ޖަޕާންގެ ބޮޑު ވަޒީރު ފުމިއޯ ކިޝިދާ އޭނާގެ ޕާޓީގެ ރިޔާސަތައް އިތުރު ދައުރަކަށް ކުރިމަތި ނުލައްވާނެ ކަން އިއުލާން ކުރެއްވުމާއެކު ޖަޕާން އަށް އައު ބޮޑު ވަޒީރެއް އަންނާނެ ކަމަށް ބެލެވިއްޖެއެވެ.

ޖަޕާނުގެ ބޮޑުވަޒީރު ފުމިއޯ ކިޝިދާ ވިދާޅުވެފައިވަނީ ވެރިކަންކުރާ ލިބަރަލް ޑިމޮކްރެޓިކް ޕާޓީ (އެލްޑީޕީ) އަށް "އައު ފެށުމެއް" ބޭނުންވާތީ، އެޕާޓީގެ ވެރިޔަކަށް އަލުން އިންތިޚާބުވުމަށް ކުރިމަތިނުލައްވާނެ ކަމަށެވެ.

ސެޕްޓެމްބަރު މަހު އެލްޑީޕީ އަށް އައު ލީޑަރެއް އިންތިޚާބު ކުރުމުގެ ފުރުސަތު ދެއްވާ ބޮޑު ވަޒީރު ޕާޓިގެ ލީޑަރޝިޕް އިން ދުރަށް ވަޑައިގަންނަވާތީ އުރުމުން 67 އަހަރުގެ ކިޝީދާ ބޮޑު ވަޒީރުކަމުން އިސްތިއުފާ ދެއްވާނެ ކަމަށް ވަނީ ބެލެވިފައެވެ.

2021 އިން ފެށިގެން ޖަޕާންގެ ބޮޑުވަޒީރުކަން ކުރައްވަމުން ގެންދަވާ ކިޝިދާ މަގާމް ދޫކޮށްލައްވާނެ ކަމަށް ވިދާޅުވިއިރު ޕާޓީއާ ގުޅުންހުރި ކޮރަޕްޝަންގެ މައްސަލައަކާއި، ޖަޕާންގައި ދިރިއުޅުމުގެ ޚަރަދުތައް މައްޗަށް ދިއުމާއި، ޔެން ގެ އަގު ދަށްވަމުން ދިއުމާ ގުޅިގެން ކިޝިދާ އަށް ޖަޕާންގައި އޮތް ތާއީދު ވަރަށް ބޮޑަށް ދަށަށް ގޮސްފައިވާކަން ވަނީ ފާހަގަ ކުރެވިފައެވެ.

ސާވޭ ތަކުން ފެންނަ ގޮތުގައި ކިޝިދާގެ އެޕްރޫވަލް ރޭޓިން ވޭތުވެދިޔަ މަހު ވަނީ 15.5 އިންސައްތައަށް ދަށްވެފައެވެ. މިއީ 10 އަހަރަށްވުރެ ދިގު މުއްދަތެއްގައި ބޮޑުވަޒީރަކަން ކުރެއްވި ބޭފުޅަކަށް އެޕްރޫވަލް ރޭޓިން އެންމެ ދަށުން ލިބުނު ފަހަރުކަން ވަނީ މީޑިއާ ރިޕޯޓްތަކުގައި ފާހަގަ ކޮށްފައެވެ.

"ކުރިއަށް އޮތް ޕާޓީގެ ރައީސްކަމަށް މީހަކު ހޮވުމުގެ އިންތިޚާބުގައި، ލިބަރަލް ޑިމޮކްރެޓިކް ޕާޓީ ބަދަލުވާނެކަން ރައްޔިތުންނަށް ދައްކަން ޖެހޭ،" ކިޝިދާގެ ނިންމުން އިއުލާން ކުރައްވަމުން ބުދަ ދުވަހު އޮތް ނޫސް ކޮންފަރެންސްގައި ވިދާޅުވިއެވެ.

1995 ވަނަ އަހަރުން ފެށިގެން ޖަޕާންގެ ވެރިކަން މައިގަނޑު ގޮތެއްގައި ކުރަމުން އައިސްފައިވަނީ އެލްޑީޕީ އިން ނެވެ. އެހެން ނަމަވެސް 2025 ވަނަ އަހަރު އޮންނަ އާންމު އިންތިޚާބު ކިޝީދާގެ ލީޑަރޝިޕްގައި އެލްޑީޕީ އަށް ކާމިޔާބު ކުރެވިދާނެ ކަމާ މެދު ޕާޓީގެ މެމްބަރުންގެ މެދުގައި ވަނީ ޝައްކު އުފެދިފައެވެ.

މިކަން މިހެން އޮތް އިރުވެސް ކިޝީދާ އިތުރު ދައުރަކަށް ކުރިމަތި ނުލައްވާނެ ކަމަށް އިއުލާން ކުރެއްވުމުން ޕާޓީގެ ލީޑަރުންނަށް ބޮޑު ޝޮކެއް ލިބިގެން ދިޔަ ކަމަށް މީޑިއާ ރިޕޯޓްތައް ބުނެއެވެ.