އުމުރުން 41، އޮތީ ކާމިޔާބު ކެރިއަރެއް، ޕެޕޭ ބޫޓު ބާލައިފި
9 އޯގަސްޓު 2024 | ހުކުރު 05:34އޭނާގެ ކެރިއަރުގައި ހޯދި ކާމިޔާބީތަކާ އެއްވަރަށް އޭނާ އަށް ދެއްކި 212 ރީނދޫ ކާޑާއި 17 ރަތްކާޑަކީ ވެސް ހާއްސަ ކަމެކެވެ.
ޕެޕޭ
ކާމިޔާބު ކެރިއަރަކަށް ފަހު ޕޯޗުގަލްގެ ވައިސް ކެޕްޓަން އަދި ތަޖުރިބާކާރު ޑިފެންޑަރު ޕެޕޭ އުމުރުން 41 އަހަރުގައި ކުޅުން ހުއްޓާލައިފި އެވެ.
އޭނާ އެންމެ ފަހުން ކުޅުނު މުބާރާތަކީ ޖުލައި މަހު ނިމުނު ޔޫރޯ ފުޓްބޯޅަ މުބާރާތެވެ. އޭނާ އަކީ އެ މުބާރާތުގައި ކުޅުނު އެންމެ ދުވަސްވީ ކުޅުންތެރިޔާ އެވެ. އޭނާގެ އެންމެ ފަހު މެޗަށްވީ ފްރާންސް އަތުން ޕެނަލްޓީ ޖަހައިގެން ޕޯޗުގަލް ބަލިވި މެޗެވެ.
ރެއާލް މެޑްރިޑުގެ ކުރީގެ ކުޅުންތެރިޔާ ކުޅުން ހުއްޓާލިއިރު އޭނާ އަކީ ޕޯޗުގަލްގެ ގައުމީ ޓީމަށް ތިން ވަނަ އަށް އެންމެ ގިނަ މެޗު ކުޅެދިން ކުޅުންތެރިޔާ އެވެ. އޭނާގެ ޖުމުލަ 141 އަށް އެރިއިރު، މިއަށްވުރެ ގިނައިން މެޗު ކުޅެފައިވަނީ ކެޕްޓަން ކްރިސްޓިއާނޯ ރޮނާލްޑޯ އާއި މިޑްފީލްޑަރު މޮޓީނިއޯ އެވެ.
ކުޅުން ހުއްޓާލިކަން ރަސްމީކޮށް އިއުލާނުކުރަމުން ޕެޕޭ ވަނީ އޭނާގެ ކެރިއަރުގައި އެހީވި އެންމެނަށް ސޯޝަލް މީޑިއާ މެދުވެރިކޮށް އާއްމުކުރި 33 މިނިޓްގެ ވީޑިއޯއެއްގައި ޝުކުރު އަދާކޮށްފަ އެވެ.
އޭނާގެ އެންމެ ހާއްސަ ކާމިޔާބީ އަކީ 2016 ވަނަ އަހަރުގެ ޔޫރޯ ޕޯޗުގަލް އަށް ކާމިޔާބުކޮށްދިނުމެވެ. މީގެ އިތުރުން އޭނާ ވަނީ ރެއާލް މެޑްރިޑަށް 10 އަހަރު ކުޅެދީ ތިން ފަހަރު ޗެމްޕިއަންސް ލީގު ކާމިޔާބުކޮށްދީ ތިން ފަހަރު ސްޕެނިޝް ލީގް ކާމިޔާބުކޮށްދީފަ އެވެ.
ޕެޕޭ ކުޅުން ހުއްޓާލިއިރު އޭނާ އަކީ ޗެމްޕިއަންސް ލީގުގައި ގޯލު ޖެހި އެންމެ ދޮށީ ކުޅުންތެރިޔާ އެވެ. މި ޝަރަފު އޭނާ އަށް ދީ ނިމިދިޔަ ސީޒަނުގައި ގްރޫޕް ސްޓޭޖުގަ އެވެ.
ޕެޕާ ރިޓަޔާ ކުރުމުން އޭނާ އަށް އެންމެ ފުރަތަމަ ޝުކުރު އަދާކުރީ ރޮނާލްޑޯ އެވެ. އޭނާ ބުނެފައިވަނީ އޭނާގެ ކެރިއަރުގައި ވަރަށް މުހިންމު މީހެއް ކަމަށެވެ.
އޭނާގެ ކެރިއަރުގައި ހޯދި ކާމިޔާބީތަކާ އެއްވަރަށް އޭނާ ހޯދި ދެ ކުލައިގެ ކާޑުތަކަކީ ވެސް ހާއްސަ ކަމެކެވެ. 212 ރީނދޫ ކާޑާއި 17 ރަތްކާޑު އެނާ އަށް ވަނީ ދައްކައިފަ އެވެ.
