މިހާރު މިދާގޮތުން 6 މަސް ދުވަސް ތެރޭވެސް ހުޅުމާލެ ސަހަރާ ފުރިދާނެކަމަށާއި މާލެ ސަރަހައްދުން 150000 މީހުން ވަޅުލެވޭނެ ޖާގަ ބޭނުންވާ ކަމަށް މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެއެވެ.

އާޒިމް އެފަދައިން ވިދާޅުވީ ރައީސް ޑރ.މުއިއްޒު މާލެ ސިޓީ ކައުންސިލްގެ މެމްބަރުންނާއި އެކު ބޭއްވެވި ބައްދަލުވުމުގައި، މާލެ ސަރަހައްދަށް ދިމާވެފައިވާ ގޮންޖެހުންތަކާއި ގުޅޭގޮތުން ވާހަކަދައްކަވަމުންނެވެ.

އާޒިމް ވަނީ ސަހަރާތައް ފުރުމުގެ މައްސަލަ އަކީ މާލެ ސަރަހައްދަށް ދިމާވެފައިވާ ވަރަށް ބޮޑު ގޮންޖެހުމެއް ކަމަށް ވިދާޅުވެފައެވެ. ހުޅުމާލެ އަދި މާލެ އަށް ބަލާއިރު ދެ އަހަރެއްހާ ދުވަސްތެރޭގައި ހުރިހާ ސަަހަރާއެއް ފުރޭނެ ކަމަށް އަންދާޒާކުރެވޭ ކަމަށް އާޒިމް ވިދާޅުވިއެވެ. އެހެންކަމަށް ވާނަމަ އެ ސަހަރާތައް އިތުރަށް ބޭނުން ނުކުރެވޭނެކަން އާޒިމް ވަނީ ފާހަގަކުރައްވާފައެވެ. އެކަމާއި މެދު ކަންބޮޑުވުން ފާޅުކުރައްވާ އާޒިމް ވިދާޅުވީ ގުޅީފަޅު އަދި ހުޅުމާލެ ފޭސް 2 ފަދަ ތަންތަނުން 150000 މީހުން ވަޅުލެވޭނެ ޖާގަ ހަމަޖެއްސުން މުހިންމު ކަމަށެވެ. ކުރިއަށް އޮތްތަނުގައި މާލެ ސަރަހައްދުގައި މީހުން ވަޅުލެވޭނީ ބްރިޖަކުން ދެވޭ ހިސާބުގައި ހުރި ތަންތަނުގައި ކަމަށާއި މާލޭގައި އެކަން ކުރެވޭނެ ޖާގައެއް ނޮއޮންނާނެ ކަމަށް ވެސް މޭޔަރ ވަނީ ވިދާޅުވެފައެވެ. ކަނޑުދަތުރެއްކޮށްފައި މީހުން ވަޅުލުމަކީ ވަރަށް ބޮޑު ގޮންޖެހުމަކަށް ވާނެކަން އާޒިމް ވަނީ ފާހަގަކުރައްވާފައެވެ. އާޒިމް ވަނީ ސަރުކާރުގެ އިދާރާތަކަށް ބޭނުންވާ ބިންތައް އެއް ސަރަހައްދެއްގައި ޤާއިމްކުރެވޭނެ މަގު ޤާއިމްކުރުން މުހިންމު ކަމަށް ވެސް ވިދާޅުވެފައެވެ.

