ޚާރިޖީ ވަޒީރު ޒަމީރު ބަޙްރެއިނަށް ފުރާވަޑައިގެންފި
މި ދަތުރުފުޅުގައި ދެ ޤައުމުގެ ދެމެދުގައި އޮތް ޒަމާންވީ ގުޅުން ބަދަހިކުރުމަށް މަޝްވަރާ ކުރުމާއި، ދެ ފަރާތަށް މުހިންމު ދާއިރާތަކުގައި އިތުރަށް އެއްބާރުލުން ދެވިދާނެ ގޮތްތައް ބަލައި މަޝްވަރާ ކުރާނެ ކަމަށްވެސް މިނިސްޓްރީން ބުނެއެވެ.
ފޮރިން މިނިސްޓަރ މޫސާ ޒަމީރު
ރާއްޖޭގެ ޚާރިޖީ ވަޒީރު މޫސާ ޒަމީރު، ބަޙްރެއިންގެ ޚާރިޖީ ވަޒީރު ޑރ. އަބްދުއްލަޠީފް ބިން ރަޝީދު އަލް ޒައްޔާނީގެ ދަޢުވަތަކަށް، އާދިއްތަ ދުވަހު ބަޙްރެއިނަށް ރަސްމީ ދަތުރުފުޅެއްގައި ވަޑައިގެންފި ކަމަށް ފޮރިން މިނިސްޓްރީން ބުނެފިއެވެ.
މި ދަތުރުފުޅުގައި، ވަޒީރު ޒަމީރު ބަޙްރެއިންގެ ޚާރިޖީ ވަޒީރާއެކު މަތީ ފެންވަރުގެ މަޝްވަރާތަކެއް ކުރައްވާނެ ކަމަށް ވެސް ފޮރިން މިނިސްޓްރީން މި ދަތުރުފުޅާ ބެހޭ ގޮތުން ނެރުނު ބަޔާނުގައި ވެއެވެ.
މި މަޝްވަރާތަކުގައި، ދެ ޤައުމުގެ ދެމެދުގައި އޮތް ޒަމާންވީ ގުޅުން ބަދަހިކުރުމަށް މަޝްވަރާ ކުރުމާއި، ދެ ފަރާތަށް މުހިންމު ދާއިރާތަކުގައި އިތުރަށް އެއްބާރުލުން ދެވިދާނެ ގޮތްތައް ބަލައި މަޝްވަރާ ކުރާނެ ކަމަށްވެސް މިނިސްޓްރީން ބުނެއެވެ.
މީގެ އިތުރުން، ވަޒީރު ޒަމީރު ބަޙްރެއިން ސަރުކާރުގެ އެހެން އިސް ބޭފުޅުންނާވެސް ބައްދަލުކުރައްވާ ގޮތައް ހަމަޖެހިފައިވާ ކަމަށްވެސް ފޮރިން މިނިސްޓްރީން ބުނެފައިވެއެވެ. މީގެ ތެރޭގައި، ބަޙްރެއިންގެ މާލިއްޔާއާއި ޤައުމީ އިޤްތިޞާދުގެ ވަޒީރު، ތެލާއި ތިމާވެށީގެ ވަޒީރު އަދި ފަތުރުވެރިކަމުގެ ވަޒީރާ ބައްދަލުކުރައްވާ، ދެ ޤައުމުގެ ދެމެދުގައި އެކި ދާއިރާތަކުން އެއްބާރުލުން އިތުރުކުރެވިދާނެ ގޮތްތަކާ ބެހޭ ގޮތުން މަޝްވަރާ ކުރުމަށް ހަމަ ޖެހިފައިވާ ކަމަށްވެސް ފޮރިން މިނިސްޓްރީން ބުނެއެވެ.
މިއަހަރަކީ ދިވެހިރާއްޖެއާއި ބަޙްރެއިނާ ދެމެދު ޑިޕްލޮމެޓިކް ގުޅުން ޤާއިމުކުރިތާ 44 އަހަރު ފުރޭ އަހަރެވެ.
