އަބްދުއްރަޙީމް ޔާމީނަށް ކުރުދޮށިން ދީފި، ގޮވާލީ ކުޅަނދުރު ހަތައަށް އޮށްގާ ނުއުކުމަށް
ޖަލްސާގައި އަބްދުއްރަޙީމް ވަނީ ބަހުގެ ހޫނު ހަމަލާތަކެއް ޔާމީނަށް އަމާޒު ކުރައްވާފައި
ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޗެއާޕާސަން އަދި ރައީސް މުއިއްޒުގެ ސްޕެޝަލް އެޑްވައިޒަރު އަބްދުއްރަހީމު އަބްދުﷲ (އަދުރޭ)
ކުރީގެ ރައީސް އަބްދުﷲ ޔާމީނަށް ޕީއެންސީގެ ޗެއަރމަން އަދި ކުރިން ރައީސް ޔާމީނުގެ އެންމެ އަރިސްކޮށް އުޅުއްވާ އަބްދުއްރަޙީމް އަބްދުﷲ ވަރުގަދަ ބަހުގެ ޙަމަލާތަކެއް އަމާޒު ކުރައްވައިފިއެވެ.
އަންގާރަ ދުވަހުގެރޭ ޕީއެންސީން ބޭއްވި ޖަލްސާގައި އަބްދުއްރަޙީމް ވަނީ ބަހުގެ ހޫނު ހަމަލާތަކެއް ޔާމީނަށް އަމާޒު ކުރައްވާފައެވެ.
އަބްދުއްރަޙީމް ވިދާޅުވީ، އޭނާއަށް ނިސްބަތްކޮށް ދެކެވޭ ކޮރަޕްޝަންގެ ތުހުމަތުތައް ބެލުމާމެދު މައްސަލައެއް ނެތް ކަމަށާއި، ނަމަވެސް ރައީސް ޔާމީނުގެ މައްޗަށް ކުރެވޭ ތުހުމަތުތައްވެސް ބަލަން ޖެހޭނެ ކަމަށެވެ.
އެގޮތުން ބަލާއިރު، ވެރިކަމުގެ ދައުރު ފުރިހަމަ ކުރައްވައި ރައީސް ޔާމީނު ފައިބާވަޑައިގެންނެވިއިރު 500 މިލިއަނުން އެކައުންޓުގައި ފައިސާ ހުރި ކަމަށާއި، އެއީ ކޮންތާކުން ހޯދި ފައިސާއެއްތޯ އަބްދުއްރަޙީމް ވަނީ ސުވާލު ކުރައްވާފައެވެ.
އެ ފައިސާގެ ތަފްސީލާއި ފައިސާ ހޯދި ގޮތް ރައްޔިތުންނަށް ކިޔައިދޭން ޖެހޭނެކަމަށްވެސް އަބްދުއްރަޙީމް ވިދާޅުވިއެވެ.
އަބްދުއްރަޙީމް ވަނީ ކުޅަނދުރު ހަތަޔަށް އޮއްގާ ނުއުކުމަށްވެސް ރައީސް ޔާމީނަށް ގޮވާލައްވާފައެވެ.
އެހެންނަމަވެސް މީގެ ކުރިން އަބްދުއްރަޙީމްވެސް ވަނީ އެމްއެމްޕީއާރްސީގެ މައްސަލައިގައި ރައީސް ޔާމީނުގެ މައްޗަށް ކޮށްފައިވަނީ ސިޔާސީ ދައުވާތަކެއްކަމަށް އެތައް ފަހަރަކު ވިދާޅުވެފައެވެ.
އޭގެ އިތުރުން، އެމްއެމްޕީއާރްސީއާ ގުޅޭ ދައުވާތައް ރައީސް ޔާމީނުގެ މައްޗަށް ސާބިތު ކުރެވޭނެ އެއްވެސް ޤާނޫނީ ހަމައެއްވެސް ނޯންނާނެ ކަމަށް އަބްދުއްރަޙީމް ވިދާޅުވެފައިވެއެވެ.
