ބަންކަރިންގ މަޝްރޫއަށް ގެނައި ބޯޓަކީ އިންޖީނު މައްސަލަ ދިމާވާ ބޯޓެއްކަމަށް ދެކެވޭ ވާހަކަތައް އެމްޕީއެލްއިން ދޮގުކޮށްފި
އެ ބޯޓަކީ މީގެ ކުރިންވެސް އެކި އޮޕަރޭޝަންތަކުގައި ބޭނުން ކުރާ ބޯޓެއް
އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް ގެނައި ޕައިލެޓް ބޯޓާއި ޓަގް ބޯޓް
ބައިނަލް އަގްވާމީ ދަތުރުފަތުރުގައި އުޅޭ ބޯޓު ފަހަރަށް ބަންކަރިންގެ ޚިދުމަތް ދިނުމަށްޓަކައި އިހަވަންދިއްޕޮޅުގައި ބަންކަރިންގެ ގެ ޚިދުމަތް ފަށައިގަތުމަށް މި ސަރުކާރުން ގެނައި ބޯޓަކީ ގިނަ މައްސަލަތަކެއް ހުރި ބޯޓެއްކަމަށް ދެކެވޭ ވާހަކަތައް މޯލްޑިވްސް ޕޯޓްސް ލިމިޓެޑް (އެމްޕީއެލްއިން) ދޮގުކޮށްފިއެވެ.
އެމްޕީއެލްއިން މީގެ ކުރިން ބުނެފައިވަނީ ބަންކަރިންގެ ހިދުމަތް ފަށަން ބޭނުންވާ ޕައިލެޓް ބޯޓާއި ޓަގް ބޯޓު އޯގަސްޓު މަހުގެ ދެވަނަ ދުވަހު ރާއްޖެ ގެނެސްފައިވާ ކަމަށެވެ.
ކުޅުއްދުއްފުށީ ޕޯޓަށް އެ ދެ އުޅަނދު ވަނުމާ އެކު ވޯޓާ ސެލިއުޓެއްވެސް ދީފައިވެއެވެ.
އެހެންނަމަވެސް އެ ބޯޓަކީ މީގެ ކުރިންވެސް އެކި އޮޕަރޭޝަންތަކުގައި ބޭނުން ކުރާ ބޯޓެއް ކަމަށާއި، އެއީ ދޭތެރެ ދޭތެރެއިން އެކި މައްސަލަތައް ދިމާވެ މަރާމާތު ކުރަން ޖެހޭ ބޯޓެއްކަމަށް ރާއްޖެއެމްވީއަށް އިތުބާރު ހުރި މަސްދަރަކުން ކިޔާދިނެވެ. އެގޮތުން އެ ބޯޓު ހުއްޓި އަޑިއަށް ގޮސްގެން ކަފު ޖަހައިގެން އެއް ނަންބަރު ޖެޓީއަށްވެސް މީގެ ކުރިން ގެނަކަމަށް އެކަމުގެ މައުލޫމާތު އެނގޭ ފަރާތަކުން ކިޔާދިނެވެ.
ރާއްޖެއެމްވީއަށް ބައެއް އިތުރު މަސްދަރުތަކުން ކިޔާދިން ގޮތުގައި އެ ޕައިލެޓް ބޯޓުގެ އިންޖީނު މައްސަލަތައް ދިމާވާ ވަރުން ނުދުއްވިގެން ބާއްވާފައިވެސް އެތައް ދުވަހަކު އޮތެވެ.
އޭގެ އިތުރުން، މިހާރު ކުދިކުދި މަރާމާތު ކޮށްލާފައިވީނަމަވެސް، ސަރުކާރުން އަނެއްކާވެސް މިފަދަ ބޮޑު މަޝްރޫއަކަށް އެހާ ބޮޑެތި މައްސަލަ ދިމާވާ ބޯޓެއް ނެރުމަކީވެސް ކަންބޮޑުވާ ކަމެއްކަމަށް ރާއްޖެއެމްވީއާ ވާހަކަ ދެއްކި ފަރާތްތަކުން ބުންޏެވެ.
އެހެންނަމަވެސް، އެ ވާހަކަތައް އެމްޕީއެލްގެ ސީއީއޯ މުޙައްމަދު ވަޖީހު ވަނީ ދޮގު ކުރައްވާފައެވެ. ރާއްޖެއެމްވީން ސުވާލު ކުރުމުން އޭނާ ވިދާޅުވީ، އެ ބޯޓަކީ އެއްވެސް މައްސަލައެއް ދިމާވާ ބޯޓެއް ނޫން ކަމަށެވެ.
އެހެންނަމަވެސް ރާއްޖެއެމްވީއާ ވާހަކަ ދެއްކި މަސްދަރުން ކިޔާދިން ގޮތުގައި ބޯޓު ބަންކަރިންގެ ޚިދުމަތަށް ބޭނުން ކުރުމަށް ގެންދިޔަ ދުވަހުވެސް ކުޅުދުއްފުށީ ފަޅުތެރެއަށް ވަތްފަހުން ދެ އިންޖީނުގެ މައްސަލަ ޖެހިގެން ބޯޓު ތޮށިގަނޑުގައިވެސް ޖެހިފައިވެއެވެ.
އުތުރުގައި ފެށުމަށް ހަމަޖެހިފައިވާ މެރިޓައިމްގެ ޚިދުމަތްތައް ގާއިމު ކުރުމާ ގުޅޭގޮތުން މަޝްވަރާކުރުމަށް ސީ.އީ.އޯ މުޙައްމަދު ވަޖީހް އިބްރާހިމް ހއ.އިހަވަންދޫއަށް ޒިޔާރަތްކުރައްވައި، އެ ރަށުގެ ކައުންސިލްއާއެކު ބައްދަލުވުމެއް ބާއްވާފައިވާކަމަށްވެސް އެމްޕީއެލްއިން ބުނެފައިވެއެވެ.
އިހަވަންދިއްޕޮޅު ގައި މޯލްޑިވްސް އިކޮނޮމިކް ގޭޓްވޭގެ ނަމުގައި މި ސަރުކާރުން ހިންގާނެ ކަމަށް ބުނާ މަޝްރޫއުގެ ދަށުން އިންޓަނޭޝަނަލް ބަންކަރިން ފެސިލިޓީއެއް އެޅުމަށް އެސްޓީއޯ އިން ނެދަލޭންޑްސްގެ ކުންފުންޏެއް ކަމަށްވާ "ވިޓޯލް"އާ އެކު އެކުލަވާލާ މަޝްރޫއުގެ ޓާރމް ޝީޓުގައި މިދިޔަ މާޗު މަހުގެ 13 ވަނަ ދުވަހު ވަނީ ސޮއި ކޮށްފައެވެ.
މި ޓާމް ޝީޓަކީ، ބަންކަރިން ވިޔަފާރި ފެށުމަށްޓަކައި ފުރިހަމަ ކުރަންޖެހޭ ކަންކަން ކަނޑައަޅައި ދެ ފަރާތުން ނިންމަން ޖެހޭ ލިޔެކިޔުންތައް ވަކި ތާރީޚެއްގެ ތެރޭ ނިންމަން ސޮއި ކުރެވޭ އެއްބަސްވުމެއް ކަމަށް އޭރު ވަނީ ބުނެފައެވެ.
