ޖެސޫސްގެ ފަރާތުން އަބަދު ވެސް ފެންނަނީ ތަފާތު ރޫޙެއް: އާޓެޓާ

އާސެނަލަށް ކުޅެމުން އަންނަ ބްރެޒިލްގެ ފޯވާޑް، ގެބްރިއަލް ޖެސޫސްގެ ފަރާތުން އަބަދު ވެސް ފެންނަމުން އަންނަނީ ތަފާތު ރޫޙެއް ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

ވާދަވެރި މެންޗެސްޓަރ ސިޓީގައި ހުރުމަށްފަހު، އުމުރުން 27 އަހަރުގެ ކުޅުންތެރިޔާ އާސެނަލަށް ބަދަލުވީ 2022 ވަނަ އަހަރު އެވެ. އާސެނަލާ އެކު އޭނާ ސޮއި ކުރީ ފަސް އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށެވެ.

އާސެނަލާ އެކު ޖެސޫސް ވަނީ މިހާތަނަށް ދެ ސީޒަން ހޭދަކޮށްފަ އެވެ. ދެ ސީޒަންގެ ތެރޭގައި އޭނާ ވަނީ އާސެނަލަށް ކުޅެދިން 69 މެޗުގައި 19 ލަނޑު ޖަހައިފަ އެވެ. އާސެނަލްގައި ޖެސޫސް މޮޅު ކުޅުމެއް ދައްކަމުން އަންނައިރު، އޭނާ އަކީ އާސެނަލްގެ ކޯޗު އާޓެޓާ އިސްކަން ދެމުން އަންނަ ކުޅުންތެރިންގެ ތެރޭގައި ހިމެނޭ ވެސް ކުޅުންތެރިޔެކެވެ.

ޖެސޫސްއާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، އޭނާ އެންމެ ފަހުން ވެސް ޖެސޫސް ފެނުމުން ތަފާތު އިޙުސާސެއް ކުރެވުނު ކަމަށެވެ. އަބަދު ވެސް ޖެސޫސްގެ ފަރާތުން ފެންނަ ހިތްވަރާއި، އޭނާ ދައްކަމުން އަންނަ ރޫޙަކީ ތަފާތު ކަމެއް ކަމަށް އާޓެޓާ ސިފަ ކުރި އެވެ. އަބަދު ވެސް އޭނާ އަށް އެކަން އިޙުސާސް ކުރެވޭކަން ފާހަގަކޮށް އާޓެޓާ ބުނީ، ޖެސޫސް އަކީ ތަފާތު ކުޅުންތެރިޔެއް ކަމަށެވެ.

އާސެނަލް އިން އަންނަ ސީޒަނަށް ތައްޔާރުވަމުން އަންނައިރު، ޖެސޫސްގެ ފަރާތުން އިތުރު ތަފާތު ކަންތައްތަކެއް ފެނިގެން ދާނެ ކަމުގެ އުންމީދު ވެސް އާޓެޓާ އަށް އޮވެ އެވެ. އާސެނަލްގެ އެހެން ކުޅުންތެރިންނެކޭ އެއް ފަދައިން ޖެސޫސް ވެސް ބޭނުން ވަނީ ޓީމަށް ކާމިޔާބު ހޯދައިދޭންކަން ފާހަގަކޮށް އާޓެޓާ ބުނީ، ޖެސޫސް އަކީ އޭނާ އަށް މުހިންމު ކުޅުންތެރިޔެއް ކަމަށެވެ.