އޭޝިއާ ބޮޑީބިލްޑިން އެންޑް ސްޕޯޓްސް ފިޒީކް ޗެމްޕިއަންޝިޕް ގައި ވާދަކޮށް ރާއްޖޭގެ އަޒްނީން ރަޝާދު ރަން މެޑަލް ހޯދައިފި އެވެ.
މިއީ އަަޒްނީން، އޭޝިއާ މުބާރާތުގެ ރަން މެޑަލް ހޯދި ތިން ވަނަ ފަހަރެވެ. މީގެ ކުރިން އަޒްނީން ވަނީ މިދިޔަ އަހަރު ރާއްޖޭގައި އޮތް އޭޝިއާ މުބާރާތް އަދި ނޭޕާލުގައި ކުރިއަށް ދިޔަ އޭޝިއާ މުބާރާތުގައި ވެސް ރަން މެޑަލް ހޯދައިފަ އެވެ. އަޒްނީން ރަން މެޑަލް ހޯދާފައި ވަނީ ސްޕޯޓްސް ފިޒީކްގެ 170 ސެންޓިމީޓަރު ކެޓަގަރީންނެވެ.
މިއާ އެކު އިންޑޮނޭޝިއާގައި ކުރިއަށްދާ އޭޝިއާ މުބާރާތުގައި ރާއްޖެ އިން ކާމިޔާބު ކުރި މެޑަލްގެ އަދަދު ވަނީ ތިނަކަށް އަރައިފަ އެވެ. އަޒްނީންގެ އިތުރުން ރާއްޖޭގެ ޢަބްދުﷲ އަޙުސަން ވެސް ވަނީ ރަން މެޑަލް ކާމިޔާބު ކޮށްފަ އެވެ. އެއީ ސްޕޯޓްސް ފިޒީކް 175 ސެންޓިމީޓަރުގެ ބައިންނެވެ. ދެން މި މުބާރާތުގައި ރާއްޖެ އަށް މެޑައްޔެއް ހޯދައިދިނީ ޝާހީން އިބްރާހީމް ދީދީ (ޝާންޓެ) އެވެ. އެއީ 60 ކިލޯގެ ކެޓަގަރީން ރިހި މެޑަލް އެވެ.
މީގެ ކުރިން 2022 ވަނަ އަހަރު ތައިލެންޑުގެ ބެންކޮކުގައި ކުރިއަށް ދިޔަ ވޯލްޑް ބޮޑީބިލްޑިން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް ގައި ވާދަކޮށް ވެސް އަޒްނީން ވަނީ ރަން މެޑަލް ހޯދައިފަ އެވެ.
