ފަލަސްތީންގެ ގާޑަކު ބަޑިޖަހާ ބަންދުގައި ހުރި އިޒްރޭލު މީހަކު މަރާލައިފި

ފަލަސްތީނުގެ ބަންދުގައި ހުރި އިޒްރޭލު މީހެއްގެ ގަޔަށް ގާޑަކަށް ހުރި މީހާ ބަޑިޖަހާ މަރާލައިފިއެވެ.

ހަމާސް އިން ބަންދުކޮށްފައި ތިބި އިޒްރޭލު މީހުންނާ ދިމާލަށް ބަޑިޖެހުމުގެ އެހެން ހާދިސާ އެއްގައި އިތުރު ދެ މީހަކަށް ވަނީ ބޮޑެތި އަނިޔާތަކެއް ލިބިފައެވެ.

ޙަމާސްގެ އަސްކަރީ ގޮފި ކަމުގައިވާ އަލް-ޤައްސާމް ބްރިގޭޑްގެ ތަރުޖަމާނު އަބޫ އުބައިދާ މިހާދިސާގެ މައުލޫމާތު ހާމަކުރީ ހޯމަ ދުވަހުއެވެ.

އޭނާ ހާމަ ކުރި ގޮތުގައި ވަކިވަކިން ހިނގި މި ދެ ހާދިސާގައި، މީހުން ބެލެހެއްޓުމަށް ކަނޑައަޅާފައިވާ ދެ ގާޑުން ބަންދުގައި ތިބި މީހުންނާ ދިމާލަށް ބަޑިޖެހީއެވެ. ބަޑި ޖެހުމުގެ ސަބަބުން ފިރިހެނަކު ވަގުތުން މަރުވީ ކަމަށް އަބޫ އުބައިދާ ބުނެފައިވެއެވެ.

މީގެ އިތުރުން، ބަޑިޖެހި އަނެއް ހާދިސާގައި ބަންދުގައި ތިބި އިޒްރޭލުގެ ދެ އަންހެނަކަށް ބޮޑެތި ޒަޚަމްތަކެއް ލިބިފައިވާ ކަމަށްވެސް ބުނެފައިވެއެވެ. އަދި އެ މީހުންގެ ފުރާނަ ސަލާމަތް ކުރުމަށް މަސައްކަތް ކުރަމުންދާ ކަމަށްވެސް ތަރުޖަމާނު ބުނެފައިވެއެވެ.

މިހާދިސާ ހިނގިގޮތް ތަހުގީގު ކުރުމަށް ކޮމިޓީއެއް އެކުލަވާލާފާއިވާ ކަމަށާއި، ތަފްސީލްތައް ފަހުން ހާމަ ކުރާނެ ކަމަށްވެސް ގަސަމް ބްރިގޭޑްސް އިން ވަނީ ބުނެފައެވެ.

ހަމާސް އިން ބަންދުކޮށްފައިވާ އިޒްރޭލް ބައެއްގެ ގަޔަށް ބަޑިޖެހުމުގެ ހާދިސާ މިހިނގީ ޣައްޒާ ސިޓީގައި ހުރި އަލް-ތާބައީން ސްކޫލުގެ ނަމާދުކުރާ ތަނަށް ފަތިސް ނަމާދު ވަގުތު އިސްރާއީލުން ދިން ހަމަލާއެއްގައި 120 އަށްވުރެ ގިނަ ފަލަސްތީން މީހުން ޝަހީދުވި ނުރައްކާތެރި ގަތުލުއާއްމު ހިނގާފައިވަނިކޮށްނެވެ.

މި ގަތުލުއާއްމަށް އިޝާރާތްކުރަމުން އަބޫ އުބައިދާ ބުނީ، މި ޤަތުލުއާންމުތަކާއި އޭގެ ނަތީޖާއެއްގެ ގޮތުން ބަންދުގައި ތިބި ޒަޔަނިސްޓުންގެ ފުރާނައަށް ކުރިމަތިވާ ނުރައްކާތަކުގެ ފުރިހަމަ ޒިންމާ އުފުލަންޖެހޭނީ ޒަޔަނިސްޓް ދައުލަތުގެ ސަރުކާރުން ކަމަށެވެ.

އިޒްރޭލުން ޣައްޒާ އަށް ހުއްޓުމެއް ނެތި ދެމުންދާ ހަމަލާ ތަކުގައި ފަލަސްތީނުގެ 40،000 އާ ގާތްކުރާ އަދަދަކަށް މީހުން ވަނީ ޝަހިދުވެފައެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.

އިޒްރޭލުން ބުނެފައިވަނީ ހަމާސްގެ ހައްޔަރުގައި 100 ށް ވުރެ ގިނަ އިޒްރޭލް މީހުން ތިބި ކަމަށާއި އޭގެ ތެރެއިން 50 މީހުން ދުނިޔޭގައި ތިބި ކަމަށް ބެލޭ ކަމަށެވެ.

ހަމާސް އިން ބުނެފައިވަނީ ގާޒާ ގެ އެކި ސަރަހައްދުތަކަށް އިޒްރޭލް ސިފައިން ބޮން އަޅާ ދިން ހަމަލާ ތަކުގައި ބަންދުގައި ތިބި އިޒްރޭލުގެ އެތައް ބަޔަކު މަރުވެފައިވާ ކަމަށެވެ.

ހަމާސް އިން އެތައް ފަހަރަކު ބުނެފައިވަނީ ހަނގުރާމަ ހުއްޓާލާ ގާޒާ އިން އިޒްރޭލް ސިފައިން މުޅިން ފޭބުމަށް އެއްބަސްވާނަމަ ބަންދުގައި ތިބި އިޒްރޭލް އެންމެން ދޫކޮށްލާނެ ކަމަށެވެ.

އެހެން ނަމަވެސް ގޮތްދޫނުކުރައްވާ އިޒްރޭލުގެ ބޮޑުވަޒީރު ތަކުރާރުކޮށް ވިދާޅުވަމުން ގެންދަވަނީ ހަނގުރާމައިން ފުރިހަމަ ކާމިޔާބު ހޯދާ ނިންމާލާނީ ހަމާސް އެކީ ނައްތާލުމަށްފަހުގައި ކަމަށެވެ. އެއީ ޚުދު ނަތަންޔާހޫގެ ކެބިނެޓް ގައި ހިމެނޭ ބައެއް ވަޒީރުންވެސް ދެކޭ ގޮތުގައި ހާސިލް ކުރެވިދާނެ ކަމެއް ނޫނެވެ.