫ އިން ކާމިޔާބު ކޮށްފައި ވަނިކޮށް، ފަހަތުން އަރައި ތިން ސެޓު ހޯދައިގެންނެވެ.

މެޗުގެ ފުރަތަމަ ސެޓު ދަރަނބޫދޫ އިން ކާމިޔާބު ކުރީ 25-20 އިންނެވެ. ނަމަވެސް ފީއަލީން ވަނީ 17-25 އިން ދެ ވަނަ ސެޓު ކާމިޔާބު ކޮށްފަ އެވެ. ދެން ކުޅުނު ތިން ވަނަ ސެޓު ފީއަލީން 19-25 އިން ކާމިޔާބު ކުރިއިރު، ހަތަރު ވަނަ ސެޓު ކާމިޔާބު ކުރީ 18-25 އިންނެވެ.

މުބާރާތުގެ އަންހެން ޑިވިޝަންގައި ބުދަ ދުވަހުގެ ރޭ ފީއަލީ ނުކުތީ ދަރަނބޫދޫއާ ދެކޮޅަށެވެ. އެ މެޗު ފީއަލީން ކާމިޔާބު ކޮށްފައި ވަނީ ތިން ސެޓު ދެ ސެޓުންނެވެ. ވާދަވެރި ކުޅުމަށްކަށްފަހު މެޗުގެ ފުރަތަމަ ސެޓު ފީއަލީން ކާމިޔާބު ކުރީ 25-22 އިންނެވެ. ނަމަވެސް ދެން ކުޅުނު ދެ ވަނަ ސެޓު ދަރަނބޫދޫ އިން ވަނީ ފަރަގު ބޮޑުކޮށް ކާމިޔާބު ކޮށްފަ އެވެ. އެއީ ދެ ވަނަ ސެޓު 10-25 އަދި ތިން ވަނަ ސެޓު 12-25 އިންނެވެ. ނަމަވެސް ފީއަލީން ވަނީ 25-22 އިން ހަތަރު ވަނަ ސެޓު ކާމިޔާބު ކޮށްފަ އެވެ. ނަތީޖާ ނެރުމަށް ކުޅުނު ފަސް ވަނަ ސެޓު ފީއަލީން ކާމިޔާބު ކޮށްފައި ވަނީ 15-11 އިންނެވެ.

މުބާރާތުގައި ބުރާސްފަތި ދުވަހުގެ ހަވީރު އަދި ރޭގަނޑު ވެސް މެޗުތައް ކުރިއަށް ދާނެ އެވެ.