ލާމަރުކަޒީ ނިޒާމް ފުނޑާލުމަކީ ޚުދުމުހުތާރު ވެރިކަމެއްގައި އަބަދުވެސް ފެންނާނެ ސިފަތައް - ޝަމާއު
މަސައްކަތްތައް ކުރުމުގެ ފުރުސަތު ނުދިނުން ފަދަ އުނދަނގޫތަކާއި ޕީޕީއެމްގެ ކުރީގެ ސަރުކާރުގައި ވެސް ދިމާވި ކަމަށް ޝަމާއު ވިދާޅުވި
އެމްޑީޕީން ހޯމަ ދުވަހުގެ ރޭ ބޭއްވި ޕެނަލް ޑިސްކަޝަންގެ ތެރެެއިން
ލާމަރުކަޒީ ނިޒާމް ފުނޑާލުމަކީ ޚުދުމުހުތާރު ވެރިކަމެއްގައި އަބަދުވެސް ފެންނާނެ ސިފަތައް ކަމަށް މާލެ ސިޓީގެ ކުރީގެ ޑެޕިއުޓީ މޭޔަރ ޝަމާއު ޝަރީފް ވިދާޅުވެއްޖެއެވެ.
އޭނާ އެފަދައިން ވިދާޅުވީ އެމްޑީޕީން ހޯމަ ދުވަހުގެ ރޭ ބޭއްވި ޕެނަލް ޑިސްކަޝަންގައި ވާހަކަދައްކަވަމުންނެވެ.
ކައުންސިލް މެމްބަރުންގެ އަދަދު މަދުކުރުމާއި މެދު ދެކެވަޑައިގަންނަވާ ގޮތް ހާމަކުރައްވަމުން ޝަމާއު ވަނީ އެއީ މިހާރުގެ ރައީސް ޑރ.މުހައްމަދު މުއިއްޒު ހުންނެވި ޕީއެންސީ، ޕީޕީއެމް ފިކުރުގެ ބޭފުޅުންނަށް ވެރިކަން ލިބޭ ކޮންމެ ފަަހަރަކު ފެނިގެންދާ މަންޒަރެއް ކަމަށެވެ. އަދި ލާމަރުކަޒީ ނިޒާމާއި މެދު މިހާރުގެ ރައީސް މުއިއްޒު ވާހަކަދައްކަވަނީ އެކި ފަހަރު އެކި ގޮތްގޮތަށް ކަމަށް ޝަމާއި ވިދާޅުވިއެވެ. ރައީސް މުއިއްޒު އަކީ ފަހުގެ ތާރީހުގައި އެންމެ ގިނަ ދުވަހު ހައުސިން މިނިސްޓްރީގައި މަސައްކަތްކުރެއްވި ބޭފުޅާ ކަމަށް ވާއިރު ވަޒީރު ކަމުގައި ހުންނަވައިގެން ވެސް، މީގެ ކުރިން ވެސް ރައީސް މުއިއްޒު ހުރިހާ ބާރެއް މުށުތެރެއަށް ޖަމާކުރަން އުޅުއްވި މަންޒަރު ދެކެވަޑައިގެންފައިވާ ކަމަށް އޭނާ ވިދާޅުވިއެވެ. ހަމައެގޮތަށް މި ސަރުކާރުންވެސް ރައްޔިތުންގެ އަޑު އަހަން ބޭނުން ނުވާ ކަމަށާއި ރައްޔިތުންގެ މަޝްވަރާ ބޭނުން ނުވާ ކަމަށެވެ.
ލާމަރުކަޒީ ޤާނޫނަކީ އެންމެ ގިނަ އިސްލާހުތައް ގެނައި ޤާނޫނު ކަމަށް ވާއިރު އެ ބަދަލުތައް ޕީޕީއެމް، ޕީއެންސީން ގެނެސްފައި ވަނީ ކައުންސިލްތަކުގެ ބާރު ކަނޑުވާލަން ކަމަށް ޝަމާއު ވަނީ ވިދާޅުވެފައެވެ. އެގޮތުން ކައުންސިލްތަކަށް ޤާނޫނުތަކުން ލިބިދީފައި އޮތް ބާރުތައް ނަގާ، ކައުންސިލްތަކުގެ ބާރުވެރިކަން ކުޑަ ކުރުމަށް ހައުސިން މިނިސްޓަރަކަށް ހުންނަވައިގެން ވެސް މުއިއްޒު މަސައްކަތް ކުރެއްވި ކަމަށް އޭނާ ވިދާޅުވިއެވެ. މުއިއްޒުގެ ހައުސިން މިނިސްޓަރކަމުގައި މާލެ ސިޓީ ކައުންސިލަށް ވެސް ދިމާވީ އެފަދަ ދަތިތައް ކަމަށް ޝަމާއު ވަނީ ފާހަގަކުރައްވާފައެވެ.
ގޭންގާއި ފުލުހުންގެ ބާރުގެ ބޭނުންކޮށްގެން ކައުންސިލްތަކަށް އުނދަނގޫތައް ކުރުވާ، ކައުންސިލުން ވަންނާނެ ތަނެއް ނެތް މިންވަރަށް ހާލަތު ގޯސްކޮށްލި ކަމަށް ޝަމާއު ވަނީ ވިދާޅުވެފައެވެ. މުސާރަތައް ކުޑަކުރުމާއި، މަސައްކަތްތައް ކުރުމުގެ ފުރުސަތު ނުދިނުން ފަދަ އެތައް އުނދަނގުލަކާއި އޭރުވެސް ކުރިމަތިލާން ޖެހުނު ކަމަށް ޝަމާއު ވިދާޅުވިއެވެ.
ރައްޔިތުން ތަމްސީލްކުރަން ގިނަ މީހުން ކައުންސިލްގައި ތިބެން ނުޖެހޭ ކަމަށާއި ކައުންސިލްގެ ސައިޒްކުޑަކުރަން ޤާނޫނަށް އިސްލާހު ހުށަހަޅުއްވާނެ ކަަމަށް ރައީސް ޑރ.މުހައްމަދު މުއިއްޒު ވަނީ ދާދިފަހުން ވިދާޅުވެފައެވެ. އެމަނިކުފާނު ވިދާޅުވީ ގިނަ އަދަދެއްގެ ކައުންސިލަރުން ތިއްބެވުމުން ދައުލަތުގެ ބަޖެޓުން އެ ފަރާތްތަކަށް މުސާރަ ދިނުމަށް ވަރަށް ބޮޑު ހޭދައެއް ކުރަން ޖެހޭ ކަަމަށެވެ. އެއީ އެންމެ އެކަށީގެންވާ ގޮތް ކަމަށް ޤަބޫލު ނުކުރައްވާ ކަމަށް ރައީސް މުއިއްޒު ވިދާޅުވިއެވެ. ކައުންސިލްތައް ނުކަތާ މިންވަރަށް ބޮޑުވެފައިވާ ކަމަށާއި އެއީ ޚަރަދު ބޮޑު ނިޒާމެއް ކަމަށް ވެސް ރައީސް މުއިއްޒު ވިދާޅުވިއެވެ. މީގެ އިތުރުން ރަށެއްގެ 300 މީހުން 500 މީހުންގެ ރަށެއްގައި 3 މީހުން 5 މީހުން ހޮވުމަކީ އެންމެ ރަނގަޅު ގޮތް ނޫން ކަމަށް އެމަނިކުފާނު ވިދާޅުވިއެވެ.
