ސްޕެއިންގެ ބާސެލޯނާގައި އޮތީ ރަނގަޅު ސްކޮޑެއް ކަމަށް އެ ކުލަބުގެ ރައީސް ޖޯން ލަޕޯޓާ ވިދާޅުވެއްޖެ އެވެ.
އޭނާ މިހެން ވިދާޅުވީ ސީޒަން ފެށުމުގެ ގޮތުން ބާސެލޯނާ އިން ކުޅެމުން އަންނަ ގެމްބާ ޓްރޮފީ މެޗަށްފަހު އެވެ. މޮނާކޯއާ ދެކޮޅަށް ކުޅުނު އެ މެޗުން ބާސެލޯނާ ވަނީ ބަލިވެފަ އެވެ. މިއީ 12 އަހަރުގެ ތެރޭގައި އެ މެޗުން ބާސެލޯނާ ބަލިވި ފުރަތަމަ ފަަހަރެވެ. އެ މެޗަށްފަހު ބާސެލޯނާގެ ބައެއް ސަޕޯޓަރުން ވަނީ ނިކޯ ވިލިއަމްސް އެ ކުލަބަށް ސޮއި ކުރުމަށް ބޭނުންވާ ކަމަށް ބުނެ، ލަޕޯޓާ އަށް ގޮވައިފަ އެވެ.
އެކަމާ ގުޅޭ ގޮތުން ވާހަކަ ދައްކަވަމުން ލަޕޯޓާ ވިދާޅުވީ، ބާސެލޯނާގައި މިވަގުތު އޮތީ ރަނގަޅު ސްކޮޑެއް ކަމަށެވެ. ޓީމުގައި ތިބި ކުޅުންތެރިންނަކީ ކޯޗު ހަންސީ ފްލިކް އަދި ޓީމުގެ އިސްވެރިން ވެސް އިތުބާރު ކުރާ ކުޅުންތެރިން ކަމަށް އޭނާ ބުންޏެވެ. އަދި މަސައްކަތް ކުރަންވީ، ރަނގަޅަށް ޓީމު އެކުލަވާލައި، ކުރިއަށް އޮތް ސީޒަންގައި ކާމިޔާބީތައް ހޯދުމަށް ކަމަށް ވެސް އޭނާ ބުންޏެވެ.
ބާސެލޯނާ އިން ވަނީ އައު ސީޒަނަށް ތައްޔާރުވުމުގެ ގޮތުން ބައެއް ކުޅުންތެރިންގެ ސޮއި ވެސް ހޯދައިފަ އެވެ. އެގޮތުން އާރްބީ ލައިޕްޒިގަށް ކުޅެމުން އައި ސްޕެއިންގެ ޑެނީ އޮލްމޯގެ ސޮއި އެ ކުލަބުން ވަނީ ހޯދައިފަ އެވެ.