އާޒިމް ވަނީ ސިޓީ ކައުންސިލްގެ އިތުރު މަސައްކަތްތަކަށް ވެސް އަލިއަޅުވާލައްވާފައެވެ. ހުޅުމާލެ މާލެސިޓީ ކައުންސިލާއި ހަވާލުކުރުމުގެ މަސައްކަތްތައް ކުރިއަށް ދާ ކަމަށާއި އެކަމާއި މެދު އެޗްޑީސީ އާއި އެކު މަޝްވަރާކުރަމުންދާ ކަމަށް އާޒިމް ވިދާޅުވިއެވެ. އެ މަޝްވަރާތައް ކުރަމުންދާއިރު، މާލެ ސިޓީ ކައުންސިލަށް 50،000 އަކަފޫޓޫގެ ބިމެއް ބޭނުންވާނެކަން ފާހަގަކޮށްފައިވާނެ ކަމަށް އާޒިމް ވިދާޅުވިއެވެ. އެ ބިމުގެ ކުލި ނުނަގާ ގޮތަށް އެ ބިން ދިނުން މުހިންމުކަމަށް އާޒިމް ވިދާޅުވިއެވެ. ފައިސާގެ ދަތިކަން ހުރުމުން މާލެ ސިޓީ ކައުންސިލުން ކުރަން ބޭނުންވާ ކަންކަން ކުރުމަށް ވަރަށް ބޮޑެތި ދަތިތަައް ދިމާވާ ކަމަށް އާޒިމް ވަނީ ވިދާޅުވެފައެވެ. ސިޓީ ކައުންސިލް އަށް އެކަށޭނެ އިމާރާތެއް ނެތުމުން ޚިދުމަތް ދިނުމަށް ގޮންޖެހުންތަކާއި ދިމާވާ ކަމަށާއި، އިމާރާތްތައް ބަދަލުކުރަން ޖެހުމުން އާއްމުންނާއި ގުޅުން ހުރި މުހިންމު ލިޔެކިޔުންތައް ގެއްލޭ ކަމަށް އާޒިމް ވިދާޅުވިއެވެ.

މާލެ ސިޓީ އަށް ތިމާވެށީގެ މައްސަލަތަކެއް ވެސް ދިމާވެފައިވާކަން އާޒިމް ފާހަގަކުރެއްވިއެވެ. އޭގެ ތެރޭގައި އުދަ އެރުން ފަދަ ކަންކަން ހުރި އިރު، އެ ކަންކަން ހައްލުކުރުމަށް ބޮޑެތި ޚަރަދުތަކެއް ހިނގާނެތީ، އެކަން ކުރެވޭނީ ސަރުކާރާއި ގުޅިގެން ކަަމަށް އާޒިމް ވިދާޅުވިއެވެ. މާލެ ސަރަހައްދަށް އުދައެރުމާއި ބޮޑެތި ރާޅުތައް ޖެހުމުގެ ސަބަބުން އާއްމުންނާއި މުދަލާއި ތަކެއްޗަށް ވަރަށް ބޮޑެތި ގެއްލުންތައް ވާކަމަށް ފާހަގަކުރައްވާ އާޒިމް ވަނީ އެކަމާއި މެދު އެކަށީގެންވާ ދިރާސާއެއް ކުރަން ޖެހޭ ކަމަށް ވިދާޅުވެފައެވެ. މީގެ އިތުރުން މާލެ ސަރަހައްދުގައި ބަނދަރުގެ ދަތިކަން ވަރަށް ބޮޑުކަމަށް އާޒިމް ވަނީ ވިދާޅުވެފައެވެ.

މީގެ އިތުރުން މާލެ ތޮއްޖެހުމުގެ މައްސަލަ ހައްލުކުރުމަށް ޕޯޓް ބަދަލުކުރުމުގެ ވާހަކަ މި ސަރުކާރުން ދައްކާފައިވާއިރު އެކަމަކީ ކުރީ ސަރުކާރުން ވަރަށް ބޮޑު ޕްލޭނެއް ހަދާފައިވާ ކަމެއްކަން އާޒިމް ފާހަގަކުރެއްވިއެވެ. އޭރު ޕްލޭން އިންފްރާސްޓްރަކްޗަރ އާއި ހިއްސާކޮށްފައިވާނެ ކަމަށާއި އެ ޕްލޭން ސިޓީ ކައުންސިލަށް ލިބޭނެ މަގުފަހިކޮށްދިނުމަށް އެދިވަޑައިގަންނަވާ ކަމަށް އާޒިމް ވިދާޅުވިއެވެ. އެކަމުގެ ސަބަބުން ޚަރަދުތަކެއް ސަލާމަތްކުރެވޭނެ ކަމަށް އާޒިމް ވިދާޅުވިއެވެ. މީގެ އިތުރުން މާލެ ސަރަހައްދުގައި ވެހިކަލްތައް ކެޕޭސިޓީ ކަނޑައެޅުމަށް ކުރަން ޖެހޭ މަސައްކަތްތައް ކުރިއަށް ދާ ކަަމަށް އާޒިމް ވަނީ ވިދާޅުވެފައެވެ. މާލޭގެ ޓްރެފިކް މެނޭޖްނުކޮށްފި ނަމަ އަނެއްކާވެސް މާލެ ތޮއްޖެހުން އިތުރުވާނެ ކަމަށް އާޒިމް ވަނީ ވިދާޅުވެފައެވެ.