ގޯއްޗާއި ފްލެޓް ދެއްވުން، ކޯޓު މަރުހަލާއަކުން ނަމަވެސް އަވަސްކުރުމަށް ރައީސްގެ އަރިހުން އާޒިމް އެދިވަޑައިގެންފި
11 އޯގަސްޓު 2024 | އާދީއްތަ 08:58ފްލެޓްތައް ދެއްވާ އިރު ފްލެޓްތަކަށް ކުރިމަތި ލީ އިރުގެ ހާލަަތަށް ބެއްލެވުން ވަރަށް މުހިންމު ކަމަށް އާޒިމް ވިދާޅުވި
ރައީސް ޑރ.މުހައްމަދު މުއިއްޒު މާލެ ސިޓީ ކައުންސިލާއި އެކު ބޭއްވި ބައްދަލުކުރެއްވުމުގައި މާލެ ސިޓީ ކައުންސިލްގެ މޭޔަރ އާދަމް އާޒިމް ވާހަކަވަނީ
ނިމިދިޔަ ސަރުކާރުން ދީފައިވާ ގޯއްޗާއި ފްލެޓް ދެއްވުން ކޯޓު މަރުހަލާއަކުން ނަމަވެސް އަވަސްކޮށްދެއްވުމަށް ރައީސް ޑރ.މުހައްމަދު މުއިއްޒުގެ އަރިހުން މާލެ ސިޓީގެ މޭޔަރ އާދަމް އާޒިމް އެދިވަޑައިގެންފިއެވެ.
އާޒިިމް އެފަދައިން އެދިވަޑައިގަންނަވާފައި ވަނީ އާދިއްތަ ދުވަހު ރައީސް ޑރ.މުހައްމަދު މުއިއްޒު މާލެ ސިޓީ ކައުންސިލަށް ވަޑައިގަތުމުން، ކަންބޮޑުވުންތައް ހިއްސާކުރައްވަން ލިބުނު ފުރުސަތުގައެވެ.
މާލެ ސަރަހައްދަށް ދިމާވެފައިވާ މައްސަލަތައް ރައީސް މުއިއްޒު އާއި މާލެ ސިޓީގެ މޭޔަރ އާދަމް އާޒިމް ވަނީ އެ ބައްދަލުވުމުގައި ހިއްސާކުރައްވާފައެވެ. އެގޮތުން އެންމެ ފުރަތަމަ ކަމަކަށް ހިއްސާކުރެއްވީ މާލޭގެ ބޯހިޔާވަހިކަމުގެ ވާހަކައެވެ.
ނިމިދިޔަ ސަރުކާރުން ދޭން ނިންމި ފްލެޓާއި، ގޯތި ލިބުނު މީހުންގެ ލިސްޓުގައި ނަން އޮތް މީހުން، މާލެ ސިޓީ ކައުންސިލާއި ބައްދަލުކޮށް އެ މައްސަލައިގައި ކަންބޮޑުވުން ފާޅުކުރަމުންދާ ކަމަށް އޭނާ ވިދާޅުވިއެވެ. އެ މީހުން ތަކުރާރުކޮށް ސިޓީ ކައުންސިލަށް ގޮސް އެ ކަންބޮޑުވުންތައް ހުށަހަޅާ ކަމަށާއި، ދަފްތަރުގައި ހިމެނުމަށް އެދި ހުށަހަޅާފައިވާ މީހުންގެ ވެސް ކަންބޮޑުވުންތަކެއް ހުރި ކަަމަށް އާޒިމް ވިދާޅުވިއެވެ. އެއްވެސް މީހެއްގެ އަތުން ފްލެޓެއް ނޫނީ ގޯއްޗެއް އަތުނުލައްވާނެ ކަަމަށް ރައީސް ވިދާޅުވެފައިވާ ކަމަށާއި އެކަން ކުރުމަށް ރައީސަށް އެއްބާރުލުން ދެއްވާނެ ކަމަށް ވެސް އާޒިމް ވަނީ ވިދާޅުވެފައެވެ.
އާޒިމް ވިދާޅުވީ ނިމިދިޔަ ސަރުކާރުން ދޭން ނިންމި 4000 ފްލެޓްގެ މައްސަލަ އެއް ނެތް ފަރާތްތަކަށް ވީހާވެސް އަވަހަށް އެ ފްލެޓް ލިބޭނެ ގޮތް ހައްދައްވާދެއްވުން އެދިވަޑައިގަންނަވާ ކަމަށެވެ. އަދި މައްސަލަތައް ހުރި ފަރާތްތަކަށް ވަކިވަކިން ބައްދަލުކޮށް އެކަން ސާފުކޮށްދޭން ވާނެ ކަމަށް ޤަބޫލުކުރައްވާކަމަށް ވެސް އާޒިމް ވިދާޅުވިއެވެ. އަދި ފްލެޓްތައް ދެއްވާ އިރު ފްލެޓްތަކަށް ކުރިމަތި ލީ އިރުގެ ހާލަަތަށް ބެއްލެވުން ވަރަށް މުހިންމު ކަމަށް އާޒިމް ވިދާޅުވިއެވެ.
ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން އިމާރާތް ކުރަން ފެށި 4000 ފްލެޓް ލިބޭނެ ކަމަށް ކަނޑައަޅާފައިވާ މީހުންގެ ލިސްޓާ ގުޅޭ ގޮތުން އޭސީސީން ހިންގި ތަހުގީގުގައި 60 އިންސައްތަ މީހުން ޝަރުތު ހަމަނުވާ ކަމަށް ކަނޑައެޅިއެވެ. ނިމިދިޔަ ސަރުކާރުގެ ގެދޮރުވެރިޔާ ސްކީމްގެ ފުރަތަމަ ބުރުގައި 21،000 މީހުން ފްލެޓަށް ކުރިމަތިލިއެވެ. އޭގެ ތެރެއިން 12،000 މީހުންނަށް ފްލެޓް ލިބޭ ކަމަށް ކަނޑައެޅިއެވެ. އޭގެ ތެރެއިން ފުރަތަމަ ފްލެޓް ދޭން ނިންމީ 4000 މީހުންނަށެވެ.
ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުން ވަނީ ހުޅުމާލެ 2 އަދި އަލަށް ހިއްކާ ހުޅުމާލޭ 3 އަކާއި ގުޅިފަޅާއި ގިރާވަރުފަޅުން 9،000 ގޯތި ދޭން ނިންމާފައެވެ. އޭގެ ތެެރެއިން ގިނަ ބަޔަކަށް ރަޖިސްޓަރީ އާއި ބައެއް މީހުންނަށް ބިންތައް އޭރު ވެސް ހަވާލުކުރިއެވެ.
